ନୂଆଦିଲ୍ଲୀ: ବିଶ୍ୱର ୧୫ରୁ ଅଧିକ ଦେଶରେ ଏବେ ମାରାତ୍ମକ ‘ଓମିକ୍ରନ’ ଭାରିଏଣ୍ଟ ବ୍ୟାପି ଗଲାଣି। ବିଭିନ୍ନ ଦେଶରୁ ବିମାନ ଭାରତକୁ ଆସୁଛି। ଡିସେମ୍ବର ୧୫ରୁ ମଧ୍ୟ ନିୟମିତ ଅନ୍ତର୍ଜାତୀୟ ବିମାନ ସେବା ଆରମ୍ଭ ହେବାକୁ ଯାଉଛି। ତେଣୁ ଭାରତରେ ‘ଓମିକ୍ରନ’ ଭାଇରସ ପ୍ରବେଶ କରିବାର ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ତୁରନ୍ତ ଅନ୍ତର୍ଜାତୀୟ ବିମାନ ସେବା ଉପରେ କଟକଣା ଲଗାଇବାକୁ କେନ୍ଦ୍ର ସରକାର ପାଖରେ ଦାବି କରିଛନ୍ତି।
ଅଧିକାଂଶ ଅନ୍ତର୍ଜାତୀୟ ବିମାନ ଦିଲ୍ଲୀରେ ଅବତରଣ କରୁଛି। ଏଥିପାଇଁ ଦିଲ୍ଲୀ ଅଧିକ ପ୍ରଭାବିତ ହେଉଛି ବୋଲି କେଜ୍ରିଓ୍ବାଲ କହିଛନ୍ତି।
ଆଫ୍ରିକା ସମେତ ୟୁରୋପରେ ‘ଓମିକ୍ରନ’ ଭାରିଏଣ୍ଟ ଏବେ ଚିନ୍ତା ସୃଷ୍ଟି କରୁଛି। ଭାରତରେ ଏଯାଏ ‘ଓମିକ୍ରନ’ ଭାରିଏଣ୍ଟ ଚିହ୍ନଟ ହୋଇନାହିଁ। କିନ୍ତୁ ବିଦେଶରୁ ଲୋକମାନେ ଫେରୁଥିବାରୁ ଭାରତରେ ଏହା କୌଣସି ମୁହୂର୍ତ୍ତରେ ପହଞ୍ଚି ଯିବାର ଆଶଙ୍କା ରହିଛି। ସେଥିପାଇଁ ବୈଠକ କରାଯାଉଛି। କେନ୍ଦ୍ର ସରକାର ବିଦେଶ ଫେରନ୍ତାଙ୍କ ଉପରେ ନଜର ରଖିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି।
