ଯାଜପୁର ରୋଡ୍,୧ା୫(ଡି.ଏନ.ଏ.): ବ୍ୟାସନଗର ତହସିଲ କାର୍ଯ୍ୟାଳୟ ପରିସର ପାଲଟିଛି ପୌର ପରିଷଦର ଗାଡ଼ି ପାର୍କିଂ ସ୍ଥଳ। ଦୀର୍ଘଦିନ ଧରି ବେଆଇନ ଭାବେ ପୌର ପରିଷଦର ବିଭିନ୍ନ ଯାନବାହନ ତହସିଲ କାର୍ଯ୍ୟାଳୟ ପରିସରରେ ପାର୍କିଂ କରାଯାଉଛି। ଫଳରେ ତହସିଲ କାର୍ଯ୍ୟାଳୟକୁ ଆସୁଥିବା ଜନସାଧାରଣ ଅସୁବିଧାର ସମ୍ମୁଖୀନ ହେବାସହ ଅସନ୍ତୋଷ ପ୍ରକାଶ କରୁଛନ୍ତି। ସଫେଇ ଓ ସେସପୁଲ ଗାଡ଼ିଗୁଡିକ ରଖିବା ଦ୍ୱାରା ସେଥିରୁ ଦୁର୍ଗନ୍ଧ ବାହାରି ପରିବେଶକୁ ପ୍ରଦୂଷିତ କରୁଛି। କେତେକ ଅଚଳ ଗାଡ଼ି ମଧ୍ୟ ଉକ୍ତ ପରିସରରେ ଓ ପ୍ରବେଶ ଦ୍ୱାରରେ ବହୁଦିନ ହେବ ପଡ଼ିରହିବା ଦ୍ୱାରା ତହସିଲ ପ୍ରବେଶ ଦ୍ୱାର ସଂକୁଚିତ ହୋଇଛି। ପୌରାଧ୍ୟକ୍ଷାଙ୍କ ଗାଡ଼ି ମଧ୍ୟ ଏହି ପରିସରରେ ପାର୍କିଂ କରାଯାଉଛି। ଏସବୁକୁ ତହସିଲଦାର ଦେଖି ନୀରବ ରହୁଛନ୍ତି। ଅନ୍ୟପକ୍ଷରେ ତହସିଲ କାର୍ଯ୍ୟାଳୟର ପୁରୁଣା ଘରଗୁଡ଼ିକ ଅସୁରକ୍ଷିତ ଅବସ୍ଥାରେ ରହିଛି। ଫଳରେ ସେଠାରେ ଗୁଳ୍ମ ଗଛଲତା ପରିପୂର୍ଣ୍ଣ ହୋଇଛି। ଏହାସହ ଉକ୍ତ ଘର ସରୀସୃପଙ୍କ ବାସସ୍ଥଳୀ ପାଲିଟିଛି। ହେଲେ ତାହାକୁ ଭଙ୍ଗାଯାଉନାହିଁ। ଏସବୁକୁ ନେଇ ସହରବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏଥିପ୍ରତି ଯାଜପୁର ଜିଲାପାଳ ଦୃଷ୍ଟିଦେବାକୁ ସାଧାରଣରେ ଦାବି ହୋଇଛି।
କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କଲେ ମଧ୍ୟ ସୁଫଳ ମିଳୁନାହିଁ
୧୯୬୧ରେ ଯାଜପୁରରୋଡ୍ ବିଜ୍ଞାପିତ ଅଞ୍ଚଳ ପରିଷଦ ଗଠନ ହୋଇଥିଲା। ପରେ ୧୯୯୩ରେ ପୌର ପରିଷଦରେ ପରିଣତ ହୋଇଛି। ହେଲେ ଅଦ୍ୟାବଧି ପୌର କାର୍ଯ୍ୟାଳୟଟି ରେଳବାଇ ଜାଗାରେ ଅଛି, ଯାହା ବଡ଼ ଦୁଃଖ ଓ ପରିତାପର ବିଷୟ। ଉକ୍ତ କାର୍ଯ୍ୟାଳୟ ପରିସରରେ ପାର୍କିଂ ସ୍ଥାନ ଅଭାବରୁ ବିଗତ କିଛି ବର୍ଷ ହେବ ପୌର ପରିଷଦ ଗାଡ଼ିଗୁଡିକ ତହସିଲ ପରିସରରେ ମନଇଚ୍ଛା ପାର୍କିଂ କରାଯାଉଛି। ଏ ସମ୍ପର୍କରେ ବହୁବାର ତହସିଲଦାର ଓ ପୌର କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କଲେ ମଧ୍ୟ କିଛି ସୁଫଳ ମିଳୁନାହିଁ।
