ଜଗତସିଂହପୁର ଅଫିସ, ୧୫ା୬: ଜଗତ୍ସିଂହପୁର ଥାନା ଅନ୍ତର୍ଗତ ମଙ୍ଗଳପୁର ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଅଭୟଚାନ୍ଦପୁର ଥାନା ଢ଼ିଙ୍କିଆ ତ୍ରିଲୋଚନପୁର ଗ୍ରାମର ପ୍ରଦୀପ ଘଡେଇଙ୍କ ଝିଅ ସଂଯୁକ୍ତା ଓରଫ ଶ୍ରୀୟାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ପ୍ରଦୀପଙ୍କ ଅଭିଯୋଗ ଆଧାରରେ ଜଗତ୍ସିଂହପୁର ଥାନାରେ ମାମଲା ରୁଜୁ କରଯାଇ ଅଭିଯୁକ୍ତ ସ୍ବାମୀ ସ୍ବରୂପ ଗୋଛାୟତଙ୍କୁ ଥାନାରେ ଅଟକ ରଖି ପଚରାଉଚୁରା କରାଯାଉଛି। ଅଭିଯୋଗ ଅନୁଯାୟୀ, ୨୦୧୩ରେ ଶ୍ରୀୟା ଓ ସ୍ବରୂପଙ୍କ ମଧ୍ୟରେ ହିନ୍ଦୁ ରୀତିନୀତି ଅନୁଯାୟୀ ବିବାହ ହୋଇଥିଲା। ଦାବି ମୁତାବକ ଯୌତୁକ ଦିଆଯାଇଥିଲା। କିନ୍ତୁ ଅଧିକ ୫୦ ହଜାର ଟଙ୍କା ଯୌତୁକ ଦାବି କରି ବିଭିନ୍ନ ସମୟରେ ଅଭିଯୁକ୍ତ ସ୍ବରୂପ ଓ ତାଙ୍କ ବାପା ଶ୍ରୀୟାଙ୍କୁ ମାରଧର କରୁଥିଲେ । ଏପରି କି ମାରିଦେବା ପାଇଁ ଉଦ୍ୟମ କରିଥିଲେ। ଭଦ୍ର ଲୋକଙ୍କ ଉପସ୍ଥିତିରେ ଏହାର ସମାଧାନ ହୋଇଥିଲା। ଗତ ୧୨ ତାରିଖରେ ଶ୍ରୀୟାଙ୍କୁ ମାଡ ହୋଇଥିବା ସେ ତାଙ୍କ ଭାଇଙ୍କୁ ଫୋନରେ କହିଥିଲେ। ତା’ପରେ ଶ୍ରୀୟା ଆତ୍ମହତ୍ୟା ଉଦ୍ୟମ କରିଛନ୍ତି ବୋଲି ସ୍ବରୂପ ଶ୍ୱଶୁରଘରକୁ ଫୋନ କଲ କରି ଜଣାଇଥିଲେ। ଏନେଇ ଶ୍ରୀୟାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି ବୋଲି ସେ କହିଥିଲେ। ଖବର ପାଇ ପ୍ରଦୀପ ପଡୋଶୀଙ୍କ ସହ ମିଶି ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚତ୍ଲା ବେଳକୁ ଶ୍ରୀୟାଙ୍କୁ ଡାକ୍ତର ମୃତ ଘୋଷଣା କରିଥିବା ଜଣାପଡ଼ିଥିଲା। ଶ୍ରୀୟାଙ୍କୁ ହତ୍ୟା କରାଯାଇଥିବା ଅଭିଯୋଗ କରି ଅଭିଯୁକ୍ତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ପ୍ରଦୀପ ଦାବି କରିଛନ୍ତି। ଶ୍ରୀୟାଙ୍କ ୨ଟି କନ୍ୟା ସନ୍ତାନ ଥିବାବେଳେ ସେମାନଙ୍କ ଜୀବନପ୍ରତି ବିପଦ ଆଶଙ୍କା କରି ସୁରକ୍ଷା ଯୋଗାଇଦେବାକୁ ସେ ଥାନାରେ ଲିଖିତ ଭାବେ ଜଣାଇଛନ୍ତି।