ଟିକିରି,୧୦ା୭(ଡି.ଏନ୍.ଏ.): ରାୟଗଡ଼ା ଜିଲା କାଶୀପୁର ଥାନା ଅଧୀନ ଖୁଣ୍ଟିଆ ସାହିରେ ରବିବାର ବାପାଙ୍କ ଶ୍ରାଦ୍ଧଦିବସରେ ଦୁଇପୁଅଙ୍କ ମଧ୍ୟରେ ବଚସାରୁ ହତ୍ୟାକାଣ୍ଡ ଘଟିଛି। ବଡ଼ଭାଇଙ୍କ ଖଣ୍ଡାଚୋଟରେ ସାନଭାଇଙ୍କ ମୃତ୍ୟୁ ଘଟିଛି। ସେ ହେଲେ ପିପୁ ରାଉଳ।
ସୂଚନା ଅନୁଯାୟୀ, ଖୁଣ୍ଟିଆ ସାହିର ସ୍ବର୍ଗତ ଚୈତନ୍ୟ ରାଉଳଙ୍କ ରବିବାର ଶ୍ରାଦ୍ଧ ଥିଲା। ବଡ଼ପୁଅ ପୂର୍ବରୁ ବିବାହିତ ଥିବାବେଳେ ସାନପୁଅ ପିପୁ କିଛିଦିନ ତଳେ ଅନ୍ୟ ଜାତିର ଯୁବତୀଙ୍କୁ କୋର୍ଟରେ ବିବାହ କରିଥିବା ପରିବାର ଲୋକେ ଜାଣିବାକୁ ପାଇଥିଲେ। ପିପୁ ନିଜ ସ୍ତ୍ରୀଙ୍କୁ ନେଇ ଅଲଗାରେ ରହୁଥିଲେ। ରବିବାର ବାପାଙ୍କ ଶ୍ରାଦ୍ଧ ଥିବାବେଳେ ଦୁଇ ଭାଇ ଏବଂ ଦୁଇ ଭଉଣୀ ଉପସ୍ଥିତ ଥିଲେ। ବଡ଼ପୁଅଙ୍କ ସ୍ତ୍ରୀ ଗର୍ଭବତୀ ଥିବାରୁ ପିଣ୍ଡଦାନ କାର୍ଯ୍ୟ କରିପାରି ନ ଥିଲେ। ତେଣୁ ସାନ ପୁଅ ପିପୁ ନିଜ ସ୍ତ୍ରୀ ଏହି କାର୍ଯ୍ୟ କରିବେ ବୋଲି କହିଥିଲେ। ଅନ୍ୟ ଜାତି ଯୋଗୁ ଦୀପୁ ଏହାକୁ ବାରଣ କରିବା ସହ ସାନଭାଇ ସହ ଗଣ୍ଡଗୋଳ କରିଥିଲେ। ଫଳରେ ପିପୁ ଘରୁ ଚାଲିଯାଇଥିଲେ। ପରେ ସେ ପୁଣି ଘରକୁ ଫେରିବା ପରେ ଦୁଇ ଭାଇଙ୍କ ମଧ୍ୟରେ ହାତାହାତି ହୋଇଥିଲା। ଏଥିରେ ଉତ୍ତ୍ୟକ୍ତ ହୋଇ ଦୀପୁ ସାନଭାଇ ପିପୁଙ୍କୁ ଖଣ୍ଡାରେ ଆକ୍ରମଣ କରିଥିଲେ। ଅତ୍ୟଧିକ ରକ୍ତସ୍ରାବ ଯୋଗୁ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ହତ୍ୟାକାଣ୍ଡ ଘଟାଇ ଦୀପୁ ଘଟଣାସ୍ଥଳରୁ ଫେରାର ହୋଇଥିଲେ। ଘଟଣା ନେଇ ସାନ ଭିଣୋଇ କୃପାସିନ୍ଧୁ ବଣୁଆ(ବାବୁଲି) କାଶୀପୁର ଥାନାରେ ଦୀପୁଙ୍କ ବିରୋଧରେ ହତ୍ୟା ଅଭିଯୋଗ କରିଛନ୍ତି। ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଅଭିଯୁକ୍ତଙ୍କୁ ଧରିବାକୁ ଉଦ୍ୟମ ଚାଲିଥିବା ଥାନା ଅଧିକାରୀ ପ୍ରସନ୍ନ ମିଶ୍ର କହିଛନ୍ତି। ଏ ନେଇ ଏକ ହତ୍ୟା ମାମଲା(ନଂ.୬/୨୨) ରୁଜୁ ହୋଇଛି।