ଦାରିଙ୍ଗବାଡ଼ି,୧୩ା୫(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ିର ମୁକଚେରୀଠାରେ ଏକ ସଡ଼କ ଦୁର୍ଘଟଣାରେ କନ୍ଧମାଳ ଏମ୍ପି ଅଚ୍ୟୁତ ସାମନ୍ତଙ୍କ ସ୍ଥାନୀୟ ପ୍ରତିନିଧି କ୍ଷେତ୍ରୀବଳ ନାୟକଙ୍କ ପ୍ରାଣହାନି ଘଟିଛି। ବ୍ରହ୍ମପୁର ବଡ଼ମେଡିକଲରେ ମୃତ୍ୟୁ ହୋଇଥିବା ତାଙ୍କ ସମ୍ପର୍କୀୟଙ୍କ ଠାରୁ ଜଣାପଡ଼ିଛି।
ପ୍ରକାଶଯେ, ମୃତ କ୍ଷେତ୍ରୀବଳ ଗୁରୁବାର ସନ୍ଧ୍ୟାରେ ନିଜ ଗ୍ରାମ ପାଙ୍ଗାଲିଠାରୁ ଦାରିଙ୍ଗବାଡ଼ି ବଜାରକୁ ବାଇକ୍ ଯୋଗେ ଆସି ବିଳମ୍ବିତ ରାତିରେ ଘରକୁ ଫେରୁଥିଲେ। ତେବେ ମୁକଚେରୀ ନିକଟରେ ଏକ ଛେଳିକୁ କ୍ଷେତ୍ରୀବଳଙ୍କ ବାଇକ ଧକ୍କ୍ା ହୋଇଥିଲା। ଫଳରେ ଘଟଣାସ୍ଥଳରେ ଛେଳିଟିର ମୃତ୍ୟୁ ହୋଇଥିବା ବେଳେ ସ୍ଥାନୀୟ ଲୋକେ ଗୁରୁତର ଅବସ୍ଥାରେ କ୍ଷେତ୍ରୀବଳଙ୍କୁ ଉଦ୍ଧାର କରି ଦାରିଙ୍ଗବାଡ଼ି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ତାଙ୍କ ଅବସ୍ଥା ସଙ୍କଟାପର୍ଣ୍ଣ ହେବାରୁ ଡାକ୍ତର ତାଙ୍କୁ ଅନ୍ୟତ୍ର ନେବାକୁ ପରିବାର ଲୋକଙ୍କୁ ପରାମର୍ଶ ଦେଇଥିଲେ। ତାଙ୍କ ପରିବାର ଲୋକ ବ୍ରହ୍ମପୁର ବଡ଼ମେଡିକଲକୁ ଚିକିତ୍ସା ପାଇଁ ନେଇଥିଲେ ସେଠାରେ ତାଙ୍କର ମୃତ୍ୟୁ ଘଟିଥିଲା। ମୃତ କ୍ଷେତ୍ରୀବଳ କନ୍ଧମାଳ ଏମ୍ପିଙ୍କ ପ୍ରତିନିଧି ରହିଥିବା ବେଳେ ସ୍ଥାନୀୟ ବ୍ଳକର ଟ୍ରାକ୍ଟର ମାଲିକ ସଂଘର ବ୍ଲକ ସଭାପତି ରହିଛନ୍ତି। ସେ କିଛି ବର୍ଷ ହେବ ସକ୍ରିୟ ରାଜନୀତିକୁ ଓହ୍ଳାଇଥିବା ଜଣାପଡ଼ିଛି।
ସୂଚନାଯୋଗ୍ୟ, କ୍ଷେତ୍ରୀବଳଙ୍କ ୬ଝିଅ ରହିଥିବା ବେଳେ ଦୁଇ ଝିଅ ପାଠପଢ଼ୁଥିବା ଜଣାପଡ଼ିଛି।