ସିମୁଳିଆ,୧୮ା୬(ଡି.ଏନ୍.ଏ.): ବାଲେଶ୍ୱର ଜିଲା ସିମୁଳିଆ ତହସିଲ ରାସ୍ତାରେ ଶନିବାର ଭୋର୍ ସମୟରେ ପ୍ରଦୀପ କୁମାର ନାୟକ ଓରଫ ବଳିଆ(୩୫) ନାମକ ଜଣେ ଯୁବକଙ୍କୁ ନିର୍ମମ ଭାବେ ହତ୍ୟା କରାଯାଇଛି। ଦୁର୍ବୃତ୍ତମାନେ ତାଙ୍କ ବେକ ଓ ମୁଣ୍ଡକୁ କୌଣସି ଧାରୁଆ ଅସ୍ତ୍ରରେ ହାଣି ହତ୍ୟା କରିବା ସହିତ ତାଙ୍କ ହାତ ଭାଙ୍ଗି ଯାଇଥିବାର ଜଣାଯାଇଛି। ମୃତ ବଳିଆଙ୍କ ଘର ସ୍ଥାନୀୟ ରିଆ ଗ୍ରାମରେ ଓ ସେ ଜଣେ ଡ୍ରାଇଭର ଅଟନ୍ତି। ଶୁକ୍ରବାର ରାତି ୨ଟାରେ ବଳିଆ ଡ୍ୟୁଟିରୁ ଫେରିବା ପରେ ଏହି ହତ୍ୟାକାଣ୍ଡ ଭୋର୍ ୩ଟା ମଧ୍ୟରେ ଘଟିଥିବାର ସ୍ଥାନୀୟ ଲୋକମାନେ ସୂଚନା ଦେଇଛନ୍ତି। ତେବେ ହତ୍ୟାକାଣ୍ଡର କାରଣ ଅସ୍ପଷ୍ଟ ରହିଛି। ଅପରାହ୍ନରେ ଘଟଣାସ୍ଥଳରେ ପୋଲିସ, ସନ୍ଧାନୀ କୁକୁର ସହିତ ସାଇଣ୍ଟିଫିକ ଟିମ୍ ପହଞ୍ଚି ତଦନ୍ତ କରି ଫେରିଯାଇଥିଲେ ହେଁ କୌଣସି ସୁରାକ ମିଳିପାରିନାହିଁ। ନିଜ ଘରଠାରୁ କିଛି ଦୂର ତହସିଲ-ରିଆ ଗାଁ ରାସ୍ତାର ଏକ ଖୋଲା ସ୍ଥାନରେ ବଳିଆ ପ୍ରତ୍ୟେକ ଦିନ କିଛି ସମୟ ବସି ଘରକୁ ଯାଉଥିବାର ତାଙ୍କ ପରିବାର ଲେକେ କହିଛନ୍ତି। ହତ୍ୟାକାଣ୍ଡ ଘଟିଥିବା ଉକ୍ତ ସ୍ଥାନରେ ବଳିଆଙ୍କ ବାଇକ (ଓଡି ୨୨ବି ୭୬୩୭) ରହିଥିବା ବେଳେ ତାଙ୍କ ଚପଲ ମଧ୍ୟ ପଡ଼ିଛି। ତେବେ କେଉଁ କାରଣକୁ ନେଇ ସେ ହତ୍ୟାକାଣ୍ଡର ଶିକାର ହେଲେ ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
ଅପରପକ୍ଷେ ଦୁର୍ଘଟଣାସ୍ଥଳରୁ ପ୍ରାୟ ୨୦ ଫୁଟ ଦୂର ନୟନଜୋଡ଼ି ମଧ୍ୟରୁ ପ୍ରଭାସ କୁମାର ଜେନା(୨୮) ନାମକ ଅନ୍ୟ ଜଣେ ଯୁବକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି। ତାଙ୍କ ଘର ମଧ୍ୟ ରିଆ ଅଞ୍ଚଳରେ ଓ ସେ ମୃତ ବଳିଆଙ୍କ ପଡ଼ୋଶୀ ଅଟନ୍ତି। ପ୍ରଭାସ ବାଙ୍ଗାଲୋରରେ କାର୍ଯ୍ୟ କରୁଥିବା ବେଳେ ରଜ ଉତ୍ସବ ପାଇଁ ଗାଁକୁ ଆସିଥିଲେ। ତାଙ୍କୁ କଟକର ଏକ ଘରୋଇ ମେଡିକାଲରେ ଭର୍ତ୍ତି କରାଯାଇଛି। ହତ୍ୟାକାଣ୍ଡ ସ୍ଥଳର କିଛି ଦୂରରେ ପ୍ରଭାସଙ୍କ ବାଇକ(ଓଡି ୨୨ୟୁ ୭୪୪୬) ପଡ଼ିିଥିବାର ଦେଖାଯାଇଛି। କୋମା ଅବସ୍ଥାରେ ଆଇସିୟୁରେ ଭର୍ତ୍ତି ହେବାରୁ ପ୍ରଭାସଙ୍କ ନିକଟରୁ କୌଣସି ସୁରାକ ମିଳିପାରିନାହିଁ। ତେବେ ରାସ୍ତାରେ ରକ୍ତ ଜୁଡୁବୁଡୁ ଅବସ୍ଥାରେ ପଡ଼ିଥିବା ବଳିଆଙ୍କୁ ଦେଖି ପ୍ରଭାସ ଭୟରେ ଦୁର୍ଘଟଣାଗ୍ରସ୍ତ ହୋଇଛନ୍ତି କିମ୍ବା ଅନ୍ୟ କିଛି ଘଟଣା ଘଟିଛି ତାହା ଜଣାଯାଇନାହିଁ। ତଦନ୍ତ ପରେ ଯାହାକିଛି ଜଣାପଡ଼ିବ ବୋଲି ପୋଲିସ କହିଛି।