ପୁରୀ ଅଫିସ,୨୧ା୫: ପେସାରେ ଜଣେ ଡ୍ରାଇଭର ହେଲେ ମଧ୍ୟ ନିଶା ହେଉଛି ସମାଜକୁ ସଚେତନତା ବାର୍ତ୍ତା ବାଣ୍ଟିବା। ଭାରତର ବିଭିନ୍ନ ରାଜ୍ୟ ବୁଲି କ୍ୟାନ୍ସର ରୋଗ ଉପରେ ସଚେତନତା ବାର୍ତ୍ତା ବାଣ୍ଟିବା ସହ ସବୁ ଧର୍ମକୁ ସମ୍ମାନ ଦେବା ଏବଂ ପରସ୍ପର ମଧ୍ୟରେ ଭାଇଚାରା ସୃଷ୍ଟି କରିବା ହେଉଛି ତାଙ୍କର ମୂଳଲକ୍ଷ୍ୟ। ଯାହାଙ୍କ ନାମରେ ରହିଛି ଉଭୟ ହିନ୍ଦୁ ଏବଂ ମୁସିଲିମ ଧର୍ମର ଦେବତାଙ୍କ ନାମକୁ ନେଇ ସୃଷ୍ଟି କରିଛନ୍ତି ନୂଆ ପରିଚୟ। ବାଲେଶ୍ୱର ଜିଲା ସୋର ଅଞ୍ଚଳ ମୋବାରକପୁର ଗ୍ରାମର ମୁସଲିମ ଯୁବକ ମହମ୍ମଦ କ୍ରିଷ୍ଣା ସମାଜକୁ ସଚେତନତାର ବାର୍ତ୍ତା ପ୍ରଦାନ କରିବା ପାଇଁ ଯାତ୍ରା କରୁଛନ୍ତି। ସୂଚନାଯୋଗ୍ୟ, ଗତ ୨୦୧୩ରୁ ମହମ୍ମଦ ଚେନ୍ନାଇରେ ଜଣେ ଡ୍ରାଇଭର ଭାବେ କାର୍ଯ୍ୟ କରି ଆସୁଛନ୍ତି। ତେବେ ଦିନକୁ ଦିନ ଦେଶରେ କ୍ୟାନ୍ସର ରୋଗ ବଢ଼ି ଚାଲିଥିବା ବେଳେ ଏହା ଉପରେ କିଭଳି ରୋକ୍ ଲଗାଯାଇପାରିବ ସେନେଇ ସେ ଜନସାଧାରଣଙ୍କୁ ସଚେତନ କରାଉଛନ୍ତି। ଏ ନେଇ ସେ ସାରା ଭାରତର ବିଭିନ୍ନ ସ୍ଥାନ ବୁଲି ହାତରେ ପୋଷ୍ଟର ଧରି କ୍ୟାନ୍ସର ସଚେତନାର ବାର୍ତ୍ତା ବାଣ୍ଟୁଛନ୍ତି। ସାରା ଦେଶରେ କ୍ୟାନସର ସଚେତନ କରାଇବା ସହ ଭାଇଚାରା ସୃଷ୍ଟି କରିବା ଲକ୍ଷ୍ୟ ନେଇ ମହମ୍ମଦ କ୍ରିଷ୍ଣା ଗତ ୨୦୨୩ ମାର୍ଚ୍ଚ ୨୮ରୁ ସଚେତନତା ଯାତ୍ରାରେ ବାହାରିଥିଲେ। ମହମ୍ମଦ କନ୍ୟାକୁମାରୀ, ବେଙ୍ଗାଲୁରୁ, ଦିଲ୍ଲୀ, ହାଇଦ୍ରାବାଦ, ଚଣ୍ଡିଗଡ, ଡେରାଡୁନ, କଶ୍ମୀର ଭଳି ବିଭିନ୍ନ ରାଜ୍ୟ ବୁଲି ଏହି ସଚେତନତା ବାର୍ତ୍ତା ବାଣ୍ଟୁଥିବା ବେଳେ ଶନିବାର ପୁରୀରେ ପହଞ୍ଚତ୍ଥିଲେ। ସେହିପରି ରବିବାର ଭୁବନେଶ୍ୱରରେ ତାଙ୍କର ଏହି ସଚେତନା ଏହି ମିଶନ୍ ପୂରଣ କରିବେ ବୋଲି କହିଛନ୍ତି। ଅପରପକ୍ଷେ ତାଙ୍କର ନାମ ମହମ୍ମଦ କ୍ରିଷ୍ଣା ରଖାଯିବା ନେଇ ପଚାରିବାରୁ ସେ କହିଛନ୍ତି, ତାଙ୍କ ବାପା ତାଙ୍କୁ ଏହି ନାମ ଦେଇଛନ୍ତି। ଅନେକ ସମୟରେ ସେ ସ୍କୁଲରେ ପଢିବା ବେଳେ ତାଙ୍କ ସ୍କୁଲ ଶିକ୍ଷକ ଓ ସାଥୀମାନେ ତାଙ୍କୁ ପଚାରୁଥିଲେ ଏପରି କାହିକିଁ ନା ରହିଛି। ସେ ଏନେଇ ତାଙ୍କ ବାପାଙ୍କୁ ପଚାରିବାରୁ ତାଙ୍କ ବାପା କହିଥିଲେ ସବୁ ଧର୍ମ ସମାନ। ଉଭୟ ଦେବତା ସମସ୍ତଙ୍କ ପାଇଁ ବା ପ୍ରତ୍ୟେକ ମଣିଷଙ୍କ ପାଇଁ ଅଟନ୍ତି। ଧର୍ମକୁ ନେଇ ସଂଘର୍ଷ କରବା ଠିକ୍ ନୁହେଁ ବୋଲି ମହମ୍ମଦ କ୍ରିଷ୍ଣା କହିଛନ୍ତି।