ଆବୁଧାବି,୨୫।୯: ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ର ୩୫ତମ ମ୍ୟାଚ୍ରେ ଚେନ୍ନାଇ ସୁପରକିଙ୍ଗ୍ସ ୬ ଉଇକେଟରେ ରୟାଲ ଚାଲେଞ୍ଜର୍ସ ବାଙ୍ଗାଲୋର(ଆର୍ସିବି)କୁ ପରାସ୍ତ କରିଛି। ବିରାଟ ସେନା ଟସ୍ ହାରିବା ପରେ ପ୍ରଥମେ ବ୍ୟାଟିଂ କରି ୬ ଉଇକେଟରେ ୧୫୬ରନ୍ କରିଥିଲା। ଜବାବରେ ଚେନ୍ନାଇ ୪ ଉଇକେଟରେ ମ୍ୟାଚ୍ ଜିତି ନେଇଥିଲା। ତେବେ ବିରାଟ କୋହଲି(୫୩) ଏବଂ ଦେବଦତ୍ତ ପଡିକାଲ(୭୦) ପ୍ରଥମ ଉଇକେଟ ପାଇଁ ୧୧୧ ରନ୍ର ଭାଗିଦାରୀ କରି ଆର୍ସିବିକୁ ଭଲ ଆରମ୍ଭ ଦେଇଥିଲେ। ହେଲେ ଦଳ ବଡ଼ ସ୍କୋର କରିପାରି ନ ଥିଲା। ଏହା ପଛରେ ଚେନ୍ନାଇର ଅଲରାଉଣ୍ଡର ଡ୍ବେନ ବ୍ରାଭୋ ପ୍ରମୁଖ ଭୂମିକା ତୁଲାଇଥିଲେ। ସେ ୪ ଓଭରରେ ମାତ୍ର ୨୪ ରନ୍ ଦେଇ ୩ ଉଇକେଟ ନେଇଥିଲେ।
ବ୍ରାଭୋ ୧୪ତମ ଓଭରରେ କୋହଲି ଏବଂ ପଡ଼ିକାଲଙ୍କ ଯୋଡ଼ିକୁ ଭାଙ୍ଗିଥିଲେ। ପରେ ୧୮ ଏବଂ ୨୦ତମ ଓଭରରେ ଆର୍ସିବିକୁ ରନ୍ କରିବାକୁ ଦେଇ ନ ଥିଲେ। ଏହି ସମୟରେ ସେ ଗ୍ଲେନ ମାକ୍ସଓ୍ବେଲଙ୍କ ଉଇକେଟ ନେଇ ଆର୍ସିବିକୁ ଅଡୁଆରେ ପକାଇଥିଲେ। ହର୍ଷଲ ପଟେଲ ମଧ୍ୟ ୩ ରନ୍ କରି ବ୍ରାଭୋଙ୍କ ଶିକାର ହୋଇଥିଲେ। ଏଭଳି ବୋଲିଂକୁ ନେଇ ଅଲ୍ରାଉଣ୍ଡର ଧୋନୀ ବହୁତ ଖୁସି ଥିବା ବେଳେ ବ୍ରାଭୋଙ୍କ ପ୍ରଶଂସା କରିଥିଲେ। ଏଥିସହ ବ୍ରାଭୋଙ୍କ ସହ ତାଙ୍କର ଝଗଡ଼ାକୁ ନେଇ ଏକ ମଜାଦାର ଖୁଲାସା କରିଛନ୍ତି।
ଆର୍ସିବି ବିପକ୍ଷରେ ବିଜୟ ପରେ ଧୋନୀ କହିଛନ୍ତି,ମୁଁ ମୋଇନ ଅଲୀଙ୍କୁ ଡ୍ରିକ୍ସ ପରେ ବୋଲିଂ ଦେବି ବୋଲି କହିଥିଲି। ହେଲେ ପରେ ତାଙ୍କୁ ନ ଦେଇ ବ୍ରାଭୋଙ୍କୁ ବୋଲିଂ କରିବି ବୋଲି ଭାବିଥିଲି। କାରଣ ତାଙ୍କୁ ବୋଲିଂ ଦେବାକୁ ବିଳମ୍ବ କଲେ ଅସୁବିଧା ହୋଇଥାଏ। ତାଙ୍କୁ ୪ ଓଭର ବୋଲିଂ କରିବାକୁ ଥିଲା। ବ୍ରାଭୋ ଫିଟ୍ ଅଛନ୍ତି। ଭଲ ଖେଳୁଛନ୍ତି। ମୁଁ ତାଙ୍କୁ ନିଜର ଭାଇ ବୋଲି କୁହେ। ସବୁବେଳେ ତାଙ୍କ ସହ ସ୍ଲୋ ବଲ୍ ଫିଙ୍ଗିବା ଉଚିତ କି ନାହିଁ ତାହାକୁ ନେଇ ଝଗଡ଼ା ହୋଇଥାଏ। ଏବେ କିନ୍ତୁ ତାଙ୍କ ପାଖରେ ସ୍ଲୋ ବଲ୍ ଥିବା ସମସ୍ତେ ଜାଣି ସାରିଲେଣି। ଏଥିପାଇଁ ତାଙ୍କୁ ଗୋଟିଏ ଓଭରରେ ୬ ଭିନ୍ନ ଭିନ୍ନ ବଲ୍ ଫିଙ୍ଗିବାକୁ କହିଥିଲି ବୋଲି ଧୋନୀ କହିଛନ୍ତି।