ମୁମ୍ବାଇ,୧୩ା୬: ଗୋଲ୍ଡ ସ୍କିମ୍ରେ ଜଣେ ଜମାକାରୀଙ୍କୁ ଠକିବା ଅଭିଯୋଗରେ ବଲିଉଡ୍ ଅଭିନେତ୍ରୀ ଶିଳ୍ପା ସେଟ୍ଟୀ ଏବଂ ତାଙ୍କ ସ୍ବାମୀ ରାଜ କୁନ୍ଦ୍ରା ଓ ଅନ୍ୟମାନଙ୍କ ବିରୋଧରେ ତଦନ୍ତ କରିବାକୁ ମୁମ୍ବାଇର ଏକ ଅଦାଲତ ପୋଲିସକୁ ନିର୍ଦ୍ଦେଶ ଦେଇଛି।
କୁନ୍ଦ୍ରା ଦମ୍ପତିଙ୍କ ଦ୍ୱାରା ପ୍ରତିଷ୍ଠିତ କମ୍ପାନୀ ସତ୍ୟୁଗ ଗୋଲ୍ଡ ପ୍ରା. ଲିଃ ସୁନା ଯୋଜନାରେ ଲୋକଙ୍କଠାରୁ ଜମା ସଂଗ୍ରହ କରୁଥିଲା। ଏହି ସଂସ୍ଥାରେ ଜାଲିଆତି କରାଯାଉଥିବା ନେଇ ରିଦ୍ଧି ସିଦ୍ଧି ବୁଲିଅନ୍ସର ପରିଚାଳନା ନିର୍ଦ୍ଦେଶକ ପୃଥ୍ବୀରାଜ କୋଠାରି ଅଭିଯୋଗ କରିଥିଲେ। ଅଭିଯୁକ୍ତମାନଙ୍କ ବିରୋଧରେ ଠକେଇ, ବିଶ୍ୱାସଘାତ ଆଦି ଅଭିଯୋଗରେ ଏତଲା ଦାଏର କରି ତଦନ୍ତ କରିବାକୁ ଅତିରିକ୍ତ ସେସନ୍ସ ଜଜ୍ ଏନ୍.ପି. ମେହେଟ୍ଟା ବିକେସି ଥାନା ପୋଲିସକୁ ନିର୍ଦ୍ଦେଶ ଦେଇଛନ୍ତି।
ଅଭିଯୋଗ ଅନୁଯାୟୀ କୁନ୍ଦ୍ରା ଦମ୍ପତିଙ୍କ କମ୍ପାନୀରେ ୨୦୧୪ରେ କୋଠାରି ୫ ବର୍ଷିଆ ଯୋଜନାରେ ୯୦,୩୮,୬୦୦ ଟଙ୍କା ନିବେଶ କରିଥିଲେ। ପ୍ରତିଶ୍ରୁତି ଅନୁଯାୟୀ ତାଙ୍କୁ ୨୦୧୯ ଏପ୍ରିଲ ୨ରେ ୫,୦୦୦ ଗ୍ରାମ ୨୪ କ୍ୟାରେଟ୍ ସୁନା ମିଳିବା କଥା। ତେବେ ମାଚ୍ୟୁରିଟି ତାରିଖରେ ସେହି ପରିମାଣର ସୁନା ଦିଆଯାଇ ନ ଥିଲା ବୋଲି କୋଠାରି ଅଭିଯୋଗରେ ଦର୍ଶାଇଥିଲେ।