ବଲାଙ୍ଗୀର ଅଫିସ, ୫।୩: ବଡ଼ ଭାଇଙ୍କ ମୁଥମାଡ଼ରେ ସାନ ଭାଇଙ୍କ ମୃତ୍ୟୁ। ଏଭଳିଏକ ଘଟଣା ଘଟିଛି ବଲାଙ୍ଗୀର ସହର ରବିଦାସ ନଗରରେ । ଭାଇଭାଇ ମଧ୍ୟରେ କଳହ ହୋଇ ବଡ଼ ଭାଇ ସାନ ଭାଇକୁ ହତ୍ୟା କରିଛନ୍ତି। ମୃତକ ହେଲେ ରବିଦାସ ନଗରର ଜୋସେଫ ରୋହିଦାଶ ।
ସୂଚନା ଯୋଗ୍ୟ, ଶୁକ୍ରବାର ରାତିରେ ଜୋସେଫ ମଦପିଇ ଘରକୁ ଆସଥିଲେ। ଛୋଟ ପିଲାଙ୍କ କଥାକୁ ଧରି ବଡ଼ଭାଇ ରାଜୀନ ରୋହିଦାଶଙ୍କ ସହିତ ପାଟି ତୁଣ୍ଡ କରିଥିଲେ। ଏଥିରେ ରାଜୀନ ଉତ୍ତ୍ୟକ୍ତ ହୋଇ ଜୋସେଫଙ୍କ ତଣ୍ଟିକୁ ଜୋର୍ରେ ଧରି ମୁହଁରେ ମୁଥ ମାରିଥିଲେ । ଫଳରେ ସାନଭାଇ ଚେତାଶୂନ୍ୟ ହୋଇ ପଡ଼ିଯାଇଥିଲେ । ପରିବାର ଲୋକେ ତାଙ୍କୁ ଉଦ୍ଧାର କରି ଭୀମଭୋଇ ମେଡିକାଲକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବରପାଇ ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା। ବଡ଼ ଭାଇ ରାଜୀନଙ୍କୁ ପୋଲିସ ଅଟକ ରଖି ପଚରାଉଚରା କରିବା ସହ ଘଟଣାର ତଦନ୍ତ ଜାରି ରଖିଛି।
