ନୂଆଦିଲ୍ଲୀ: ନାଇକ୍ ସ୍ଥାନରେ ଫାଣ୍ଟାସି ଗେମିଂ ପ୍ଲାଟ୍ଫର୍ମ ମୋବାଇଲ ପ୍ରିମିୟର ଲିଗ୍ର ଏକ ସହାୟକ ସଂସ୍ଥା ‘ଏମ୍ପିଏଲ୍ ସ୍ପୋଟର୍ସ ଆପାରେଲ ଆଣ୍ଡ୍ ଆସେସୋରିଜ’ ୩ବର୍ଷ ପାଇଁ ଭାରତୀୟ କ୍ରିକେଟ ଦଳର ନୂଆ କିଟ୍ ପ୍ରାୟୋଜକ ହୋଇଛି। ଆପେକ୍ସ କାଉନ୍ସିଲର ଜଣେ ସଦସ୍ୟ ସୋମବାର ଏହା ସ୍ପଷ୍ଟ କରିଛନ୍ତି। ଆପେକ୍ସ କାଉନ୍ସିଲ ନୂଆ ଚୁକ୍ତିକୁ ମଞ୍ଜୁରୀ ଦେଇଛି। ଏମ୍ପିଏଲ୍ ଭାରତୀୟ ପୁରୁଷ, ମହିଳା, ‘ଏ’ ଓ ୧୯ ବର୍ଷରୁ କମ୍ ଦଳକୁ କିଟ୍ ଯୋଗାଇ ଦେବ। କିଟ୍ ବାବଦରେ ନାଇକ୍ର ମ୍ୟାଚ୍ ପିଛା ମୂଲ୍ୟ ୮୮ଲକ୍ଷ ଥିବାବେଳେ ଏମ୍ପିଏଲ୍ର ୬୫ ଲକ୍ଷ ଟଙ୍କା ରହିଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଆହୁରି ମଧ୍ୟ ରୟାଲଟି ବାବଦରେ ୧୦ ପ୍ରତିଶତ ପାଇବ। ପୋଷାକପତ୍ର ସ୍ପନସରଶିପ୍ ପାଇଁ ପୁମା ଓ ଆଡିଡାସ ମଧ୍ୟ ବିଡ୍ ପେପର ନେଇଥିଲେ। କିନ୍ତୁ ସେମାନେ ବିଫଳ ହୋଇଥିଲେ। ପୂର୍ବରୁ ନାଇକ୍ ୨୦୧୬ରୁ ୨୦୨୦ ପର୍ଯ୍ୟନ୍ତ ୫ ବର୍ଷ ପାଇଁ ଚୁକ୍ତି କରିଥିଲା। ଏବାବଦରେ କମ୍ପାନୀକୁ ୩୭୦ କୋଟି ଟଙ୍କା ଦେବାକୁ ପଡ଼ିଥିଲା। ରୟାଲଟି ବାବଦରେ ୩୦କୋଟି ଦେଇଥିଲା।ଏମ୍ପିଏଲ୍ ବର୍ତ୍ତମାନ ଦୁଇ ଆଇପିଏଲ୍ ଫ୍ରାଞ୍ଚାଇଜ୍ (କେକେଆର ଓ ଆରସିବି), ସିପିଏଲ୍ର ଏକ ଫ୍ରାଞ୍ଚାଇଜ୍ ଟିକେଆର୍ ଏବଂ ଆୟର୍ଲାଣ୍ଡ ଓ ୟୁଏଇ କ୍ରିକେଟ ବୋର୍ଡ ସହିତ ସଂଶ୍ଳିଷ୍ଟ ରହିଛି। ସୂଚନାଯୋଗ୍ୟ, କୋଭିଡ୍ ଯୋଗୁ ବର୍ତ୍ତମାନ ଆର୍ଥତ୍କ ପରିସ୍ଥିତି ଯାହା କୌଣସି ପ୍ରମୁଖ କମ୍ପାନୀ ନାଇକ୍ ଯାହା ଦେଉଥିଲା ସେତେ ଦେବାକୁ ଚାହିଁ ନ ଥିଲେ।