ନୂଆପଡ଼ା ଅଫିସ,୧୦।୧୧: ନୂଆପଡା ସଦର ଥାନା ଟାନୱାଟ ପଞ୍ଚାୟତ ରତିପାଲି ଗାଁର ଯୁକ୍ତ ୨ ପ୍ରଥମ ବର୍ଷ ଛାତ୍ରୀ ନିଖୋଜ ଘଟଣାର ରହସ୍ୟ ବେନାମୀ ଚିଠି ଆଧାରରେ ବୁଧବାର ସଦର ଥାନା ପୋଲିସ ପର୍ଦ୍ଦାଫାଶ କରିଛି। ଏହି ଘଟଣାରେ ୪ଜଣ ଯୁବକଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିବା ବେଳେ ୨ ନାବାଳକଙ୍କୁ ବାଳସୁଦ୍ଧା ଗୃହକୁ ପଠାଯାଇଛି। ମୁଖ୍ୟ ଅଭିଯୁକ୍ତ ହେଲେ ରତିପାଲି ଗାଁର ପ୍ରମାନନ୍ଦ ସାହୁ ଓରଫ ସୋନୁ (୧୯)। ସହଯୋଗୀମାନେ ହେଲେ ମାହୁଲିଭଟାର ବନମାଳୀ ରାଉତ (୨୨), ଝିଲମିଲା ଗାଁର ଡମ୍ବରୁଧର ରାଉତ (୨୧), ଗୋବରା ଗାଁର ବସନ୍ତ ରାଉତ (୧୯)। ରତିପାଲି ଗାଁର ଟ୍ରାକ୍ଟର ଡ୍ରାଇଭର ପ୍ରମାନନ୍ଦ ସାହୁଙ୍କ ସହିତ ପ୍ରେମ ସମ୍ପର୍କ ରହିଥିଲା। ମୃତା ଛାତ୍ରୀ ୪ ମାସର ଗର୍ଭବତୀ ଥିବାରୁ କୌଣସି ଉପାୟ ନ ପାଇ ଯୋଜନାବଦ୍ଧ ଭାବେ ହତ୍ୟା କରାଯାଇଛି ବୋଲି ଆୟୋଜିତ ଖବରଦାତା ସମ୍ମିଳନୀରେ ଅତିରିକ୍ତ ଆରକ୍ଷୀ ଅଧୀକ୍ଷକ ଇନ୍ଦ୍ରମଣି ବେହେରା ସୂଚନା ଦେଇଛନ୍ତି।
ପ୍ରାପ୍ତ ସୂଚନା ମୁତାବକ, ସଦର ଥାନା ରତିପାଲି ଗାଁର ଧନିରାମ ନାଏକଙ୍କ ଝିଅ ହିତେଶ୍ୱରୀ ନାଏକ (୧୭) ଏକଲବ୍ୟ ବିଦ୍ୟାଳୟରେ ଯୁକ୍ତ ୨ ପ୍ରଥମ ବର୍ଷରେ ପଢ଼ୁଥିଲେ। ଗତବର୍ଷ ଡିସେମ୍ବରରେ ବଡ଼ଦିନ ଛୁଟିରେ ଘରକୁ ଆସିଥିଲେ। ସେହି ସମୟରେ ସେ ୪ ମାସର ଗର୍ଭବତୀ ଥିଲେ। ଏ ନେଇ ପ୍ରମାନନ୍ଦଙ୍କୁ ହିତେଶ୍ୱରୀ ଗର୍ଭପାତ କରିବା ପାଇଁ ବାରମ୍ବାର କହିବା ସତ୍ତ୍ୱେ ମଧ୍ୟ କରାଇ ନ ଥିଲେ। ଓଲଟି ପ୍ରମାନନ୍ଦ ସାଙ୍ଗମାନଙ୍କ ସହ ମିଶି ଜାନୁୟାରୀ ୨ ତାରିଖରେ ଠାକୁରବନ୍ଧଠାରେ ବସି ହତ୍ୟା ଯୋଜନା କରିଥିଲେ। ୩ ତାରିଖ ରାତିରେ ପ୍ରମାନନ୍ଦ ତାଙ୍କ ୫ଜଣ ସାଙ୍ଗଙ୍କ ମିଶି ଫୋନ କରି ହିତେଶ୍ୱରୀଙ୍କୁ ଡାକିଥିଲେ। ହିତେଶ୍ୱରୀ ଆସିବାକ୍ଷଣି ସାଙ୍ଗମାନଙ୍କ ସହ ଉଠାଇ ନେଇ ପ୍ରମାନନ୍ଦ ବେକରେ ରଶି ଲଗାଇ ହତ୍ୟା କରିଥିବା ବେଳେ ସାଙ୍ଗମାନେ ଦେହକୁ ଜାବୁଡି ଧରିଥିଲେ। ପରେ ୨ କି.ମି. ଦୂର ଦୁଖୁ ଶବରଙ୍କ ଜମିରେ ନେଇ ପୋତି ଦେଇଥିଲେ। ଛାତ୍ରୀ ନିଖୋଜ ହେବାରୁ ୧୦ ମାସ ପରେ ମଧ୍ୟ ପୋଲିସ କୌଣସି ଖୋଜ ଖବର ପାଇ ନ ଥିଲା। ହଠାତ୍ ଏକ ବେନାମୀ ଚିଠି ଆସିବାରୁ ସେହି ଆଧାରରେ ତଦନ୍ତ କରି ପୋଲିସ ନିଖୋଜ ଛାତ୍ରୀଙ୍କ କଙ୍କାଳ ଉଦ୍ଧାର କରିବା ସହ ଅଭିଯୁକ୍ତମାନଙ୍କୁ ଗିରଫ କରିଛି। ଛାତ୍ରୀଙ୍କୁ ହତ୍ୟା କରାଯାଇଥିବା ରଶି, ଗୋଲାପି ରଙ୍ଗର ସୁଇଟର, ଇନର,ସକ୍ସ, ଶରୀରର ଚିହ୍ନ, ଚୂଡି ଓ କଙ୍କାଳ ଜବତ କରାଯାଇଛି। ଘଟଣାସ୍ଥଳରେ ଗଳିତ ମୃତଦେହ ବ୍ୟବଚ୍ଛେଦ କରାଯାଇଥିବା ବେଳେ ପରବର୍ତ୍ତୀ ବ୍ୟବଚ୍ଛେଦ ପାଇଁ ବୁର୍ଲା ମେଡିକାଲ କଲେଜକୁ ପଠାଯାଇଛି। ହାଡ ଓ ମୃତ ଶରୀରର ଡିଏନଏ ପରୀକ୍ଷା ପାଇଁ ସଂରକ୍ଷିତ ରଖାଯାଇଛି ବୋଲି ଏଏସ୍ପି ବେହେରା ସୂଚନା ଦେଇଛନ୍ତି। ଖବରଦାତା ସମ୍ମିଳନୀରେ ଉପଖଣ୍ଡ ଅଧିକାରୀ ପ୍ରଶାନ୍ତ କୁମାର ପଟ୍ଟନାୟକ, ସଦର ଥାନାଧିକାରୀ ନିର୍ମଳ ଚନ୍ଦ୍ର ପାଣିଗ୍ରାହୀ, ଏସ୍ଆଇ ବିନୋଦ ବିହାରୀ ସେଠୀ ପ୍ରମୁଖ ଉପସ୍ଥିତ ଥିଲେ।