ବ୍ରଜରାଜନଗର,୨୯ା୩ (ଡି.ଏନ୍.ଏ.): ଝାରସୁଗୁଡ଼ା ଟାଉନ ଥାନା ଅନ୍ତର୍ଗତ ସରବହାଲ ଅଞ୍ଚଳରେ ଏକ ଅଭାବନୀୟ ଘଟଣା ଘଟିଛି। ଏଠାରେ ବାସ କରୁଥିବା ସୁମିତ ଅଗ୍ରଓ୍ବାଲଙ୍କ ପୁଅ ସମର୍ଥ ଅଗ୍ରଓ୍ବାଲ (୧୫)ଙ୍କୁ ୫୦ଲକ୍ଷ ଟଙ୍କା ପାଇଁ ହତ୍ୟା କରାଯାଇଛି। ଘଟଣାରେ ସମ୍ପୃକ୍ତ ୨ ଅଭିଯୁକ୍ତଙ୍କୁ ଗିରଫ କରାଯାଇଛି। ସେମାନେ ହେଲେ ଝାରସୁଗୁଡ଼ା ସଦର ଥାନା ଅଧୀନ ବିଜୁ ନଗରର ଅମିତ କୁମାର ଶର୍ମା ଓ ବ୍ରଜରାଜନଗର ଥାନା ଅଧୀନ ଗାନ୍ଧୀ ଛକ ଅଞ୍ଚଳର ଦିନେଶ ଅଗ୍ରୱାଲ। ଏ ସମ୍ପର୍କରେ ବୁଧବାର ଏକ ଖବରଦାତା ସମ୍ମିଳନୀ କରି ଝାରସୁଗୁଡ଼ା ଏସ୍ପି ପରମର ସ୍ମିଥ ପୁରୁଷୋତ୍ତମ ଦାସ ସୂଚନା ଦେଇଛନ୍ତି।
ଏସ୍ପି ଦାସଙ୍କ ସୂଚନା ଅନୁଯାୟୀ, ସରବାହଲରେ ରହୁଥିବା ସମର୍ଥ ସବୁଦିନ ଭଳି ସୋମବାର ଅପରାହ୍ନରେ ନିଜ ସ୍କୁଟି ଧରି ଖେଳିବାକୁ ଯାଇଥିଲେ। ବାଟରେ ତାଙ୍କ ପରିବାରର ସମ୍ପର୍କୀୟ ଅମିତ ତାଙ୍କ ସ୍କୁଟିରେ ବସି ଯାଇଥିଲେ। କିଛିବାଟ ଯିବା ପରେ ଅମିତଙ୍କ ସହଯୋଗୀ ଦିନେଶଙ୍କ ସହିତ ମିଶି ସମର୍ଥଙ୍କୁ ଅପହରଣ କରିଥିଲେ। ଏଣେ ସନ୍ଧ୍ୟା ପରେ ପୁଅ ଘରକୁ ନ ଫେରିବାରୁ ପରିବାର ଲୋକେ ଚିନ୍ତାରେ ରହିଥିଲେ। ଫୋନ କରିଥିଲେ ମଧ୍ୟ ସମର୍ଥଙ୍କ ମୋବାଇଲ ସୁଇଚ୍ ଅଫ୍ ରହିଥିବାରୁ ପରିବାରର ଚିନ୍ତା ବଢ଼ିଯାଇଥିଲା। ରାତି ୯ଟା ସମୟରେ ସମର୍ଥଙ୍କ ମୋବାଇଲରୁ ଫୋନ ଆସିଥିଲା। ୫୦ଲକ୍ଷ ଟଙ୍କା ଦେଇ ପୁଅକୁ ନେଇଯାଅ ବୋଲି ଅଭିଯୁକ୍ତମାନେ ଫୋନ୍ରେ କହିଥିଲେ। ଫୋନ କଲ୍ ପାଇବା ପରେ ପରିବାର ସଦସ୍ୟ ତୁରନ୍ତ ଝାରସୁଗୁଡ଼ା ଟାଉନ ଥାନାରେ ଅଭଯୋଗ କରିଥିଲେ। ପୋଲିସ ଅଭିଯୁକ୍ତଙ୍କୁ ଧରିବା ପାଇଁ ୩ଗୋଟି ଟିମ୍ କରି ପ୍ରଥମେ ପଡୋଶୀ ଜିଲାରେ ତଦନ୍ତ କରିଥିଲା। ଅଭିଯୁକ୍ତମାନେ ପୋଲିସର ଗତିବିଧି ଉପରେ ନଜର ରଖି ସମର୍ଥଙ୍କୁ ହତ୍ୟା କରି ବରଗଡ଼ ଜିଲାର ଭେଡେନ ଥାନା ଅଞ୍ଚଳରେ ପୋଡ଼ିଦେଇଥିଲେ। ତେବେ ପୋଲିସ କୌଣସି ସୂତ୍ରରୁ ଜାଣିପାରି ଅଭିଯୁକ୍ତ ଦ୍ୱୟଙ୍କୁ ଧରିବାରେ ସଫଳ ହୋଇଥିଲା। ତେବେ ହତ୍ୟାର କାରଣ ଟଙ୍କା ନା ପାରିବାରିକ ଶତ୍ରୁତା ତାହା ପୋଲିସ ସ୍ପଷ୍ଟ ହୋଇନାହିଁ। ଏମାନଙ୍କ ସହିତ ଆଉକେହି ସମ୍ପୃକ୍ତ ଥାଇପାରନ୍ତି ବୋଲି ପୋଲିସ ସନ୍ଦେହ କରୁଛି। ତେବେ ତଦନ୍ତ ପରେ ସବିଶେଷ ତଥ୍ୟ ଜଣାପଡିବ ବୋଲି ଏସ୍ପି ଦାସ ପ୍ରକାଶ କରିଛନ୍ତି। ଅଭିଯୁକ୍ତ ଦ୍ବୟ ଦୋଷ ସ୍ବୀକାର କରିବା ପରେ ଜେଲ ହାଜତକୁ ପଠାଇ ଦିଆଯାଇଛି।