ମୁମ୍ବାଇ,୧୩।୧୧:ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରେ ସୀମାଶୁଳ୍କ ଅଧିକାରୀମାନେ ୬୧ କିଲୋଗ୍ରାମ ସୁନା ଜବତ କରିଛନ୍ତି, ଯାହାର ମୂଲ୍ୟ ୩୨ କୋଟି ଟଙ୍କା। ବିମାନବନ୍ଦରରେ ଗୋଟିଏ ଦିନରେ ଏହା ସର୍ବାଧିକ ସୁନା ଜବତ ବୋଲି ରବିବାର ଜଣେ ଅଧିକାରୀ କହିଛନ୍ତି। ବେଆଇନ ଭାବେ ସୁନା ଆଣିବା ଅଭିଯୋଗରେ ୨ ମହିଳାଙ୍କ ସମେତ ୭ ଜଣ ଗିରଫ ହୋଇଛନ୍ତି। ଶୁକ୍ରବାର ପ୍ରଥମେ ତାଞ୍ଜାନିଆରୁ ଫେରିଥିବା ୪ ଭାରତୀୟଙ୍କଠାରୁ ୧ କିଲୋଗ୍ରାମ ସୁନା ମିଳିଥିଲା। ଏହାକୁ ସେମାନେ ସ୍ବତନ୍ତ୍ର ଭାବେ ପ୍ରସ୍ତୁତ କରିଥିବା ବେଲ୍ଟରେ ଲୁଚାଇ ରଖିଥିଲେ, ଯେଉଁଥିରେ ଏକାଧିକ ପକେଟ ରହିଥିଲା। ଏହା ବ୍ୟତୀତ ସେମାନେ ଦେହରେ ପିନ୍ଧିଥିବା ଅନ୍ୟ ବେଲ୍ଟଗୁଡ଼ିକରୁ ୫୩ କିଲୋ ଓଜନର ୟୁଏଇ ନିର୍ମିତ ସୁନା ବିସ୍କୁଟ୍ ମିଳିଥିଲା। ଦୋହା ବିମାନବନ୍ଦରରେ ସୁଦାନର ଜଣେ ବ୍ୟକ୍ତି ସେମାନଙ୍କୁ ଏହି ସ୍ବତନ୍ତ୍ର ବେଲ୍ଟ ଦେଇଥିଲେ। ୪ ଯାତ୍ରୀଙ୍କୁ ଗିରଫ କରାଯିବା ପରେ ୧୪ ଦିନ ପାଇଁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସେହିପରି ଦୁବାଇରୁ ଆସିଥିବା ୩ ଯାତ୍ରୀଙ୍କଠାରୁ ସୀମାଶୁଳ୍କ ଅଧିକାରୀ ୮ କିଲୋ ସୁନା ଜବତ କରିଛନ୍ତି। ସୁନାଗୁଣ୍ଡକୁ ମହମ ଆକୃତିର କରି ସେମାନେ ପିନ୍ଧିଥିବା ଜିନ୍ସ ଅଣ୍ଟାଘେରରେ ଲୁଚାଇ ରଖିଥିଲେ।