ଗୁଣପୁର,୧୨।୧୧(ଡି.ଏନ୍.ଏ): ରାୟଗଡ଼ା ଜିଲା ଗୁଣପୁର ବ୍ଲକ ପୁଟାସିଂରେ ଜଣେ ଯୁବକଙ୍କ ଆକ୍ରମଣରେ ରୁଟି ବ୍ୟବସାୟୀଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ୨ ଜଣ ଗୁରୁତର ଅଛନ୍ତି। ମୃତକ ହେଲେ ଲବା ଅଞ୍ଚଳର ମନୋଜ କୁମାର ସେନାପତି। ସେ ଗୁଣପୁର ସହର ଶବରୀବିହାରରେ ରହୁଥିଲେ। ପୋଲିସ ଆକ୍ରମଣ କରିଥିବା ଯୁବକଙ୍କୁ ଅଟକ ରଖି ପଚାରଉଚରା କରୁଛି।
ପୁଟାସିଂ ଥାନା ଅଧିକାରୀ ଦିନବନ୍ଧୁ ଶବରଙ୍କ ସୂଚନାନୁଯାୟୀ, ଗୁରୁବାର ରାତିରେ ପୁଟା ମହୁଲ ବଣିଆ ଗ୍ରାମର ରାମନା ଭୂୟାଁ ଏକ ମେଡିସିନ୍ ଷ୍ଟୋରକୁ ଔଷଧ ପାଇଁ ଯାଇଥିଲେ। ସେଠାରେ ଔଷଧ ମାଗିବା ସହ ନିକଟରେ ଥିବା ଜଣେ ବ୍ୟକ୍ତିଙ୍କୁ କଇଁଚିରେ ଆକ୍ରମଣ କରିଥିଲେ। ଏହା ଦେଖି ସେଠାରେ ଉପସ୍ଥିତ ଥିବା ଗଁାର ଅନ୍ୟ ଜଣେ ତାଙ୍କୁ ଛଡାଇବାକୁ ଆସିଥିଲେ। ତାଙ୍କୁ ମଧ୍ୟ ସେ ଉକ୍ତ କଇଁଚିରେ ଆକ୍ରମଣ କରିଥିଲେ। ସେହି ସମୟରେ ମନୋଜ ସେଠାରେ ପହଞ୍ଚି ଥିଲେ। ରାମନା ମନୋଜଙ୍କ ବେକକୁ କଇଁଚିରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ମନୋଜଙ୍କୁ ପ୍ରଥମେ ପୁଟାସିଂ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରୁ ଗୁଣପୁର ଉପଖଣ୍ଡ ସ୍ବାସ୍ଥ୍ୟକେନ୍ଦ୍ର ଓ ବ୍ରହ୍ମପୁରକୁ ସ୍ଥାନାନ୍ତର କରାଯାଇଥିଲା। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଥିଲା। କଟକରେ ଚିକିତ୍ସାଧୀନ ଅବସ୍ଥାରେ ଶୁକ୍ରବାର ମନୋଜଙ୍କ ମୃତ୍ୟୁ ଘଟିଥିବା ଥାନା ଅଧିକାରୀ କହିଛନ୍ତି।