ନୂଆଦିଲ୍ଲୀ,୨୬।୫: ଆଇପିଏଲ-୧୪’ର ଦ୍ୱିତୀୟାର୍ଦ୍ଧରେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ଅଧିନାୟକ ମହେନ୍ଦ୍ର ସିଂ ଧୋନୀ ଜଣେ ବ୍ୟାଟ୍ସମ୍ୟାନ ଭାବେ ଭଲ ପ୍ରଦର୍ଶନ କରିପାରନ୍ତି। ଏଭଳି ମତ ରଖିଛନ୍ତି ସିଏସ୍କେ ବୋଲର ଦୀପକ ଚହର। ଚଳିତ ବର୍ଷ ଆଇପିଏଲର ୭ ମ୍ୟାଚ୍ ଖେଳିଥିବା ସିଏସ୍କେ ପଏଣ୍ଟ ଟେବୁଲର ଦ୍ୱିତୀୟ ସ୍ଥାନରେ ଥିବାବେଳେ ଧୋନୀ ମାତ୍ର ୩୭ ରନ୍ କରିଛନ୍ତି।
ଜଣେ ବ୍ୟାଟ୍ସମ୍ୟାନଙ୍କ ଲାଗି ୧୫ରୁ ୨୦ ବର୍ଷ ଧରି ସମାନ ପ୍ରଦର୍ଶନ କରିବା ସହଜ ନୁହେଁ। ନିୟମିତ କ୍ରିକେଟ ଖେଳୁ ନ ଥିବା ବ୍ୟାଟ୍ସମ୍ୟାନ ଆଇପିଏଲ ଭଳି ଇଭେଣ୍ଟରେ ଭଲ ପ୍ରଦର୍ଶନ କରିପାରିବେ ନାହିଁ। ଏଥି ଲାଗି ସମୟ ଦରକାର। ଧୋନୀ ସର୍ବଦା ଫିନିଶର ଭାବେ ଖେଳନ୍ତି। ଏଭଳି ପରିସ୍ଥିତିରେ ରନ କରିବା ଆହୁରି କଷ୍ଟକର। ୨୦୧୮ ଓ ୨୦୧୯ ସିଜନରେ ଧୋନୀ ଭାଇ ଧିମା ଆରମ୍ଭ କରିଥିଲେ। କିନ୍ତୁ ଶେଷ ଆଡ଼କୁ ଦେଖାଇଥିଲେ ତାଙ୍କର ବଡ଼ ଶଟ ଖେଳିବାର ଦକ୍ଷତା। ଏଣୁ ଆଇପିଏଲର ଦ୍ୱିତୀୟାର୍ଦ୍ଧରେ ଧୋନୀଙ୍କ ଠାରୁ ଭଲ ପ୍ରଦର୍ଶନ ଦେଖିବାକୁ ମିଳିପାରେ ବୋଲି ଦୀପକ କହିଛନ୍ତି।