ବଲାଙ୍ଗୀର ଅଫିସ,୬ା୩: ବଲାଙ୍ଗୀର ଗେଟସରୋବର ପଡ଼ାରେ ଗତ ଗୁରୁବାର ବିଳମ୍ବିତ ରାତିରେ ହୋଇଥିବା ହତ୍ୟାକାଣ୍ଡ ଘଟଣାରେ ପୋଲିସ ପର୍ଦ୍ଦାଫାସ କରିଛି । ଘଟଣାରେ ୬ ଅଭିଯୁକ୍ତଙ୍କୁ ଶନିବାର ଗିରଫ ପରେ କୋର୍ଟ ଚାଲାଣ କରାଯାଇଥିବା ସ୍ଥାନୀୟ ଟାଉନ ଥାନା ପୋଲିସ କହିଛି । ସେମାନେ ହେଲେ ହାଇଦର ଅଲ୍ଲୀ(୩୬), ସାମୁଆଲ ସକେ(୩୦),ୱାସିମ ଏସକେ(୩୨), ନାଜୁ ଏସକେ(୨୧), ନବାବ ସରିଫ(୨୦) ଏବଂ ୱାହିଦୁଲ ଏସକେ(୩୩)। ସମସ୍ତ ଅଭିଯୁକ୍ତ ପଶ୍ଚିମବଙ୍ଗ ମୁରର୍ସିବାଦ ଅଞ୍ଚଳର ବୋଲି ଜଣାପଡିଛି ।
ଖବରଦାତା ସମ୍ମିଳନୀରେ ଏସ୍ଡିପିଓ ଶ୍ରୀମନ୍ତ ବାରିକ କହିଛନ୍ତି ଯେ, ଗତ ଗୁରୁବାର ରାତିରେ ଗେଟସରୋବର ପଡ଼ାରେ ଭଡ଼ା ରହୁଥିବା ୭ ଜଣ ବଙ୍ଗାଳୀଙ୍କ ମଧ୍ୟରେ ଟଙ୍କା ଭାଗ ବଣ୍ଟାକୁ ନେଇ ଗଣ୍ଡଗୋଳ ହୋଇଥିଲା । ସମସ୍ତେ ନିଶାଶକ୍ତ ଅବସ୍ଥାରେ ଥିବାବେଳେ ଶେଖ ବାନୀ(୨୩)ଙ୍କୁ ଅନ୍ୟ ସାଥୀମାନେ ନିର୍ମମ ଭାବେ ମାଡ ମାରିବା ପରେ ପଥରରେ ଛେଚିଥିଲେ । ଫଳରେ ତାଙ୍କ ମୁଣ୍ଡ ରକ୍ତାକ୍ତ ହୋଇଯାଇଥିଲା। ପରେ ତାଙ୍କୁ ଛାତ ଉପରୁ ଏକ ନାଳକୁ ଫିଙ୍ଗି ଦେଇଥିଲେ । ଶୁକ୍ରବାର ସକାଳୁ ସ୍ଥାନୀୟ ଅଞ୍ଚଳରେ ଦୁର୍ଗନ୍ଧ ହେବା ପରେ ଘଟଣା ସାମ୍ନାକୁ ଆସିଥିଲା । ଲୋକେ ଟାଉନ ଥାନା ପୁଲିସ୍କୁ ସୂଚନା ଦେଇଥିଲେ । ପୁଲିସ୍ ପହଞ୍ଚି ତଦନ୍ତ ଆରମ୍ଭ କରିଥିଲା । ଏହା ପରେ ନାଳାରୁ ଉଦ୍ଧାର ପରେ ମୃତ ଯୁବକଙ୍କ ପରିଚୟ ମିଳିଥିଲା । ସମସ୍ତେ ତାଙ୍କୁ ଶେଖ ବୋଲି ଚିହ୍ନିବା ପରେ ସାଙ୍ଗରେ ରହୁଥିବା ସହଯୋଗୀମାନଙ୍କ ପୋଲିସ୍ ଥାନାକୁ ନେଇ ପଚରାଉଚରା କରିଥିଲା । ତଦନ୍ତ ବେଳେ ଅଭିଯୁକ୍ତମାନେ ଶେଖକୁ ଟଙ୍କା ପାଇଁ ହତ୍ୟା କରିଥିବା ସ୍ବୀକାର କରିଛନ୍ତି ।
