ନୂଆଦିଲ୍ଲୀ,୧୮।୯: ଶନିବାରଠାରୁ ଆରମ୍ଭ ହେବାକୁ ଯାଉଛି ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ର ୧୩ତମ ସଂସ୍କରଣ। ଟୁର୍ନାମେଣ୍ଟର ପ୍ରଥମ ମ୍ୟାଚ୍ରେ ଚେନ୍ନାଇ ସୁପରକିଙ୍ଗ୍ସ(ସିଏସ୍କେ)ର ମୁକାବିଲା ମୁମ୍ବାଇ ଇଣ୍ଡିଆନ୍ସ(ଏମ୍ଆଇ) ସହ ହେବ। ଦୀର୍ଘ ୧୪ ମାସ ପରେ ଭାରତୀୟ ପୂର୍ବ ଅଧିନାୟକ ମହେନ୍ଦ୍ର ସିଂହ ଧୋନୀ ପଡ଼ିଆକୁ ଓହ୍ଲାଉଥିବାରୁ ସମସ୍ତଙ୍କ ନଜର ଏହି ମୁକାବିଲା ଉପରେ ରହିଛି। ଧୋନୀ ଶେଷଥର ପାଇଁ ୨୦୧୯ ବିଶ୍ୱକପ୍ରେ ନ୍ୟୁଜିଲାଣ୍ଡ ବିପକ୍ଷ ମ୍ୟାଚ୍ ଖେଳିଥିଲେ। ଏହାପରେ ଅଗଷ୍ଟ ମାସରେ ସେ ଅନ୍ତରାଷ୍ଟ୍ରୀୟ କ୍ରିକେଟରୁ ସନ୍ୟାସ ନେଇସାରିଛନ୍ତି।
ଆଇପିଏଲ୍ ପ୍ରଥମ ମ୍ୟାଚ୍ରେ ଧୋନୀ ପଡ଼ିଆକୁ ଓହ୍ଲାଇବା ବେଳେ ତାଙ୍କ ସମ୍ମୁଖରେ ଆର୍ସିବି ଖେଳାଳି ଏବି ଡିଭିଲିୟର୍ସଙ୍କ ରେକର୍ଡ ଭାଙ୍ଗିବାର ସୁଯୋଗ ରହିବ। ଧୋନୀ ଆଇପିଏଲ୍ରେ ସବୁଠାରୁ ଅଧିକ ଛକ୍କା ମାରିଥିବା ଭାରତୀୟ ଖେଳାଳି। ତାଙ୍କ ଆଗରେ ରହିଛନ୍ତି ଓ୍ବେଷ୍ଟଇଣ୍ଡିଜର କ୍ରିସ ଗେଲ ଏବଂ ଡିଭିଲିୟର୍ସ। ଡିଭିଲିୟର୍ସ ଏଯାବତ ୨୧୨ ଛକ୍କା ମାରିଛନ୍ତି। ଅପରପକ୍ଷେ ଧୋନୀ ୨୦୯ ଛକ୍କା ମାରିଛନ୍ତି। ଏଭଳି ସ୍ଥିତିରେ ଏମ୍ଆଇ ବିପକ୍ଷରେ ସେ ଯଦି ଆଉ ୪ଟି ଛକ୍କା ମାରନ୍ତି ତେବେ ଡିଭିଲିୟର୍ସଙ୍କୁ ପଛରେ ପକାଇବେ। ତେବେ କିଙ୍ଗ୍ସ ଇଲେଭେନ୍ ପଞ୍ଜାବ ପାଇଁ ଖେଳୁଥିବା କ୍ରିସ୍ ଗେଲ ଇତିମଧ୍ୟରେ ୩୨୬ ଛକ୍କା ମାରିଥିବା ହେତୁ ଏହାକୁ କାଟିବା କଷ୍ଟସାଧ୍ୟ ହେବ ବୋଲି କୁହାଯାଉଛି।
ଏଯାବତ ଆଇପିଏଲ୍ରେ ଧୋନୀଙ୍କ ଅନ୍ୟାନ୍ୟ ରେକର୍ଡକୁ ଯଦି ଦେଖିବା ତେବେ ସେ ସବୁଠାରୁ ଅଧିକ ମ୍ୟାଚ୍ରେ ଅଧିନାୟକ ହୋଇଥିବା ଖେଳାଳି। ସେ ସିଏସ୍କେ ପାଇଁ ୧୦ ସିଜନ୍ରେ ଏବଂ ରାଇଜିଂ ପୁଣେ ସୁପରଜିଆଣ୍ଟ୍ସ ପାଇଁ ଗୋଟିଏ ସିଜନରେ ମୋଟ ୧୭୪ ମ୍ୟାଚ୍ରେ ଅଧିନାୟକତ୍ୱ କରିଛନ୍ତି।