ନୂଆଦିଲ୍ଲୀ,୧।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତରେ ଶନିବାର ୫ଜି ସେବା ଆରମ୍ଭ କରିଛନ୍ତି। କିଛି ସହରରେ ଆଜିଠାରୁ ଏହି ସେବା ଉପଲବ୍ଧ ହେବ। ଆସନ୍ତା ବର୍ଷ ଶେଷ ସୁଦ୍ଧା ସମଗ୍ର ଭାରତରେ ଏହି ସେବାକୁ ପ୍ୟାନ୍ ଇଣ୍ଡିଆସ୍ତରରେ ପହଞ୍ଚାଯିବ ବୋଲି ଆଶା କରାଯାଉଛି। ତେବେ ଏହି ୫ଜି ସେବା ଆରମ୍ଭ ହେବା ପରେ ଏଥିଲାଗି କେତେ ଟଙ୍କା ଖର୍ଚ୍ଚ ହେବ ତାହାକୁ ନେଇ ଚିନ୍ତାରେ ଗ୍ରାହକ। କୌଣସି ଟେଲିକମ୍ କମ୍ପାନୀ ପକ୍ଷରୁ ୫ଜି ରିଚାର୍ଜ ପ୍ଲାନ ବିଷୟରେ ସୂଚନା ଦିଆଯାଇ ନ ଥିଲେ ହେଁ ରିଲାଏନ୍ସ ଜିଓ ଚେୟାରମ୍ୟାନ୍ ମୁକେଶ ଅମ୍ବାନୀ କହିଛନ୍ତି ଯେ ଭାରତରେ ଜିଓ ଶସ୍ତା ୫ଜି ସେବା ନେଇ ଆସିବ।
ଇଣ୍ଡିଆନ ମୋବାଇଲ କଂଗ୍ରେସରେ ୫ଜି ସେବା ଲଞ୍ଚ ବେଳେ ମୁକେଶ କହିଛନ୍ତି, ଭାରତ ବିଳମ୍ବରେ ୫ଜି ସେବା ଆରମ୍ଭ କଲେ ହେଁ ଆମେ ଦୁନିଆ ତୁଳନାରେ ଉଚ୍ଚ ଗୁଣବତ୍ତାଯୁକ୍ତ ଏବଂ ଅଧିକ ଲାଭ ମିଳିପାରୁଥିବା ୫ଜି ସେବାକୁ ଆରମ୍ଭ କରିବୁ। ଡିସେମ୍ବର ୨୦୨୩ ଭିତରେ ଆମ ଦେଶର କୋଣ ଅନୁକୋଣରେ ଏହି ସେବାକୁ ପହଞ୍ଚାଇବା ଲାଗି ଜିଓ ପ୍ରତିବଦ୍ଧ। ଜିଓର ଅଧିକାଂଶ ୫ଜି ଟେକ୍ନୋଲୋଜିକୁ ଭାରତରେ ବିକଶିତ କରାଯାଇଛି। ଏଥିଲାଗି ଆତ୍ମନିର୍ଭର ଭାରତର ମୋହର ଏହା ଉପରେ ଲାଗିଛି।
କହିରଖୁଛୁ, ୫ଜି ଲାଗି ରିଚାର୍ଜ କଲେ କେତେ ଟଙ୍କା ଖର୍ଚ୍ଚ ହେବ ତାହା ଏଯାବତ ସ୍ପଷ୍ଟ ହୋଇନାହିଁ। ହେଲେ ଏହା ୪ଜି ଭଳି ହେବ ବୋଲି ଟେଲିକମ କମ୍ପାନୀ ପକ୍ଷରୁ କୁହାଯାଉଛି। ଉଭୟଙ୍କ ତୁଳନା କଲେ ୫ଜି ଲାଗି ଅଧିକ ଦେୟ ଦେବାକୁ ପଡ଼ିପାରେ। ଅନ୍ୟ ଦେଶ ତୁଳନାରେ କିନ୍ତୁ ଏହା ବହୁତ କମ୍ ହେବ।