ଯାଜପୁର ରୋଡ,୧୪ା୪(ଡି.ଏନ.ଏ.):ବ୍ୟାସନଗର ପୌରପାଳିକା ତରଫରୁ ଗତ ବୁଧବାର ୨୦୨୩-୨୪ ଆର୍ଥିକ ବର୍ଷ ନିମନ୍ତେ ବଜେଟ ଉପସ୍ଥାପନ କରାଯାଇଛି। ଏହି ବଜେଟରେ କୌଣସି ବିଷୟରେ ତାଳମେଳ ରହୁ ନ ଥିବା କାଉନସିଲରମାନେ ଅଭିଯୋଗ କରୁଥିବା ବେଳେ କୋରେଇ ବିଧାୟକ ମଧ୍ୟ ଅସନ୍ତୋଷ ଜାହିର କରିବା ସହିତ ବଜେଟ ଉପସ୍ଥାପନ ପୂର୍ବରୁ ଅଭିଜ୍ଞ ବ୍ୟକ୍ତିବିଶେଷଙ୍କ ସହିତ ଆଲୋଚନା କରିଥିଲେ ସୁନ୍ଦର ହୋଇଥାନ୍ତା ବୋଲି ମତବ୍ୟକ୍ତ କରିଛନ୍ତି। ଏହି ବଜେଟ ଉପସ୍ଥାପନ ସମୟରେ ଅଫିସର ବଡ଼ବାବୁ ଶାରୀରିକ ଅସୁସ୍ଥ ହୋଇ ଚିକିତ୍ସାଧୀନ ରହିଥିବାବେଳେ ତାଙ୍କ ସ୍ଥାନରେ ଅବସ୍ଥାପିତ ହୋଇଥିବା ମହିଳା କର୍ମଚାରୀଜଣଙ୍କ ଏବିଷୟରେ ଅନଭିଜ୍ଞ ଥିବା ଜଣାପଡିଛି। ଫଳରେ ଚଳିତ ବଜେଟକୁ ସରସ ସୁନ୍ଦର କରିବାରେ ପୌର କର୍ତ୍ତୃପକ୍ଷ ବିଫଳ ହୋଇଥିବା ଅଭିଯୋଗ ହେଉଛି। ଏପରି ସ୍ଥିତିରେ ପାରିଷଦର ବଜେଟ ଫାଇଲ ଚୋରି ସମ୍ପର୍କିତ ଏକ ଭିଡିଲ ଭାଇରାଲ ହେବା ଆଲୋଚନାର ଖୋରାକ ଯୋଗାଇଛି। ତଥ୍ୟ ମୁତାବକ, ପୌର ସମ୍ମିଳନୀ ଗୃହରେ ବଜେଟ ଉପସ୍ଥାପନ କାର୍ଯ୍ୟ ପରେ ପୌରାଧ୍ୟକ୍ଷା ଅନ୍ୟ କାର୍ଯ୍ୟରେ ବ୍ୟସ୍ତ ରହିଥିବା ବେଳେ ଜଣେ ବ୍ୟକ୍ତି ବଜେଟ ସମ୍ପର୍କିତ ଫାଇଲକୁ ସେଠାରୁ ନେଇଯିବାକୁ ନେଇ ଆଲୋଚନା ଜୋର ଧରିଛି। ତେବେ ତୁରନ୍ତ ଏହି ଫାଇଲ ଫେରାଇଦେବାକୁ ସମ୍ପୃକ୍ତ ବ୍ୟକ୍ତିଙ୍କୁ ଚାପ ପକାଯାଉଥିବା ଏବଂ ନ ଫେରାଇଲେ ଥାନାରେ ମାମଲା ରୁଜୁ କରାଯିବ ବୋଲି ଶୁଣିବାକୁ ମିଳିଛି। ଏ ସମ୍ପର୍କରେ ବ୍ୟାସନଗର ପୌର ଉପନଗରପାଳ ସୁବାସ ଚନ୍ଦ୍ର ବଳଙ୍କ ମତାମତ ନେବାରୁ ଏହି ଘଟଣାରେ କୌଣସି ସତ୍ୟତା ନଥିବା ସେ କହିଛନ୍ତି।