ନୂଆଦିଲ୍ଲୀ,୨୨।୭: ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନୀ ବିଶ୍ୱର ୫ମ ଧନୀ ବ୍ୟକ୍ତି ଭାବେ ବିବେଚିତ ହୋଇଛନ୍ତି। ଜୁଲାଇ ଦ୍ୱିତୀୟ ସପ୍ତାହରେ ସେ ବିଶ୍ୱ ଧନୀ ତାଲିକାରେ ୬ ନମ୍ବର ସ୍ଥାନରେ ରହିଥିଲେ। ସେହି ସମୟରେ ତାଙ୍କ ସମ୍ପତ୍ତି ୭୨.୪ ବିଲିୟନ ରହିଥିଲା। ବୁଧବାର ସେ ଏହି ତାଲିକାରେ ପଞ୍ଚମ ସ୍ଥାନକୁ ଯାଇଛନ୍ତି। ୮ ଦିନ ମଧ୍ୟରେ ତାଙ୍କ ସମ୍ପତ୍ତିରେ ୨.୬ ବିଲିୟନ ଡଲାରର ବୃଦ୍ଧି ପରିଲକ୍ଷିତ ହୋଇଛି। ତାଲିକାରେ ପ୍ରଥମ ସ୍ଥାନରେ ଆମାଜନ ସିଇଓ ଜେଫ୍ ବେଜୋସ ରହିଛନ୍ତି। ତାଙ୍କର ମୋଟ ସମ୍ପତ୍ତି ପରିମାଣ ୧୮୫.୮ ବିଲିୟନ ଡଲାର ରହିଛି। ଦ୍ୱିତୀୟ ସ୍ଥାନରେ ମାଇକ୍ରୋସଫ୍ଟର ସହପ୍ରତିଷ୍ଠାତା ବିଲ୍ ଗେଟ୍ସ ରହିଛନ୍ତି। ତାଙ୍କ ପାଖରେ ୧୧୩.୧ବିଲିୟନ ଡଲାରର ସମ୍ପତ୍ତି ରହିଛି। ୧୧୨ ବିଲିୟନ ଡଲାର ସମ୍ପତ୍ତି ସହ ତୃତୀୟରେ ବର୍ନାଡ ଆର୍ନଲ୍ଟ ଏବଂ ପରିବାର, ୮୯ ବିଲିୟନ ଡଲାର ସମ୍ପତ୍ତି ସହ ୪ର୍ଥ ସ୍ଥାନରେ ଫେସ୍ବୁକ୍ର ମାର୍କ ଜୁକରବର୍ଗ ରହିଛନ୍ତି। ମୁକେଶ ଅମ୍ବାନୀଙ୍କ ସମ୍ପତ୍ତି ଜୁକରବର୍ଗଙ୍କ ସମ୍ପତ୍ତିଠାରୁ ୧୪.୪ ବିଲିୟନ ଡଲାର କମ୍ ରହିଛି। ମୁକେଶଙ୍କ ପରେ ୭୨.୭ ବିଲିୟନ ଡଲାର ସମ୍ପତ୍ତି ସହ ୬ ନମ୍ବର ସ୍ଥାନରେ ଓ୍ବାରେନ ବଫେଟ, ସପ୍ତମରେ ଲେରୀ ଏଲିସନ, ଅଷ୍ଟମରେ ଏଲନ ମସ୍କ, ନବମରେ ଷ୍ଟିଭ ବାଲମର ଏବଂ ଲେରୀ ପେଜ୍ ୧୦ ସ୍ଥାନରେ ରହିଛନ୍ତି। ବର୍ତ୍ତମାନ ଲଗାତର ଭାବେ ରିଲାଏନ୍ସର ଶେୟାରରେ ଉନ୍ନତି ଦେଖାଯାଉଛି। ଏହାର ଶେୟାର ୫୨ ସପ୍ତାହର ଉଚ୍ଚତମ ସ୍ତରରେ ରହିଛି। ବୁଧବାର କମ୍ପାନୀର ଶେୟାର ମୂଲ୍ୟ ୨ ହଜାର ଟଙ୍କା ଟପିଥିବା ଜଣାପଡିଛି। ଗତ ୪ମାସରେ ରିଲାଏନ୍ସର ଶେୟାର ୧୩୦% ବଢ଼ିଥିବା ଜଣାପଡ଼ିଛି।