ମୁମ୍ବାଇ,୨୦।୪ : ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ କ୍ୟାରିୟରରେ ସୋମବାର ଯୋଡ଼ି ହୋଇଛି ଆଉ ଏକ ସଫଳତା। ଓ୍ବାଙ୍ଖଡେ ଷ୍ଟାଡିୟମରେ ରାଜସ୍ଥାନ ରୟାଲ୍ସ ବିପକ୍ଷ ମ୍ୟାଚ୍ରେ ଅଧିନାୟକ ଭାବେ ଧୋନୀ ଚେନ୍ନାଇ ସୁପର କିଙ୍ଗ୍ସ
(ସିଏସ୍କେ) ପାଇଁ ଖେଳିଛନ୍ତି ୨୦୦ତମ ମ୍ୟାଚ୍।
ଆଇପିଏଲ ଓ ଚାମ୍ପିୟନ୍ସ ଲିଗ୍ ଟି୨୦କୁ ମିଶାଇ ମୋଟ ଉପରେ ବିଶ୍ୱର ଲୋକପ୍ରିୟ ଟୁର୍ନାମେଣ୍ଟରେ ୨୦୭ ମ୍ୟାଚ୍ ଖେଳିଛନ୍ତି ଧୋନୀ। ସିଏସ୍କେ ବ୍ୟତୀତ ଧୋନୀ ରାଇଜିଂ ପୁଣେ ସୁପରଜ୍ୟାଣ୍ଟସ (ଆରପିଏସ୍) ପାଇଁ ମଧ୍ୟ ଖେଳିଥିଲେ। ଏହି ଦଳ ପକ୍ଷରୁ ୩୦ ଥର ପ୍ରତିନିଧିତ୍ୱ କରିଥିଲେ କ୍ରିକେଟ ଇତିହାସର ଏହି ମହାନ ଅଧିନାୟକ। ତାଙ୍କ ନେତୃତ୍ୱରେ ଚେନ୍ନାଇ ୩ ଥର ଆଇପିଏଲ ଚାମ୍ପିୟନ ଆଖ୍ୟା ପାଇଥିବାବେଳେ ସର୍ବାଧିକ ୮ ଥର ଫାଇନାଲ ଖେଳିଛି।