ମୁମ୍ବାଇ, ୧୭।୯: ମୁମ୍ବାଇର ପୂର୍ବତନ କ୍ରିକେଟର୍ ସଚିନ ଦେଶମୁଖଙ୍କ କରୋନା ଭାଇରସ୍ରେ ବିୟୋଗ ଘଟିଛି। ମଙ୍ଗଳବାର ରାତିରେ ଥାନେସ୍ଥିତ ଏକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାନରେ ସଚିନ ଶେଷ ନିଶ୍ୱାସ ତ୍ୟାଗ କରିଥିଲେ। ମୃତ୍ୟୁବେଳକୁ ତାଙ୍କୁ ୫୨ ବର୍ଷ ହୋଇଥିଲା। ସଚିନଙ୍କ ବନ୍ଧୁଙ୍କ କହିବାନୁଯାୟୀ, ‘ସେ ବହୁତ ଦିନ ଧରି ଜ୍ୱରରେ ପୀଡ଼ିତ ଥିଲେ ମଧ୍ୟ ହସ୍ପିଟାଲ ଯିବାକୁ ମନା କରୁଥିଲେ। କିନ୍ତୁ ଶେଷରେ ସଚିନ କରୋନା ଆକ୍ରାନ୍ତ ହୋଇଥିବା ଜଣାପଡ଼ିଥିଲା।’
ସମୟରେ ଜଣେ ଉଚ୍ଚକୋଟୀର ବ୍ୟାଟ୍ସମ୍ୟାନ ଥିବା ସଚିନ ଦେଶମୁଖ ଉଭୟ ମୁମ୍ବାଇ ଓ ମହାରାଷ୍ଟ୍ର ରଣ୍ଜୀ ଦଳରେ ସ୍ଥାନ ପାଇଥିଲେ ମଧ୍ୟ ଚୂଡ଼ାନ୍ତ ଏକାଦଶରେ ଖେଳିବାର ସୁଯୋଗ ପାଇ ନ ଥିଲେ। ସେ ୧୯ ବର୍ଷରୁ କମ୍ କୁଚ୍ ବିହାର ଟ୍ରଫିରେ ୫ଟି ଇନିଂସରେ ୩ଟି (୧୮୩, ୧୩୦ ଓ ୧୧୦) ଶତକ ହାସଲ କରିଥିଲେ। ସେହିଭଳି ସର୍ବଭାରତୀୟ ଆନ୍ତଃ ବିଶ୍ୱବିଦ୍ୟାଳୟ ଟୁର୍ନାମେଣ୍ଟର ଲଗାତର ୭ ମ୍ୟାଚ୍ରେ ସେ ୭ ଶତକ ହାସଲ କରିଥିଲେ। ସଚିନ ଏହି ଟୁର୍ନାମେଣ୍ଟରେ ପୁନେ ବିଶ୍ୱବିଦ୍ୟାଳୟ ପକ୍ଷରୁ ପ୍ରତିନିଧିତ୍ୱ କରୁଥିଲେ। ଜଣେ ଖେଳାଳି ଭାବେ ଖ୍ୟାତି ଅର୍ଜନ କରିଥିବା ସଚିନ ମୁମ୍ବାଇ ଏକ୍ସାଇଜ ଆଣ୍ଡ୍ କଷ୍ଟମ ବିଭାଗର ସୁପରିଟେଣ୍ଡେଣ୍ଟ ଭାବେ ମଧ୍ୟ କାର୍ଯ୍ୟରତ ଥିଲେ।
