ଭବାନୀପାଟଣା,୨୫ା୨(ସ୍ବ.ପ୍ର.): କେବେ ପ୍ରେମ ପାଇଁ ଅପହରଣ ତ କେବେ ହତ୍ୟା। ପ୍ରେମରେ ଅନ୍ଧ ହୋଇ ମଣିଷ ନିଜର ହିତାହିତ ଜ୍ଞାନ ଭୁଲି ନିଜ ସାଙ୍ଗର ଜୀବନ ନେବାକୁ ମଧ୍ୟ ପଛାଉ ନାହିଁ। ଏଭଳି ଏକ ଅଭାନୀୟ ଘଟଣା ଦେଖିବାକୁ ମିଳିଛି କଳାହାଣ୍ଡି ଜିଲା ଜୟପାଟଣା ଥାନା ଅଞ୍ଚଳରେ। ଏଠାରେ ତ୍ରିକୋଣୀୟ ପ୍ରେମରୁ ଦିଲୀପ ବାଗ ନାମକ ଜଣେ ଯୁବକଙ୍କୁ ହତ୍ୟା କରାଯାଇଛି। ଏହି ଘଟଣାରେ ଜୟପାଟଣା ପୋଲିସ ହାତରେ ୪ ଜଣ ଧରାପଡିଛନ୍ତି। ସେଥିମଧ୍ୟରୁ ଜଣେ ନାବାଳକ ରହିଛନ୍ତି। ଶନିବାର ୩ ଅଭିଯୁକ୍ତକୁ ପୋଲିସ ଗିରଫ କରି କୋର୍ଟ ଚାଲାଣ କରିଛ। ସେମାନେ ହେଲେ ମୋହନ ମାଝି, ଅବତାର ମାଝି, ଚନ୍ଦ୍ର ମାଝି। ସେହିପରି ଏହି ମାମଲାରେ ମୁଖ୍ୟ ଅଭିଯୁକ୍ତଙ୍କ ସହ ସାମିଲ ଥିବା ଜଣେ ନାବାଳକଙ୍କୁ ଜୁଭେନାଇଲ ଜଷ୍ଟିସ ବୋର୍ଡରେ ହାଜର କରାଯାଇଛି। ଅଭିଯୁକ୍ତଙ୍କଠାରୁ ଅପରାଧରେ ବ୍ୟବହୃତ ସାମଗ୍ରୀ ପୋଲିସ ଜବତ କରିଛି। ଏ ନେଇ ସ୍ଥାନୀୟ ଥାନାରେ ଆୟୋଜିତ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି ଜୟପାଟଣା ଆଇଆଇସି ବାସୁଦେବ ଛତ୍ରିଆ।
ମିଳିଥିବା ସୂଚନା ଅନୁଯାୟୀ,ଗତ ୧୯ ତାରିଖରେ ଜୟପାଟଣା ଥାନା ପୋଲୋକାମୁଣ୍ଡା ଗ୍ରାମର ଦିଲୀପ ବାଗ(୧୭)ନାମକ ଜଣେ କଲେଜ ଛାତ୍ର ନିଖୋଜ ଥିବା ନେଇ ସ୍ଥାନୀୟ ଥାନାରେ ତାଙ୍କ ବାପା ଧୋବା ବାଗ ଅଭିଯୋଗ କରିଥିଲେ। ପରେ ଗତ ୨୧ ତାରିଖରେ କାଦୋପଦର ହାତୀ ନଦୀ ଘାଟ ନିକଟରେ ଜଣେ ଅଜଣା ବ୍ୟକ୍ତିଙ୍କ ମୃତଦେହକୁ ଉଦ୍ଧାର କରାଯାଇଥିଲା। ଯାହାକି ନିଖୋଜ ଥିବା ଦିଲୀପଙ୍କ ମୃତଦେହ ବୋଲି ପ୍ରାଥମିକ ତଦନ୍ତରୁ ପୋଲିସ ଜାଣିପାରିଥିଲା। ପରେ ଦିଲୀପଙ୍କ ପରିବାର ଲୋକେ ହତ୍ୟା ଅଭିଯୋଗ ଆଣିଥିଲେ। ପୋଲିସ ଘଟଣାର ତଦନ୍ତ ଜାରି ରଖି ଦିଲୀପଙ୍କ ୨ ଜଣ ସାଙ୍ଗ ମୋହନ ମାଝି ଓ ଜଣେ ନାବାଳକଙ୍କୁ ପ୍ରଥମେ ଅଟକ ରଖି ପଚରାଉଚରା କରିଥିଲା। ପରବର୍ତ୍ତୀ ସମୟରେ ଅନ୍ୟ ୨ ଜଣଙ୍କୁ ମଧ୍ୟ ଏଥିରେ ସାମିଲ ଥିବା ଅଭିଯୋଗରେ ଅଟକ ରଖି ପଚାରାଉଚରା କରିଥିଲା। ତଦନ୍ତ ପରେ ତ୍ରିକୋଣୀୟ ପ୍ରେମ ସମ୍ପର୍କରୁ ଦିଲୀପଙ୍କ ହତ୍ୟା ହୋଇଥିବା ଜଣାପଡ଼ିଥିଲା। ଜଣେ ଝିଅକୁ ମୃତକ ଦିଲୀପ ଓ ମୋହନ ଭଲ ପାଉଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା। ପରବର୍ତ୍ତୀ ସମୟରେ ଏହା ହତ୍ୟାର ରୂପ ନେଇଥିଲା। ଗତ ୧୮ ତାରିଖରେ ମୋହନ ଓ ନାବାଳକ ଦିଲୀପଙ୍କୁ କୌଶଳ କ୍ରମେ ନିକଟସ୍ଥ ଏକ ନାଳକୁ ନେଇ ହତ୍ୟା କରିଥିଲେ। ପରେ ନିକଟରେ ବାର୍ହା ଶିକାର ପାଇଁ ବିଛା ଯାଇଥିବା ବିଦ୍ୟୁତ୍ତାର ଫାଶରେ ଦିଲୀପକୁ ଠେଲି ଦେଇ ଚାଲି ଆସିଥିଲେ। ଫାଶ ପକାଇଥିବା ଦରଲୀପଡ଼ା ଗାଁର ଦୁଇ ଚାଷୀ ଅବତାର ମାଝି ଓ ଚନ୍ଦ୍ର ମାଝି ଫାଶ ତାରରେ ମୃତଦେହ ପଡିଥିବା ଦେଖି ଭୟଭୀତ ହୋଇପଡ଼ିଥିଲେ। ବିଦ୍ୟୁତ୍ ସଂସ୍ପର୍ଶରେ ଆସି ଯୁବକଙ୍କ ମୃତ୍ୟୁ ହୋଇଥିବା ଭାବି ସେମାନେ ଗୋଟିଏ ଦିନ ମୃତଦେହକୁ ଲୁଚାଇ ରଖିଥିଲେ। ପରେ ମୃତଦେହକୁ ହାତୀ ନଦୀରେ ଫିଙ୍ଗି ଦେଇଥିଲେ। ନଦୀରେ ଭାସି ମୃତଦେହ କାଦୋପଦର ନଦୀଘାଟ ନିକଟରେ ଲାଗିଥିଲା। ଯାହାକୁ ଦେଖି ସ୍ଥାନୀୟ ଲୋକେ ପୋଲିସକୁ ସୂଚନା ଦେଇଥିଲେ। ଏ ନେଇ ଜୟପାଟଣା ଥାନାରେ କେସ୍ ନଂ ୪୩/୨୩ରେ ଏକ ମାମଲା ରୁୁଜୁ ହୋଇଛି।