ମୁମ୍ବାଇ: ଦେଶୀ ଗର୍ଲ ପ୍ରିୟଙ୍କା ଚୋପ୍ରା ନିକଟରେ ଭାରତ ଫେରିଛନ୍ତି। ନିକ୍ ଜୋନାସଙ୍କୁ ବିବାହ କରିବା ପରେ ଲସ୍ ଏଞ୍ଜେଲସରେ ରହୁଥିବା ପ୍ରିୟଙ୍କା ୩ ବର୍ଷ ପରେ ନିଜ ଦେଶକୁ ଫେରିଛନ୍ତି। ଏହି ସମୟରେ ସୋସିଆଲ ମିଡିଆରେ ତାଙ୍କର ଫଟୋ ଏବଂ ଭିଡିଓଗୁଡ଼ିକ ବେଶ୍ ଭାଇରାଲ ହେଉଛି। ନିଜ କାମରେ ମୁମ୍ବାଇ ଆସିଥିବା ପ୍ରିୟଙ୍କା ମେରାଇନ ଡ୍ରାଇଭରେ ପହଞ୍ଚି ସେଠାରେ ବହୁତ ମଜା କରିଥିଲେ। ବର୍ତ୍ତମାନ ତାଙ୍କ ଭିଡିଓ ଭାଇରାଲ ହେଉଛି।
ପ୍ରିୟଙ୍କା ତାଙ୍କ ଇନ୍ଷ୍ଟାଗ୍ରାମରେ ମେରାଇନ ଡ୍ରାଇଭର ଏକ ଭିଡିଓ ଶେୟାର କରିଛନ୍ତି। ଯେଉଁଥିରେ ଅଭିନେତ୍ରୀ ଧଳା ପ୍ୟାଣ୍ଟ ଏବଂ କ୍ରପ୍ ଟପ୍ ପିନ୍ଧି ବହୁତ ସୁନ୍ଦର ଦେଖାଯାଉଛନ୍ତି। ଭିଡିଓରେ ପ୍ରିୟଙ୍କା ଦେଶୀ ଷ୍ଟାଇଲ୍ରେ ସମୁଦ୍ର କୂଳରେ ମଜା କରୁଥିବା ନଜର ଆସିଛନ୍ତି। ଏହି ପୋଷ୍ଟରେ ଅଭିନେତ୍ରୀ କହିଛନ୍ତି, ସେ ବିଦେଶରେ ରହୁଥିବା ସମୟରେ ମୁମ୍ବାଇକୁ ବହୁତ ମିସ୍ କରୁଥିଲେ। ‘ପୁରୁଣା ଆଡ୍ଡାରେ ମଜା କଲି … ଯଦିଓ ଗୋଟିଏ ମିନିଟ୍ ପାଇଁ ହୋଇଥିଲେ ମଧ୍ୟ ମୁମ୍ବାଇ ମୁଁ ତୁମକୁ ବହୁତ ମନେ ପକାଉଥିଲି! ବର୍ତ୍ତମାନ କାମକୁ ଫେରୁଛି।
ଏହା ପୂର୍ବରୁ ପ୍ରିୟଙ୍କା ସରୋଗେସି ମାଧ୍ୟମରେ ମା’ ହେବା ନେଇ ସୂଚନା ଦେଇଥିଲେ। ଯେତେବେଳେ ସେ ମୁମ୍ବାଇ ଫେରିଥିଲେ, ପ୍ରଶଂସକମାନେ ତାଙ୍କୁ ଝିଅ ମାଳତୀ ବିଷୟରେ ପଚାରିଥିଲେ, କିନ୍ତୁ ଅଭିନେତ୍ରୀ ଝିଅ ଏବଂ ସ୍ବାମୀଙ୍କ ବିନା ଏକାକୀ ଭାରତ ଆସିଥିବା କହିଛନ୍ତି।
ପ୍ରିୟଙ୍କାଙ୍କ ଓ୍ବାର୍କଫ୍ରଣ୍ଟ ବିଷୟରେ କହିବାକୁ ଗଲେ ତାଙ୍କର ଏକାଧିକ ପ୍ରୋଜେକ୍ଟ ରହିଛି। କିଛି ଦିନ ପୂର୍ବରୁ ସେ ‘ସୀଟାଡେଲ’ ପାଇଁ ଶୁଟିଂ ଶେଷ କରିଛନ୍ତି, ଯାହା ତାଙ୍କର ଡେବ୍ୟୁ ଓ୍ବେବ୍ ସିରିଜ ଏବଂ ଖୁବ୍ଶୀଘ୍ର ଓଟିଟି ପ୍ଲାଟଫର୍ମ ଆମାଜନ ପ୍ରାଇମରେ ମୁକ୍ତିଲାଭ କରିବ। ଏହା ବ୍ୟତୀତ ତାଙ୍କର ଆଉ ଦୁଇଟି ହଲିଉଡ୍ ପ୍ରୋଜେକ୍ଟ ଅଛି। ଏଥିମଧ୍ୟରେ ‘ଏଣ୍ଡିଙ୍ଗ ଥିଙ୍ଗ୍ସ’ ଏବଂ ‘ଇଟ୍ସ ଅଲ୍ କମିଂ ବ୍ୟାକ୍ ଟୁ ମି’ ରହିଛି। ଫରହାନ ଅଖତରଙ୍କ ଫିଲ୍ମ ‘ଜୀ ଲେ ଜରା’ ମଧ୍ୟ ପ୍ରିୟଙ୍କାଙ୍କ ହାତରେ ରହିଛି। ଏହି ଫିଲ୍ମରେ କ୍ୟାଟ୍ରିନା କୈଫ୍ ଏବଂ ଆଲିଆ ଭଟ୍ଟ ମଧ୍ୟ ତାଙ୍କ ସହ ସ୍କ୍ରିନ ଶେୟାର କରୁଥିବା ନଜର ଆସିବେ। ଫିଲ୍ମର ଶୁଟିଂ ଖୁବ୍ଶୀଘ୍ର ଆରମ୍ଭ ହେବ ବୋଲି ଆଶା କରାଯାଉଛି।