ମୁମ୍ବାଇ: ବଲିଉଡ ଅଭିନେତ୍ରୀ ରାଣୀ ମୁଖାର୍ଜୀଙ୍କ ଅପକମିଂ ମୁଭି ‘ମିସେସ ଚାଟାର୍ଜୀ ଭର୍ସେସ ନରୱେ’ର ପ୍ରଥମ ଟ୍ରେଲର ରିଲିଜ୍ ହୋଇଛି । ଟ୍ରେଲର ଖୁବ୍ ଦମଦାର ଲାଗୁଥିବା ବେଳେ ଏଥିରେ ରାଣୀଙ୍କ ଶାନଦାର ପରଫରମାନ୍ସ ନଜର ଆସୁଛି । ଫିଲ୍ମଟି ନରୱେରେ ରହୁଥିବା ଜଣେ ବଙ୍ଗାଳି ମହିଳାଙ୍କ କାହାଣୀ ଉପରେ ଆଧାରିତ, ଯେକି ତାଙ୍କ ସ୍ୱାମୀ ଓ ଦୁଇ ପିଲାଙ୍କ ସହ ନରୱେରେ ରହୁଛନ୍ତି ।
ସେଠାରେ ଥିବା ବାଲ ସୁରକ୍ଷା ସେବା ଦ୍ୱାରା ରାଣୀଙ୍କ ପିଲାଙ୍କୁ ତାଙ୍କଠାରୁ ଛଡାଇ ନିଆଯାଉଛି । ଟ୍ରେଲର ଆରମ୍ଭରେ ମିସେସ ଚାଟାର୍ଜୀ ନରୱେରେ ନୂଆ ଜୀବନର ଠିକ୍ ଚିତ୍ର ଦେଖାଇବାରୁ ଆରମ୍ଭ ହେଉଛି । ନରୱେରେ ନୂଆ ଜୀବନ ଆରମ୍ଭ କରିବାକୁ ମିସେସ ଚାଟାର୍ଜୀ ସ୍ୱାମୀଙ୍କ ସହ ଦେଶ ଛାଡି ଚାଲିଯାଇଛନ୍ତି । ସେ ତାଙ୍କର ଦୁଇଟି ପିଲା ଶୁଭ ଓ ସୂଚିକୁ ବହୁତ ଭଲପାଆନ୍ତି । ହେଲେ ଗୋଟିଏ ଦିନ ୨ ଜଣ ମହିଳା ତାଙ୍କ ପିଲାଙ୍କୁ ତାଙ୍କଠାରୁ ଛଡାଇ ନେଇଯାଉଛନ୍ତି । ପରେ ଜଣାପଡିଛି କି ଚାଟାର୍ଜୀ ତାଙ୍କ ପିଲାଙ୍କ ଦେଖାଶୁଣା ଠିକ୍ ଭାବେ କରି ନ ପାରିବାରୁ ସେମାନଙ୍କୁ ତାଙ୍କ ମାତାପିତାଙ୍କ ନିକଟରୁ ଛଡାଇ ନିଆଯାଉଛି ।
ସୂଚନାଯୋଗ୍ୟ, ନରୱେ ଓ ଭାରତ ସାସ୍କୃତିକ ପରମ୍ପରା ଅନୁଯାୟୀ ଅନେକାଂଶରେ ଭିନ୍ନ । ଉଭୟଙ୍କ ଜବୀନ ଶୈଳି ବି ଅଲଗା । ତେଣୁ ମିସେସ ଚାଟାର୍ଜୀ ତାଙ୍କ ପିଲାମାନଙ୍କୁ ଯେମିତି ଲାଳନ ପାଳନ କରୁଛନ୍ତି, ତାହାକୁ ନରୱେରେ ଭୁଲ ବୋଲି କୁହାଯାଉଛି । ଯେମିତିକି ମିସେସ ଚାଟାର୍ଜୀ ପିଲାମାନଙ୍କୁ ହାତରେ ଖୁଆଇ ଦେବା, ଗୋଟିଏ ବିଛଣାରେ ପିଲାମାନଙ୍କ ସହ ଶୋଇବା, ପିଲାଙ୍କୁ କଳା ଟିକା ଲଗାଇବା ଇତ୍ୟାଦି । ନରୱେବାସୀଙ୍କ ମତରେ ପିଲାଙ୍କୁ ମାଆଠାରୁ ଅଲଗା କରିବାକୁ ଏମିତି କରାଯାଇଥାଏ । ଏଥିରେ କିନ୍ତୁ ମିସେସ ଚାଟାର୍ଜୀ ହାର ମାନି ନାହାନ୍ତି । ସେ ତାଙ୍କ ସ୍ୱାମୀଙ୍କ ସମର୍ଥନ ସହ ହେଉ ଅବା ଏକେଲା ପିଲାମାନଙ୍କ ପାଇଁ ଲଢିବାକୁ ନରୱେ ଓ ଭାରତର ଅଦାଲତରେ ପହଞ୍ଚିଛନ୍ତି ।
ଆଶିମା ଚିବ୍ୱରଙ୍କ ଦ୍ୱାରା ନିର୍ଦ୍ଦେଶିତ ମୁଭି ‘ ମିସେସ ଚାଟାର୍ଜୀ ଭର୍ସେସ ନରୱେ’ ଏକ ସତ ଘଟଣା ଉପରେ ଆଧାରିତ । ଫିଲ୍ମଟି ପ୍ରଥମେ ୩ ମାର୍ଚ୍ଚରେ ରିଲିଜ୍ ହେବାକୁ ଘୋଷଣା କରାଯାଇଥିବା ବେଳେ ପରେ କିନ୍ତୁ ଏହା ୨୧ ମାର୍ଚ୍ଚ ୨୦୨୩ରେ ରିଲିଜ୍ ହେବ ବୋଲି ଘୋଷଣା କରାଯାଇଛି ।