ଦୁବାଇ, ୩୦।୮- ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ସିଜନ-୧୩ ପୂର୍ବରୁ ଡିଫେଣ୍ଡିଂ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ ଦଳ ଏହାର ନୂଆ ଜର୍ସି ଉନ୍ମୋଚିତ କରିଛି। ପୂର୍ବବର୍ଷ ପରି ଏଥର ମଧ୍ୟ ମୁମ୍ବାଇର ଜର୍ସି ଗାଢ଼ ନୀଳ ରହିଥିବା ଦେଖିବାକୁ ମିଳିଛି। ଜର୍ସିର ଦୁଇ କାନ୍ଧ ଓ ଅଣ୍ଟା ପାର୍ଶ୍ୱରେ ଗୋଲ୍ଡେନ ଛାପ ରହିଛି। ସେହିଭଳି ସାମ୍ନା ପାଖରେ ଫ୍ରାଞ୍ଚାଇଜର ମୁଖ୍ୟ ସ୍ପନଶର ସାମସଙ୍ଗ ଉଲ୍ଲେଖ ରହିଥିବାବେଳେ ଛାତିରେ ମୁମ୍ବାଇ ଇଣ୍ଡିଆନ୍ସର ଲୋଗୋ ରହିଛି। ମୁମ୍ବାଇ ଇଣ୍ଡିଆନ୍ସ ପକ୍ଷରୁ ଏହି ନୂଆ ଜର୍ସିକୁ ଏହାର ଟୁଇଟର୍ ପୃଷ୍ଠାରେ ଶେୟାର କରାଯାଇଛି। ଏଠାରେ ଉଲ୍ଲେଖଯୋଗ୍ୟ, କରୋନା ମହାମାରୀ ଲାଗି ଆଇପିଏଲ୍-୧୩କୁ ଭାରତ ପରିବର୍ତ୍ତେ ୟୁଏଇରେ ଆୟୋଜିତ କରାଯାଇଛି। ସେପ୍ଟେମ୍ବର ୧୯ରୁ ଏହା ଆରମ୍ଭ ହେବ। ନଭେମ୍ବର ୧୦ରେ ଫାଇନାଲ ମ୍ୟାଚ୍ ଖେଳାଯିବ। ତେବେ ଚେନ୍ନାଇ ସୁପର୍ କିଙ୍ଗ୍ସର କିଛି ପ୍ରମୁଖ ଖେଳାଳିଙ୍କ ସମେତ ସପୋର୍ଟ ଷ୍ଟାଫ୍ କରୋନା ଚିହ୍ନଟ ହେବାପରେ ଆଇପିଏଲ୍ ବିଳମ୍ବରେ ଆରମ୍ଭ ହେବାର ଆଶଙ୍କା ପ୍ରକାଶ ପାଇଛି।