ନୂଆଦିଲ୍ଲୀ,୧୪।୭: ବିଶ୍ୱର ଶୀର୍ଷ ୧୦ ଧନୀ ତାଲିକାରେ ରିଲାଏନ୍ସ ଇଣ୍ଡଷ୍ଟ୍ରିଜ୍ର ଅଧ୍ୟକ୍ଷ ମୁକେଶ ଅମ୍ବାନୀ ବର୍ତ୍ତମାନ ୬ଷ୍ଠ ସ୍ଥାନରେ ପହଞ୍ଚିଛନ୍ତି। ଟେସ୍ଲା ଇଙ୍କ୍ର ପ୍ରତିଷ୍ଠାତା ଏଲନ ମସ୍କ ଏବଂ ଆଲ୍ଫାବେଟ୍ର ସହପ୍ରତିଷ୍ଠାତା ଲାରି ପେଜ୍ଙ୍କୁ ପଛରେ ପକାଇ ମୁକେଶ ଏହି ସ୍ଥାନ ହାସଲ କରିଛନ୍ତି। ଏହି ତାଲିକାର ପ୍ରଥମ ସ୍ଥାନରେ ଆମାଜନର ଜେଫ୍ ବେଜୋସ ରହିଥିବା ବେଳେ ଦ୍ୱିତୀୟରେ ମାଇକ୍ରୋସଫ୍ଟର ବିଲ୍ ଗେଟ୍ସ ଏବଂ ତୃତୀୟରେ ବର୍ନାଡ ଆରନ୍ଲଟ ଥିବା ବେଳେ ଚତୁର୍ଥରେ ଫେସବୁକର ମାର୍କ ଜୁକରବର୍ଗ ଏବଂ ପଞ୍ଚମରେ ଷ୍ଟିଭ ବାଲମର ରହିଛନ୍ତି। ମୁକେଶଙ୍କ ସମ୍ପତ୍ତି ସୋମବାର ୨.୧ ବିଲିୟନ ଡଲାର ବୃଦ୍ଧି ଘଟିଛି। ବର୍ତ୍ତମାନ ତାଙ୍କର ନେଟ୍ ସମ୍ପତ୍ତି ୭୨.୪ ବିଲିୟନ ଡଲାରକୁ ବୃଦ୍ଧି ଘଟିଛି। ଫଳରେ ସେ ମଧ୍ୟ ଏସିଆର ସବୁଠାରୁ ଧନୀ ବ୍ୟକ୍ତି ହୋଇପାରିଛନ୍ତି। ରିଲାଏନ୍ସ ଇଣ୍ଡଷ୍ଟ୍ରିର ଡିଜିଟାଲ ପ୍ଲାଟଫର୍ମ ଜିଓରେ ଗତ କିଛି ମାସ ମଧ୍ୟରେ ପ୍ରମୁଖ କମ୍ପାନୀଙ୍କ ନିବେଶ, କମ୍ପାନୀର ଅଂଶଧନ ବୃଦ୍ଧି ଫଳରେ ନିଟ୍ ସମ୍ପତ୍ତିରେ ବୃଦ୍ଧି ଘଟିଥିବା ଜଣାପଡିଛି। ବର୍ତ୍ତମାନ ସୁଦ୍ଧା ରିଲାଏନ୍ସ ଜିଓରେ ଫେସ୍ବୁକ, ଇଣ୍ଟେଲ, ସିଲିଭରଲେକ୍,କ୍ୱାଲକମ ଭଳି ବୃହତ୍ତ ନିବେଶକ ନିବେଶ କରିଛନ୍ତି। କମ୍ପାନୀର ବାର୍ଷିକ ସାଧାରଣ ବୈଠକ(ଏଜିଏମ) ବୁଧବାର ଅନୁଷ୍ଠିତ ହେବାକୁ ଯାଉଛି। ସେହିଭଳି ଜିଓରେ ପ୍ରାୟ ୪ବିଲିୟନ ଡଲାର ନିବେଶ ପାଇଁ ଗୁଗଲ୍ ଓ ଜିଓ ମଧ୍ୟରେ କଥାବର୍ତ୍ତା ଜାରି ରହିଥିବା ସୂଚନା ରହିଛି।
