କେସିଙ୍ଗା,୨୫।୧୦(ଡି.ଏନ୍.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକ ଅଧୀନ ବେଲଖଣ୍ଡି ପଞ୍ଚାୟତସ୍ଥିତ ଧବଳେଶ୍ୱର ଦୁଗ୍ଧ ସମବାୟ ସମିତି କାର୍ଯ୍ୟାଳୟ ସମ୍ମୁଖରେ ମଙ୍ଗଳାବର ସ୍ଥାନୀୟ ଦୁଗ୍ଧ ଚାଷୀ ଆନ୍ଦୋଳନ କରିଛନ୍ତି।
ମିଳିଥିବା ସୂଚନା ମୁତାବକ, ବଲାଙ୍ଗୀର, କଳାହାଣ୍ଡି, ନୂଆପଡ଼ା ଆଞ୍ଚଳିକ ଦୁଗ୍ଧ ସଙ୍ଘର ବୋର୍ଡ ଡାଇରେକ୍ଟର ପଦ ପାଇଁ କଳାହାଣ୍ଡି ଜିଲାର ୧୦ ନମ୍ବର ଜୋନରେ ବେଲଖଣ୍ଡି ଗ୍ରାମର ୧୪ଜଣ ଓ ଦିଗସିରା ଗ୍ରାମର ୧୧ଜଣ ଦୁଗ୍ଧ ସମବାୟ ସମିତି ସଦସ୍ୟ ରଶ୍ମିତା ପୁଟେଲଙ୍କ ସପକ୍ଷରେ ସମୁଦାୟ ୨୫ ଜଣ ରହିଥିଲେ।
ଅପରପକ୍ଷେ ବଲାଙ୍ଗୀର ଜିଲା ରୋତ ଗ୍ରାମର ୧୫ଜଣ ଓ ହରଭଙ୍ଗାର ୯ଜଣ ସୀମା ପଟେଲଙ୍କ ସପକ୍ଷରେ ସମୁଦାୟ ୨୪ ଜଣ ସମିତି ସଦସ୍ୟ ରହିଥିଲେ। ହେଲେ ଆନ୍ଦୋଳନକାରୀଙ୍କ କହିବା ମୁତାବକ, କଳାହାଣ୍ଡି ଜିଲା ଦିଗଶିରାର ରଶ୍ମିତା ପୁଟେଲ ବାଜିମାତ କରିବା ନେଇ ଜଣାପଡିଥିଲା। କିନ୍ତୁ ବିଡମ୍ବନାର ବିଷୟ ତାଙ୍କ ସପକ୍ଷର ଥିବା ଗୋଟିଏ ଭୋଟ ଅପରପକ୍ଷକୁ ଚାଲିଯାଇଥିଲା। ବେଲଖଣ୍ଡି ଦୁଗ୍ଧ ଚାଷୀଙ୍କ କହିବା ଅନୁଯାୟୀ , ପୂର୍ବତନ ସଭାପତି ହେମସାଗର ପୂଝାରି ଅପରପକ୍ଷଙ୍କ ସହିତ ଅର୍ଥ କାରବାର କରିଥିବା ଅଭିଯୋଗ କରିଥିଲେ। ଏ ନେଇ ବେଲଖଣ୍ଡି ଦୁଗ୍ଧ ଚାଷୀ ଧବଳେଶ୍ୱର ଦୁଗ୍ଧ ସମବାୟ ସମିତି କାର୍ଯ୍ୟାଳୟ ସମ୍ମୁଖରେ ଆନ୍ଦୋଳନ କରିଥିବା ପ୍ରକାଶ କରିଛନ୍ତି। ଏପରି କି ସଭାପତି ହେମସାଗର ପୂଝାରୀଙ୍କୁ ବିରୋଧ କରି ତାଙ୍କ କୁଶପୁତ୍ତଳିକା ଦାହ କରିଛନ୍ତି।
ଏ ନେଇ ପୂର୍ବତନ ସଭାପତି ହେମସାଗରଙ୍କୁ ପଚାରିବାରୁ ନିଜ ଇଚ୍ଛା ଅନୁଯାୟୀ ଭୋଟ ଦେଇଥିବା ପ୍ରକାଶ କରିଥିଲେ। ଆନ୍ଦୋଳନରେ ବେଲଖଣ୍ଡି ଦୁଗ୍ଧ ସମବାୟ ସମିତିର ସଭାପତି ଜୋତିଶ ସାହୁ, ଶାନନ୍ଦ ସାହୁ, ବିର ପ୍ରସାଦ ସାହୁଙ୍କ ସହ ସମିତିର ସଭ୍ୟ ଓ ସଭ୍ୟା ଉପସ୍ଥିତ ଥିଲେ।