ଦିଗପହଣ୍ଡି,୧୮ା୧୨(ଡି.ଏନ୍.ଏ.): ଗଞ୍ଜାମ ଜିଲା ପାଟପୁର ଥାନା ଅଧୀନ ଜିଉରା ଗ୍ରାମରେ ସ୍ତ୍ରୀଙ୍କୁ ତଣ୍ଟିଚିପି ହତ୍ୟା ପରେ ସ୍ବାମୀ ବିଲରେ ଫିଙ୍ଗି ଦେଇଥିବା ଅଭିଯୋଗ ହୋଇଛି।
ମୃତା ମହିଳା ହେଲେ ଜୟନ୍ତୀ ସାହୁ। ପୋଲିସ ରବିବାର ତାଙ୍କ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଅଭିଯୁକ୍ତ ସ୍ବାମୀ ନାରାୟଣ ସାହୁଙ୍କୁ ଅଟକ ରଖିଛି।
ସାନଖେମୁଣ୍ଡି ବ୍ଲକ ପାଟପୁର ରାଧାଦେଇପୁର ଗ୍ରାମର ଦାମ ସାହୁଙ୍କ ଝିଅ ଜୟନ୍ତୀ ଜିଉରା ଗ୍ରାମର ନାରାୟଣଙ୍କୁ ପ୍ରାୟ ୧୫ବର୍ଷ ପୂର୍ବେ ବିବାହ କରିଥିଲେ। ସେମାନଙ୍କର ୨ଟି ପୁଅ ଓ ଗୋଟିଏ ଝିଅ। ଜୟନ୍ତୀଙ୍କ ବାପଘର ଲୋକ ମଧ୍ୟ କିଛି ବର୍ଷ ହେଲା ଗାଁ ଛାଡ଼ି ଜିଉରାରେ ରହି ଆସୁଛନ୍ତି। ନାରାୟଣ ବିଭିନ୍ନ ସମୟରେ ନିଶାସକ୍ତ ହୋଇ ଘରକୁ ଆସି ଜୟନ୍ତୀଙ୍କୁ ମାଡ ମାରୁଥିଲେ। ଶନିବାର ରାତିରେ ମଧ୍ୟ ସେ ଏଭଳି ଆସି କୌଣସି କଥାକୁ ନେଇ ସ୍ତ୍ରୀଙ୍କ ସହ ପାଟିତୁଣ୍ଡ କରିଥିଲେ। ରବିବାର ସକାଳେ ବାରିପଟ ଚାଷ ଜମିରେ ଜୟନ୍ତୀଙ୍କ ମୃତଦେହ ପଡ଼ିଥିବା କେତେଜଣ ଗ୍ରାମବାସୀ ଓ ବାପଘର ଲୋକେ ଦେଖି ପୋଲିସକୁ ଖବର ଦେଇଥିଲେ। ପାଟପୁର ଥାନା ଆଇଆଇସି ସବ୍ୟସାଚୀ ମଲ୍ଲ ସଦଳବଳ ଘଟଣାସ୍ଥଳକୁ ଆସି ତଦନ୍ତ କରିବା ସହ ଅଭିଯୁକ୍ତ ନାରାୟଣଙ୍କୁ କାବୁ କରିଥିଲେ। ଏ ନେଇ ଜୟନ୍ତୀଙ୍କ ଭାଇ ଚେରୁ ସାହୁଙ୍କ ଏତଲାକ୍ରମେ ପୋଲିସ ଏକ ମାମଲା(ନଂ. ୪୫୮/୨୨) ରୁଜୁ କରିଛି। ପୋଲିସ ମୃତଦେହ ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଇଛି। ଜୟନ୍ତୀଙ୍କ ବେକରେ କ୍ଷତ ଚିହ୍ନ ରହିଛି। ତାଙ୍କୁ ତଣ୍ଟିଚିପି ଶ୍ୱାସରୁଦ୍ଧ କରି ମାରି ଦିଆଯାଇଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡିଥିଲେ ମଧ୍ୟ ବ୍ୟବଚ୍ଛେଦ ରିପୋର୍ଟ ଆସିଲେ ମୃତ୍ୟୁର କାରଣ ଜଣାପଡ଼ିବ ବୋଲି ଆଇଆଇସି କହିଛନ୍ତି।