ଭୋପାଳ,୭।୯: ଅଧିକାଂଶ ଲୋକ ନିଜ ଘରେ ସବୁଜ ଭେଣ୍ଡି ଖାଆନ୍ତି। କିନ୍ତୁ ଲାଲ ରଙ୍ଗର ଭେଣ୍ଡି ଦେଖିବା ଏବଂ ଶୁଣିବା ପାଇଁ ଅଦ୍ଭୁତ ଶବ୍ଦ ହୋଇପାରେ, କିନ୍ତୁ ଏହା ଖାଇବାକୁ ଯେମିତି ସ୍ବାଦିଷ୍ଟ ଏବଂ ଶରୀର ପାଇଁ ମଧ୍ୟ ସେତିକି ପୁଷ୍ଟିକର। ଭୋପାଳର ଖଜୁରିକଲା ଗ୍ରାମରେ ଚାଷ କରାଯାଉଥିବା ଲାଲ ଭେଣ୍ଡିକୁ ନେଇ ଏବେ ବେଶ୍ ଚର୍ଚ୍ଚା। ଏହି ଲାଲ ଭେଣ୍ଡି କିଲୋ ୮୦୦ ଟଙ୍କା। ଏହାକୁ ଚାଷ କରୁଥିବା କୃଷକ ମିଶ୍ରିଲାଲ ରାଜପୁତ କିଛି ସମୟ ପୂର୍ବରୁ ବନାରସରେ ଥିବା ଇଣ୍ଡିଆନ ଇନଷ୍ଟିଚ୍ୟୁଟ ଅଫ ଭେଜିଟେବୁଲ୍ସ ରିସର୍ଚ୍ଚ କେନ୍ଦ୍ରକୁ ଯାଇଥିଲେ। ଏହି ସମୟ ମଧ୍ୟରେ ସେ ଲାଲ ଭେଣ୍ଡି ବିଷୟରେ ଜାଣିବାକୁ ପାଇଲେ ଏବଂ ସେ ନିଜ କ୍ଷେତ୍ରରେ ଲାଲ ଭେଣ୍ଡି ମଞ୍ଜି ଆଣି ଚାଷ ମଧ୍ୟ କଲେ। ଯଦିଓ ଲାଲ ଭେଣ୍ଡି ଇଉରୋପୀୟ ଦେଶଗୁଡିକର ଫସଲ, କିନ୍ତୁ ଏବେ ଏହା ଭାରତରେ ମଧ୍ୟ ଏହାର ଚାଷ ବୃଦ୍ଧି ପାଇବାରେ ଲାଗିଛି।
ଭାରତୀୟ ପନିପରିବା ଅନୁସନ୍ଧାନ ପ୍ରତିଷ୍ଠାନ ଏହାର ଦେଶୀ କିଷମ କାଶୀ ଲାଲିମା ପ୍ରସ୍ତୁତ କରିଛି। ଏହି କିଷମ ସହଜରେ ପ୍ରସ୍ତୁତ ହୋଇ ନ ଥିଲା, ଏହାକୁ ପ୍ରସ୍ତୁତ କରିବାକୁ ୮ ରୁ ୧୦ ବର୍ଷ ସମୟ ଲାଗିଥିଲା । ଭୋପାଳ କୃଷକ ମିଶ୍ର୍ରିଲାଲ ବାରାଣାସୀରୁ ୧ କିଲୋଗ୍ରାମ ଲାଲ ଭେଣ୍ଡି ମଞ୍ଜି ୨୪୦୦ ଟଙ୍କାରେ ଆଣିଥିଲେ ଏବଂ ସେ ଚଳିତ ବର୍ଷ ଜୁଲାଇ ପ୍ରଥମ ସପ୍ତାହରେ ଏହି ମଞ୍ଜି ବୁଣିଥିଲେ। ଭେଣ୍ଡି ଫଳିବା ଦେଖି ଲୋକେ ଆଶ୍ଚର୍ଯ୍ୟ େoହାଇଯାଇଥିଲେ। କାରଣ ଏଠାକାର ଲୋକମାନେ ପ୍ରଥମ ଥର ପାଇଁ ଲାଲ ଭେଣ୍ଡି ଦେଖିଥିଲେ।
