ନୂଆଦିଲ୍ଲୀ,୨।୮(ପି.ଟି.): ଚଳିତ ବର୍ଷର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ମହେନ୍ଦ୍ର ସିଂ ଧୋନୀଙ୍କ ପାଇଁ ଚୟନର ମାପକାଠି ହୋଇପାରିବ ନାହିଁ ବୋଲି ପୂର୍ବତନ ଦ୍ରୁତ ବୋଲର ଆଶିଷ ନେହେରା କହିଛନ୍ତି। ଧୋନୀ ଟେଷ୍ଟରୁ ଅବସର ନେଇ ସାରିଛନ୍ତି ଓ ସେ ଗତବର୍ଷ ଅନୁଷ୍ଠିତ ହୋଇଥିବା ବିଶ୍ୱକପ୍ ପରେ କୌଣସି ସୀମିତ ଓଭର ମ୍ୟାଚ୍ ଖେଳିନାହାନ୍ତି। ଏବେ ତାଙ୍କ ପ୍ରତ୍ୟାବର୍ତ୍ତନ ଓ ଅବସର ନେଇ ଚର୍ଚ୍ଚା ଚାଲିଛି।
ଆସନ୍ତା ସେପ୍ଟେମ୍ବର ୧୯ ତାରିଖରୁ ୟୁନାଇଟେଡ ଆରବ ଏମିରେଟ୍ସ (ୟୁଏଇ) ଆରମ୍ଭ ହେବାକୁ ଯାଉଥିବା ଆଇପିଏଲ୍ ଖେଳି ଧୋନୀ ଜାତୀୟ ଦଳକୁ ପ୍ରତ୍ୟାବର୍ତ୍ତନ କରିବେ ବୋଲି ଅନୁମାନ କରାଯାଉଛି। ତେବେ ଏହା ତାଙ୍କ ପ୍ରତ୍ୟାବର୍ତ୍ତନ ସହିତ କୌଣସି ସମ୍ପର୍କ ରଖେ ନାହିଁ ବୋଲି ନେହେରା ସ୍ପଷ୍ଟ କରିଛନ୍ତି। କିଭଳି ନେତୃତ୍ୱ ନେବାକୁ ହୁଏ ଓ ଯୁବ ଖେଳାଳିଙ୍କୁ କିପରି ଆଗକୁ ଛାଡିବାକୁ ହୁଏ ତାହା ଧୋନୀ ଭଲ ଭାବେ ଜାଣନ୍ତି। ତାଙ୍କ ପାଖରେ ଏବେ ବି କ୍ରିକେଟ ବାକି ରହିଛି। ଯଦି ଜଣେ ଅଧିନାୟକ, କୋଚ୍, ଚୟନକର୍ତ୍ତା ଚାହିଁବେ ତା’ହେଲେ ଧୋନୀଙ୍କୁ ପ୍ରଥମେ ଚୟନ କରିବେ। ଯଦି ଚାହିଁବେ ଧୋନୀ ଦଳରେ ସାମିଲ ହୋଇ ପାରିବେ। ତେଣୁ ଆଇପିଏଲ ପ୍ରଦର୍ଶନ ତାଙ୍କ ଚୟନର ମାପକାଠି ହୋଇପାରିବ ନାହିଁ ଓ ଏହା ସହିତ ତାଙ୍କ ଚୟନର କୌଣସି ଯାଏଆସ୍ ନାହିଁ ବୋଲି ନେହେରା କହିଛନ୍ତି।