ନୂଆଦିଲ୍ଲୀ: ଏସିଆର ସବୁଠାରୁ ଧନୀ ବ୍ୟକ୍ତି ହେଉଛନ୍ତି ମୁକେଶ ଅମ୍ବାନୀ। ସେ ନିଜ ଝିଅ ଇଶା ଏବଂ ପୁଅ ଆକାଶଙ୍କ ବିବାହ ଦୁଇ ବଡ଼ ବ୍ୟବସାୟୀଙ୍କ ପରିବାରରେ କରିଛନ୍ତି। ଆକାଶଙ୍କ ବିବାହ ଶ୍ଳୋକାଙ୍କ ସହ ହୋଇଛି। ଶ୍ଳୋକା ଅରୁଣ ମେହଟ୍ଟାଙ୍କ ଝିଅ। ସେହିଭଳି ଇଶାଙ୍କ ବିବାହ ପିରାମିଲ ଗ୍ରୁପ୍ର ପ୍ରତିଷ୍ଠାତା ଅଜୟ ପିରାମଲଙ୍କ ପୁଅ ଆନନ୍ଦଙ୍କ ସହ ହୋଇଛି।
ମେହଟ୍ଟା ଏବଂ ପିରାମଲ, ଉଭୟ ପରିବାରର କାରବାର ଦେଶ ତଥା ବିଦେଶରେ ମଧ୍ୟ ରହିଛି। ଈଶାଙ୍କ ଶ୍ୱଶୁର ଅଜୟଙ୍କ ମୋଟ ସମ୍ପତ୍ତିର ପରିମାଣ ୩ ବିଲିୟନ ଡଲାର ଅର୍ଥାତ ୨୨୧ ଲକ୍ଷ କୋଟି ଟଙ୍କା। ସେ ଭାରତର ୫୦ତମ ଧନୀବ୍ୟକ୍ତି। ତାଙ୍କ କମ୍ପାନୀ ପିରାମଲ ଏଣ୍ଟରପ୍ରାଇଜେସ୍ ଫାର୍ମା, ହେଲ୍ଥକେୟାର ଏବଂ ଫାଇନେନ୍ସିଆଲ ସର୍ଭିସ ସହ ଜଡ଼ିତ। ୩୦ ଦେଶରେ ଏହାର ଶାଖା ରହିଛି। ୧୯୭୭ରେ ୨୨ ବର୍ଷ ବୟସରେ ସେ କପଡ଼ା କାରବାରରୁ ବ୍ୟବସାୟ ଆରମ୍ଭ କରିଥିଲେ। ପରେ ଫାର୍ମା ସେକ୍ଟରରେ ସେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଥିଲେ। କମ୍ପାନୀର ବୋର୍ଡରେ ଈଶାଙ୍କ ସ୍ବାମୀ ଆନନ୍ଦ ମଧ୍ୟ ସାମିଲ ଅଛନ୍ତି।
ଅପରପକ୍ଷେ ଆକାଶଙ୍କ ଶ୍ୱଶୁର ରସୈଲ ମେହଟ୍ଟା ଜଣେ ହୀରା ବ୍ୟବସାୟୀ। ସେ ରୋଜି ବ୍ଲୁ ଇଣ୍ଡିଆ କମ୍ପାନୀର ଏମ୍ଡି। ଏହା ଦୁନିଆର ଶ୍ରେଷ୍ଠ ଗହଣା କମ୍ପାନୀ ମଧ୍ୟରୁ ଗୋଟିଏ। ଦେଶରେ ୨୫ରୁ ଅଧିକ ସହରରେ ଏହାର ଷ୍ଟୋର ରହିଛି। ବିଦେଶରେ ମଧ୍ୟ ଏହାର କାରବାର ରହିଛି। ତାଙ୍କର ମୋଟ ସମ୍ପତ୍ତି ୨୫୫ ମିଲିୟନ ଡଲାର(ପ୍ରାୟ ୧୭୦୦ କୋଟି ଟଙ୍କା) ବୋଲି ଜଣାପଡ଼ିଛି।