ନୂଆଦିଲ୍ଲୀ,୧୪।୧୧: ଅନ୍ତର୍ଜାତୀୟ କ୍ରିକେଟରୁ ସନ୍ୟାସ ନେବା ପରେ କେବଳ ଆଇପିଏଲ୍ ସହ ଜଡ଼ିତ ରହିବେ ଭାରତୀୟ କ୍ରିକେଟ ଟିମ୍ର ପୂର୍ବ ଅଧିନାୟକ ମହେନ୍ଦ୍ର ସିଂହ ଧୋନୀ। ଚଳିତ ବର୍ଷର ଆଇପିଏଲ୍ ଧୋନୀଙ୍କ କ୍ୟାରିୟରର ଶେଷ ଟୁର୍ନାମେଣ୍ଟ ବୋଲି ଚର୍ଚ୍ଚା ହୋଇଥିଲା। ହେଲେ ଶେଷ ଲିଗ୍ ମ୍ୟାଚ୍ରେ ପଚରାଯାଇଥିବା ଏକ ପ୍ରଶ୍ନର ଜବାବରେ ଧୋନୀ ‘ବିଲକୁଲ୍ ନୁହେଁ’ବୋଲି କହିଥିଲେ। ଏଣୁ ୨୦୨୧ରେ ମାହିଙ୍କୁ ପୁଣି ଦେଖିବାକୁ ମିଳିବ ବୋଲି ସ୍ପଷ୍ଟ ହୋଇଥିଲା। ହେଲେ ପୂର୍ବ ଭାରତୀୟ କୋଚ୍ ସଞ୍ଜୟ ବାଙ୍ଗର ଧୋନୀଙ୍କୁ ନେଇ ବଡ଼ ବୟାନ ଦେଇଛନ୍ତି। ଆସନ୍ତା ଆଇପିଏଲ୍ରେ ଧୋନୀ ସିଏସ୍କେ ଅଧିନାୟକ ହେବେ ନାହିଁ ବରଂ ଫାଫ୍ ଡୁ ପ୍ଲେସିସ ହେବେ ବୋଲି ସେ କହିଛନ୍ତି।
ଷ୍ଟାର ସ୍ପୋଟ୍ସର ଶୋ’ କ୍ରିକେଟ୍ କନେକ୍ଟେଡ୍ରେ ସଞ୍ଜୟ କହିଛନ୍ତି, ୨୦୧୧ ପରେ ଭାରତୀୟ ଟିମ୍ର ନେତୃତ୍ୱ ଜାରି ରଖିବା ଆବଶ୍ୟକ ବୋଲି ଧୋନୀ ଭାବିଥିଲେ। ଭାରତ ଇଂଲଣ୍ଡ ଏବଂ ଅଷ୍ଟ୍ରେଲିୟା ବିପକ୍ଷରେ ଖେଳିବାକୁ ଥିଲା। ସେତେବେଳେ ଅନ୍ୟ କେହି ଦାବିଦାର ପ୍ରସ୍ତୁତ ନ ଥିଲେ। ଫଳରେ ଧୋନୀ ଏକୁଟିଆ ଅଧିନାୟକ ପଦ ସମ୍ଭାଳିଥିଲେ। ଠିକ୍ ସମୟରେ ବିରାଟ କୋହଲିଙ୍କୁ ଦାୟିତ୍ୱ ହସ୍ତାନ୍ତର କରି ଖେଳିବା ଜାରି ରଖିଥିଲେ। ଏଣୁ ଧୋନୀ ଆସନ୍ତା ବର୍ଷ ଚେନ୍ନାଇ ସୁପରକିଙ୍ଗ୍ସର ଅଧିନାୟକ ହେବେ ନାହିଁ। ମାତ୍ର ସେ ଖେଳାଳି ଭାବେ ଖେଳିବେ ବୋଲି ଲାଗୁଛି। ତାଙ୍କ ସ୍ଥାନରେ ଦାୟିତ୍ୱ ସମ୍ଭାଳିବାକୁ ଫାଫ୍ଙ୍କୁ ସେ ବାଛି ପାରନ୍ତି। ଏହାଦ୍ୱାରା ପରିବର୍ତ୍ତନ ହେବ ବୋଲି ସେ କହିଛନ୍ତି।
