ସୋନପୁର,୪।୧(ମୃତ୍ୟୁଞ୍ଜୟ ଶତପଥୀ): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକରେ ପ୍ରଧାନମନ୍ତ୍ରୀ ଆବାସ ଯୋଜନା ଗ୍ରାମୀଣରେ ବ୍ୟାପକ ଦୁର୍ନୀତି ହୋଇଥିବା ଅଭିଯୋଗ ହୋଇଛି। ସରକାରୀ ନିୟମ ଉଲ୍ଲଂଘନ କରି ହିତାଧିକାରୀ ଚୟନ କରାଯାଇଛି। ଜଣେ ବ୍ୟକ୍ତିଙ୍କୁ ଆବାସ ଯୋଜନାରେ ଗୋଟିଏ ଘର ମିଳିବାର ନିୟମ ଥିବା ବେଳେ ସମାନ ଲୋକଙ୍କୁ ଏକାଧିକ ଥର ଗୃହ ଆବଣ୍ଟନ ହୋଇଛି। ଏପରିକି ପ୍ରଥମ କିସ୍ତି ବାବଦରେ ୨ଥର ହିତାଧିକାରୀଙ୍କ ଭିନ୍ନ ଭିନ୍ନ ଆକାଉଣ୍ଟକୁ ୪୦ହଜାର ଟଙ୍କା ଲେଖାଏ ଟ୍ରାନ୍ସଫର କରାଯାଇଛି। ଏହି ବେଆଇନ କାର୍ଯ୍ୟ ଜରିଆରେ ସରକାରୀ ଅର୍ଥ ହଡ଼ପ ହୋଇଛି। ଏଥିରେ ବ୍ଲକର କେତେଜଣ ସରକାରୀ କର୍ମଚାରୀ ସାମିଲ ଅଛନ୍ତି। ୨୦୨୧-୨୨ ଆର୍ଥତ୍କ ବର୍ଷରେ ପିଏମ୍ ଆବାସ ଯୋଜନାରେ ଏଭଳି ଦୁର୍ନୀତି ହୋଇଛି। ସୁନାପାଲି ପଞ୍ଚାୟତ ପହଣ୍ଡି ଗ୍ରାମର ବାସନ୍ତୀ ସାହୁ ଆବାସ ଯୋଜନାରେ ଦୁଇଟି ଘରର କାର୍ଯ୍ୟାଦେଶ ପାଇଛନ୍ତି। ଏପରିକି ତାଙ୍କୁ ପ୍ରଥମ କିସ୍ତି ଟଙ୍କା ୪୦ହଜାର ଲେଖାଏ ଦୁଇଥର ପ୍ରଦାନ କରାଯାଇଛି। ସେହିପରି ରାମପୁର ପଞ୍ଚାୟତ ରାମପୁର ଗ୍ରାମର ମୁନା ମହାନନ୍ଦ ଓ ଦୀପାଞ୍ଜଳି ଭରାସାଗରଙ୍କୁ ଆବାସ ଯୋଜନାରେ ଦୁଇ ଥର ଘର ମିଳିଛି। ପ୍ରଥମ କିସ୍ତି ଟଙ୍କା ମଧ୍ୟ ଦୁଇଥର ଲେଖାଏ ପ୍ରଦାନ କରାଯାଇଛି। ଟ୍ୟାଗ୍ ଅଫିସର ଥିବା ପଞ୍ଚାୟତ ନିର୍ବାହୀ ଅଧିକାରୀ, ଜିଆର୍ଏସ୍ ଏବଂ ବ୍ଲକ ପ୍ରଶାସନର କେତେଜଣ ଅଧିକାରୀଙ୍କ ଭୂମିକା ସନ୍ଦେହଘେରରେ ରହିଛି। କାର୍ଯ୍ୟାଦେଶ ପ୍ରଦାନ ପୂର୍ବରୁ ବ୍ଲକ ନୋଡାଲ ଅଫିସର କାଗଜପତ୍ର ଠିକ୍ ଭାବେ ତନଖି କରି ନ ଥିବା ଏଥିରୁ ସ୍ପଷ୍ଟ ପ୍ରତୀୟମାନ ହେଉଛି। ଅନ୍ୟପକ୍ଷେ ଦୋଷୀ ଅଧିକାରୀ ଓ ହିତାଧିକାରୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ। ଏହି ଚଞ୍ଚକତା ପାଇଁ ବେଆଇନ ଭାବେ ହିତାଧିକାରୀଙ୍କ ନାମରେ ୨ଟି ଲେଖାଏ ଏମ୍ଜିଏନ୍ଆରଇଜିଏସ୍ ଜବ୍କାର୍ଡ ପଞ୍ଚାୟତ ପକ୍ଷରୁ ଯୋଗାଇ ଦିଆଯାଇଛି। ଏ ସମ୍ପର୍କରେ ଡୁଙ୍ଗୁରିପାଲି ବିଡିଓ ରୋହିତ ଭୋଇଙ୍କୁ ପଚାରିବାରୁ ନିୟମ ଅନୁଯାୟୀ ଜଣେ ହିତାଧିକାରୀଙ୍କୁ ଆବାସ ଯୋଜନାରେ ଗୋଟିଏ ଘର ଓ ଗରିବ ଲୋକଙ୍କୁ ଏମ୍ଜିଏନ୍ଆର୍ଇଜିଏସ୍ରେ ଗୋଟିଏ ଜବ୍କାର୍ଡ ମିଳିବା କଥା। ବେଆଇନ କାର୍ଯ୍ୟର ପ୍ରମାଣ ମିଳିଲେ ନିୟମ ଅନୁଯାୟୀ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି।