ମୁମ୍ବାଇ, ୮।୪:କ୍ରମାଗତ ୩ ମ୍ୟାଚରେ ପରାଜୟ ପରେ ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ବିଜୟ ସ୍ବାଦ ଚାଖିଛି ମୁମ୍ବାଇ ଇଣ୍ଡିଆନ୍ସ। ରବିବାର ଅନୁଷ୍ଠିତ ଡବଲ ହେଡରର ପ୍ରଥମ ମ୍ୟାଚରେ ଏହି ଦଳ ୨୯ ରନରେ ଦିଲ୍ଲୀ କ୍ୟାପିଟାଲ୍ସକୁ ପରାସ୍ତ କରିଛି। ମୁମ୍ବାଇ ୨୦ ଓଭରରେ ୫ ଉଇକେଟ ହରାଇ ୨୩୪ ରନ କରିଥିବାବେଳେ ଦିଲ୍ଲୀ ୨୦ ଓଭରରେ ୮ ଉଇକେଟ ହରାଇ ୨୦୫ ରନ କରିବାକୁ ସକ୍ଷମ ହୋଇଥିଲା। ପଏଣ୍ଟ ଖାତା ଖୋଲିବା ସହ ମୁମ୍ବାଇ ଦଳ ଟେବୁଲର ୭ମ ସ୍ଥାନକୁ ଉନ୍ନୀତ ହୋଇଛି। ୧୦ ବଲ୍ରୁ ୩୯ ରନ କରିବା ସହ ଗୋଟିଏ ଉଇକେଟ ନେଇଥିବା ମୁମ୍ବାଇର ରୋମାରିଓ ଶେଫର୍ଡ ପ୍ଲେୟର ଅଫ୍ ଦି ମ୍ୟାଚ ବିବେଚିତ ହୋଇଛନ୍ତି।
ରେକର୍ଡ/ମାଇଲଖୁଣ୍ଟ
ଏହି ମ୍ୟାଚରେ କେତେକ ରେକର୍ଡ ସୃଷ୍ଟି ହୋଇଥିବାବେଳେ କେତେଜଣ ଖେଳାଳି ବ୍ୟକ୍ତିଗତ ମାଇଲଖୁଣ୍ଟ ସ୍ପର୍ଶ କରିଛନ୍ତି। ଆଇପିଏଲ୍ରେ ୨୦୦ରୁ ଊର୍ଦ୍ଧ୍ୱ ରନକୁ ଡିଫେଣ୍ଡ କରିବାରେ ମୁମ୍ବାଇର ଶତ ପ୍ରତିଶତ ରେକର୍ଡ ଅତୁଟ ରହିଛି। ଏହି ଦଳ ୧୪ ଥରଯାକ ୨୦୦ରୁ ଊର୍ଦ୍ଧ୍ୱ ରନ କରିଥିବା ମ୍ୟାଚକୁ ସଫଳତାର ସହ ଡିଫେଣ୍ଡ କରିଛି। ଆଇପିଏଲ୍ରେ ରୋହିତ ଶର୍ମା ୧୦୦ କ୍ୟାଚ ପୂରଣ କରିଛନ୍ତି। ଏହି ତାଲିକାରେ ବିରାଟ କୋହଲି ୧୧୦ କ୍ୟାଚ ନେଇ ଶୀର୍ଷରେ ରହିଥିବାବେଳେ ରୋହିତଙ୍କ କ୍ୟାଚ ସଂଖ୍ୟା ୧୦୦ ସ୍ପର୍ଶ କରିଛି। ଏହାକୁ ମିଶାଇ ଓ୍ବାଙ୍ଖଡେରେ ମୁମ୍ବାଇ ବିଜୟରେ ଅର୍ଦ୍ଧଶତକ ପୂରଣ କରିଛି। ସୁପର ଓଭର ବିଜୟକୁ ମିଶାଇ କୌଣସି ଏକ ଭେନ୍ୟୁରେ ଗୋଟିଏ ଦଳ ୫୦ ମ୍ୟାଚ ଜିତିବା ଏହା ପ୍ରଥମ ଦୃଷ୍ଟାନ୍ତ। ଇଡେନ ଗାର୍ଡେନ୍ସରେ କୋଲକାତା ନାଇଟ ରାଇଡର୍ସ ୪୮ଟି ମ୍ୟାଚ ଜିତି ଦ୍ୱିତୀୟ ସ୍ଥାନରେ ରହିଛି। କୌଣସି ଜଣେ ହେଲେ ଖେଳାଳି ଅର୍ଦ୍ଧଶତକ ହାସଲ କରି ନ ଥିଲେ ମଧ୍ୟ ଟି୨୦ କ୍ରିକେଟରେ ଏକ ଦଳ ୨୩୪ ରନ ସଂଗ୍ରହ କରିବା ଏହା ପ୍ରଥମ। ୨୦୧୮ରେ କାଣ୍ଟରବରିଠାରେ କେଣ୍ଟ ବିପକ୍ଷରେ ସମରସେଟ୍ ୨୨୬/୫ ରନକରି ରେକର୍ଡର ଅଧିକାରୀ ଥିଲା। ଯଶପ୍ରୀତ୍ ବୁମ୍ରା ଆଇପିଏଲ୍ରେ ୧୫୦ ଉଇକେଟ ପୂରଣ କରିଛନ୍ତି। ମୁମ୍ବାଇର ପୂର୍ବତନ ଖେଳାଳି ଲସିଥ ମାଲିଙ୍ଗା ୧୭୦ଟି ଉଇକେଟ ନେଇ ତାଲିକାର ଶୀର୍ଷରେ ରହିଛନ୍ତି।