-ରବୀନ୍ଦ୍ର କୁମାର ରାଉତ, ଆଇନଜୀବୀ
ଜନସାଧାରଣଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡୁଛି
କରୋନା ପୂର୍ବରୁ ପୌର ପରିଷଦ ଗାଡ଼ିଗୁଡିକ ତହସିଲ କାର୍ଯ୍ୟାଳୟ ମଧ୍ୟରେ ଅବାଧ ପାର୍କିଂ କରାଯାଉଛି। ପରିଷଦର ପାଇଖାନା ଟାଙ୍କି ସଫା କରୁଥିବା ଗାଡ଼ିଠାରୁ ଆରମ୍ଭ କରି ପୌରାଧ୍ୟକ୍ଷାଙ୍କ ପର୍ଯ୍ୟନ୍ତ ସବୁଗାଡ଼ି ଏଠାରେ ରଖାଯାଉଛି। ଫଳରେ ଖରାଦିନେ ଗାଡ଼ିଗୁଡ଼ିକ ଯିବାଆସିବା ଦ୍ୱାରା ଧୂଳି ଉଡ଼ିବା ସହ ଦୁର୍ଗନ୍ଧ ସୃଷ୍ଟି ହେଉଛି। ଏହାଦ୍ୱାରା ତହସିଲ ଅଫିସ ଆସୁଥିବା ଜନସାଧାରଣଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡୁଛି। ଏ ସମ୍ପର୍କରେ ଅଭିଯୋଗ କଲେ ମଧ୍ୟ କାର୍ଯ୍ୟାନୁଷ୍ଠାନ ହେଉନାହିଁ। ପରିସ୍ଥିତି ଯଥା ପୂର୍ବଂ ତଥା ପରମ୍ ରହିଛି।
-ନବକିଶୋର ସାହୁ, କାର୍ଯ୍ୟକାରୀ ସଭାପତି
କଳିଙ୍ଗନଗର ବାର୍ ଆସୋସିଏଶନ
ତହସିଲ ଅଫିସକୁ ଆସୁଥିବା ଲୋକେ ବାହାରେ ଗାଡ଼ି ରଖୁଛନ୍ତି
ପୂର୍ବ ଅପେକ୍ଷା ବର୍ତ୍ତମାନ ତହସିଲ କାର୍ଯ୍ୟାଳୟ ପରିସର ସଫାସୁତରା ରହୁଛି। ହେଲେ ୨ ଓ ୪ ଚକିଆ ରଖିବାର କୌଣସି ସୁବିଧାନାହିଁ। କାରଣ ମ୍ୟୁନିସିପାଲିଟି ଗାଡ଼ିଗୁଡିକ ଅଧାରୁ ଅଧିକ ସ୍ଥାନ ମାଡ଼ିବସିଛନ୍ତି। ଫଳରେ ତହସିଲ କାର୍ଯ୍ୟରେ ଆସୁଥିବା ଲୋକେ ଚୋରି ଭୟ ସତ୍ତ୍ୱେ ବାଧ୍ୟ ହୋଇ ବାହାରେ ଗାଡ଼ି ରଖି କାର୍ଯ୍ୟାଳୟକୁ ଯାଉଛନ୍ତି। ଯଦି ଗାଡ଼ି ଚୋରି ହୁଏ କିଏ ଦାୟୀ ରହିବେ ଜଣାପଡୁନାହିଁ।
-ଗୋବିନ୍ଦ ଚନ୍ଦ୍ର ସାହୁ, ସ୍ଥାନୀୟ ବାସିନ୍ଦା
ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ପଦକ୍ଷେପ ନିଆଯିବ
ତହସିଲ ପରିସରରେ ପୌର ପରିଷଦର ଗାଡ଼ି ପାର୍କିଂ ନେଇ ବହୁ ଅଭିଯୋଗ ହୋଇଛି। ଏ ସମ୍ପର୍କରେ ପୌର କର୍ତ୍ତୃପକ୍ଷଙ୍କୁ ମଧ୍ୟ ଅବଗତ କରାଯାଇଛି। ଯଦି ସେମାନେ ଏଥିରୁ ନିବୃତ୍ତ ନ ହୁଅନ୍ତି ତେବେ ଆଗକୁ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ପଦକ୍ଷେପ ନିଆଯିବ।
-ଅଶୋକ କୁମାର ମାଝି, ତହସିଲଦାର, ବ୍ୟାସନଗର