ଦୁବାଇ, ୨।୯: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ଆରମ୍ଭ ହେବା ପୂର୍ବରୁ ମୁମ୍ବାଇ ଇଣ୍ଡିଆନ୍ସ ଦଳକୁ ଝଟ୍କା ଲାଗିଛି। ଆଇପିଏଲ୍ ଇତିହାସର ସବୁଠାରୁ ଶ୍ରେଷ୍ଠ ବୋଲର ଲସିଥ୍ ମାଲିଙ୍ଗା ଚଳିତ ସଂସ୍କରଣରୁ ଓହରି ଯାଇଛନ୍ତି। ବ୍ୟକ୍ତିଗତ କାରଣ ଲାଗି ଚଳିତ ସିଜନରେ ମୁମ୍ବାଇ ପକ୍ଷରୁ ଖେଳିପାରିବେନି ବୋଲି ମାଲିଙ୍ଗା ଘୋଷଣା କରିଛନ୍ତି। ଏଥିସହ ସେ ପରିବାର ସହିତ ସମୟ ବିତାଇବାକୁ ଚାହୁଁଛନ୍ତି ବୋଲି କହିଛନ୍ତି। ତେବେ ମାଲିଙ୍ଗାଙ୍କ ସ୍ଥାନରେ ମୁମ୍ବାଇ ଇଣ୍ଡିଆନ୍ସ ଅଭିଜ୍ଞ ଅଷ୍ଟ୍ରେଲୀୟ ଦ୍ରୁତ ବୋଲର ଜେମ୍ସ ପାଟିନସନଙ୍କୁ ଦଳରେ ସାମିଲ କରିଛି। ମୁମ୍ବାଇ ପକ୍ଷରୁ ବୁଧବାର ଏନେଇ ସ୍ପଷ୍ଟ କରାଯାଇଛି।
ସ୍ପେଶାଲିଷ୍ଟ ବୋଲର ମାଲିଙ୍ଗା ୨୦୦୯ରେ ଆଇପିଏଲ୍ ପଦାର୍ପଣ କରିଥିଲେ। ବର୍ତ୍ତମାନ ସୁଦ୍ଧା ସେ ୧୨୨ ଆଇପିଏଲ୍ ମ୍ୟାଚ୍ ଖେଳି ୧୭୦ ଉଇକେଟ୍ ଅକ୍ତିଆର କରିଛନ୍ତି। ଏଥିସହ ଆଇପିଏଲ୍ ଇତିହାସରେ ସେ ସବୁଠାରୁ ସଫଳତମ ବୋଲର ସାବ୍ୟସ୍ତ ହୋଇଛନ୍ତି। ଗତବର୍ଷ ଫାଇନାଲରେ ଚେନ୍ନାଇ ସୁପର୍ କିଙ୍ଗ୍ସକୁ ବିଜୟ ଲାଗି ଅନ୍ତିମ ଓଭରରେ ୯ ରନ ଆବଶ୍ୟକ ହେଉଥିଲା। କିନ୍ତୁ ଏହି ଓଭର ବୋଲିଂ କରିବାକୁ ଆସିଥିବା ମାଲିଙ୍ଗା ୭ ରନ୍ ବ୍ୟୟ କରି ମୁମ୍ବାଇକୁ ୪ର୍ଥ ଥର ପାଇଁ ଚାମ୍ପିୟନ କରାଇଥିଲେ।
