କୁହାଯାଏ, ଭାଗ୍ୟ କେତେବେଳେ କାହାର ବଦଳିଯିବ ତାହା କହିବା ଅସମ୍ଭବ। ଏହାର ଜ୍ୱଳନ୍ତ ଉଦାହରଣ ହେଉଛନ୍ତି ସରିତା ମାଲି। ଏକଦା ମୁମ୍ବାଇ ରାସ୍ତାରେ ଫୁଲ ବିକ୍ରି କରୁଥିବା ସରିତା ଏବେ କାଲିଫର୍ଣ୍ଣିଆ ୟୁନିଭରସିଟିରୁ ପିଏଚଡି କରିବାକୁ ଯାଉଛନ୍ତି। ସେ ପିଏଚଡି ପାଇଁ ଆମେରିକାର ଶୀର୍ଷ ବିଶ୍ୱବିଦ୍ୟାଳୟରେ ଆଡମିଶନ ପାଇଁ ଯୋଗ୍ୟତା ହାସଲ କରିଛନ୍ତି। ସେ ବର୍ତ୍ତମାନ ଜେଏନୟୁରେ ଥିବା ଭାରତୀୟ ଭାଷା କେନ୍ଦ୍ରରେ ହିନ୍ଦୀ ସାହିତ୍ୟରେ ପିଏଚଡି କରୁଛନ୍ତି। ସେ ଜେଏନୟରୁ ଏମଏ ଏବଂ ଏମଫିଲ୍ ଡିଗ୍ରୀ କରିଛନ୍ତି। ଜୁଲାଇରେ ସେ ପିଏଚଡି ଆଡମିଶନ କରିବେ। ସରିତା ମୁମ୍ବାଇର ବସ୍ତିରେ ଜନ୍ମଗ୍ରହଣ କରିଥିଲେ ଏବଂ ଏକ ମ୍ୟୁନିସିପାଲିଟି ସ୍କୁଲରେ ଅଧ୍ୟୟନ ଆରମ୍ଭ କରିଥିଲେ।
ସରିତା ମାଲିଙ୍କ ପିତା ଉତ୍ତରପ୍ରଦେଶର ଜୈନପୁର ଜିଲାର ବାସିନ୍ଦା। ସେ ଜୀବିକା ଅନ୍ବେଷଣରେ ମୁମ୍ବାଇରେ ପହଞ୍ଚି ସେଠାରେ ରାସ୍ତାରେ ଫୁଲ ବିକ୍ରି କରିବା ଆରମ୍ଭ କରିଥିଲେ। ବାପାଙ୍କ ସହିତ ତାଙ୍କ ଝିଅ ସରିତା ମଧ୍ୟ ଫୁଲ ବିକ୍ରି କରୁଥିଲେ। ସରିତା କୁହନ୍ତି, ସମସ୍ତଙ୍କ ଜୀବନରେ ଉତ୍ଥାନ-ପତନ ଆସେ। ସମସ୍ତଙ୍କର ନିଜସ୍ବ କାହାଣୀ ଏବଂ ଯନ୍ତ୍ରଣା ଅଛି। ମୁଁ ଏମିତି ଏକ ସମାଜରେ ଜନ୍ମଗ୍ରହଣ କରିଥିଲି, ଯେଉଁଠାରେ ସମସ୍ୟାଗୁଡ଼ିକ ମୋ ଜୀବନର ସବୁଠାରୁ ଗୁରୁତ୍ୱପୂର୍ଣ୍ଣ ଅଂଶ ଥିଲା। ପରିବାରର ଏହି ଉତ୍ସାହ ଏବଂ ସମର୍ଥନ ହିଁ ତାଙ୍କୁ ଏ ପର୍ଯ୍ୟନ୍ତ ନେଇଛି।
ପର୍ବପର୍ବାଣି ସମୟରେ ସରିତା ତାଙ୍କ ପିତାଙ୍କ ସହିତ ଫୁଲ ବିକ୍ରି କରୁଥିଲେ। ବିଶେଷକରି ଗଣେଶ ପୂଜା, ଦୀପାବଳି ଏବଂ ଦଶହରା ଭଳି ପର୍ବରେ ସେ ସ୍ମୁଲ ଯିବା ସହ ବାପାଙ୍କୁ ସାହାଯ୍ୟ କରୁଥିଲେ। ସରିତା ମାଲିଙ୍କ ପରିବାରରେ ତାଙ୍କ ମାତାପିତା, ବଡ଼ ଭଉଣୀ ଏବଂ ଦୁଇ ସାନଭାଇଙ୍କ ସମେତ ୬ ଜଣ ସଦସ୍ୟ ଅଛନ୍ତି। ତାଙ୍କ ପିତାଙ୍କ ରୋଜଗାରରେ ପରିବାର ଚଳେ।