ସୂଚନାଯୋଗ୍ୟ, ସବୁଜ ଭେଣ୍ଡି ତୁଳନାରେ ଏହି ଲାଲ ଭେଣ୍ଡି ଫସଲ ୪୫ ରୁ ୫୦ ଦିନ ମଧ୍ୟରେ ପ୍ରସ୍ତୁତ ହୋଇଥାଏ। ଗୋଟିଏ ଗଛରେ ପ୍ରାୟ ୫୦ଟି ଲାଲ ଭେଣ୍ଡି ଉତ୍ପାଦନ କରାଯାଇପାରିବ। ଗୋଟିଏ ଏକର ଜମି ୪୦ରୁ ୫୦ କ୍ୱିଣ୍ଟାଲ ଲାଲ ଭେଣ୍ଡି ଉତ୍ପାଦନ କରିହେବ। ଯଦି ପାଗ ଭଲ, ତେବେ ଏହି ଉତ୍ପାଦନ ୮୦ କ୍ୱିଣ୍ଟାଲକୁ ବୃଦ୍ଧି ପାଇପାରେ। ସାଧାରଣ ବଜାରରେ ସେ ଏହି ଲାଲ ଭେଣ୍ଡି ବିକ୍ରୟ କରିବେ ନାହିଁ ବୋଲି ମିଶ୍ରିଲାଲ ରାଜପୁତ କହିଛନ୍ତି। ସ୍ବାସ୍ଥ୍ୟ ଦୃଷ୍ଟିରୁ ଏହି ଲାଲ ଭେଣ୍ଡି ଅତ୍ୟନ୍ତ ଲାଭଦାୟକ, ତେଣୁ ବଡ ମଲ ଏବଂ ଦୋକାନ ବଜାରରେ ବିକ୍ରି ହେବ। ସେ କହିଛନ୍ତି ଯେ, ବଜାରରେ ଏହାର ମୂଲ୍ୟ ଅଧକିଲୋ ପିଛା ୩୫୦ରୁ ୪୦୦ ଟଙ୍କା ରହିଛି। ଲାଲ ଭେଣ୍ଡିି କିଲୋପିଛା ୮୦୦ ଟଙ୍କାରେ ବିକ୍ରି ହେଉଛି।
ଏହି ଫସଲ ବିଷୟରେ ସର୍ବୋତ୍ତମ କଥା ହେଉଛି ଏଥିରେ ମଶା କିମ୍ବା ଅନ୍ୟ କୀଟପତଙ୍ଗ ଲାଗେ ନାହିଁ, କାରଣ ଏହାର ରଙ୍ଗ ଲାଲ ଅଟେ। ସବୁଜ ପନିପରିବାରେ କ୍ଲୋରୋଫିଲ ମିଳିଥାଏ, ଯାହା କୀଟପତଙ୍ଗ ପସନ୍ଦ କରନ୍ତି । ଏହି କାରଣ ହେଉଛି ଏହି ଲାଲ ଭେଣ୍ଡିରେ କୀଟନାଶକ ନାହିଁ। ଦ୍ୱିତୀୟ ବୈଶିଷ୍ଟ୍ୟ ହେଉଛି ଏଥିରେ ଆଣ୍ଟୋସିୟାନିନ ନାମକ ଏକ ସ୍ବତନ୍ତ୍ର ଉପାଦାନ ଅଛି, ଯାହା ଗର୍ଭବତୀ ମହିଳା ଏବଂ ପିଲାମାନଙ୍କର ମାନସିକ ବିକାଶ ପାଇଁ ଉପଯୋଗୀ । କେବଳ ଏତିକି ନୁହେଁ, ଲାଲ ଭେଣ୍ଡି ଦ୍ୱାରା ହୃଦରୋଗ, ମଧୁମେହ ଏବଂ କୋଲେଷ୍ଟ୍ରଲ୍ର ସମସ୍ୟା ମଧ୍ୟ କମିଯାଏ।