![](https://www.dharitri.com/wp-content/uploads/2023/04/9-16.jpg)
ସୋହେଲା,୧୬।୪(ଡି.ଏନ୍.ଏ): ବରଗଡ଼ ଜିଲା ସୋହେଲା ଥାନା ଅଧୀନ ବୁଡ଼ାମାଳ ଗ୍ରାମରେ ଶନିବାର ବିଳମ୍ବିତ ରାତିରେ ଗ୍ରାମର ସାନନ୍ଦ ସା(୩୫)ଙ୍କୁ ନିର୍ମମ ଭାବେ ହତ୍ୟା କରାଯାଇଛି। ଅଭିଯୁକ୍ତମାନେ ଟାଙ୍ଗିଆରେ ହାଣି ହତ୍ୟା ପରେ ବ୍ଲେଡରେ ଯୌନାଙ୍ଗ କାଟି ଦେଇଥିଲେ। ଏ ନେଇ ରବିବାର ମୃତକଙ୍କ ବାପା ଦଶରଥ ସୋହେଲା ଥାନାରେ ଏତଲା ଦେବା ପରେ ପୋଲିସ ୩ ଅଭିଯୁକ୍ତଙ୍କୁ ଗିରଫ କରିଛି । ଗିରଫ ଅଭିଯୁକ୍ତମାନେ ହେଲେ, ବୁଡ଼ାମାଳ ଗ୍ରାମର ଅଜୟ ଭୁଏ(୩୨), ଦୁଃଖ ଓରଫ ଦୁଃଖନାଶନ ସାହୁ(୨୫) ଏବଂ ପ୍ରସନ୍ନ ସା(୪୨)।
ପୋଲିସ ତାଙ୍କଠାରୁ ହତ୍ୟାକାଣ୍ଡରେ ବ୍ୟବହୃତ ଟାଙ୍ଗିଆ, ବ୍ଲେଡ୍, ୩ଟି ମୋବାଇଲ ଫୋନ ଜବତ କରିଛି। ଗିରଫ ଅଭିଯୁକ୍ତଙ୍କୁ ସୋହେଲା କୋର୍ଟ ଚାଲାଣ କରାଯାଇଥିଲା। ପରେ ସେମାନଙ୍କୁ ସ୍ଥାନୀୟ ସବ୍ଜେଲ ହାଜତକୁ ପଠାଇ ଦିଆଯାଇଛି। ଏ ନେଇ ସୋହେଲା ଥାନାରେ ଦଫା ୩୦୨ରେ ଏକ ହତ୍ୟା ମାମଲା(ନଂ.୭୫/୨୩) ରୁଜୁ ହୋଇଛି। ପରକ୍ରିୟା ପ୍ରୀତି ସନ୍ଦେହରୁ ଅଭିଯୁକ୍ତମାନେ ସାନନ୍ଦଙ୍କୁ ହତ୍ୟା କରିଥିବା ପୋଲିସ ଅନୁମାନ କରୁଛି । ବରଗଡ଼ ଡାକ୍ତରଖାନାରେ ମୃତକଙ୍କ ଶବ ବ୍ୟବଚ୍ଛେଦ କରାଯାଇଛି।
ମିଳିଥିବା ସୂଚନା ମୁତାବକ, ଅଭିଯୁକ୍ତ ଅଜୟ ତାଙ୍କ ସ୍ତ୍ରୀଙ୍କ ସହିତ ସାନନ୍ଦଙ୍କ ପରକ୍ରିୟା ପ୍ରୀତି ଥିବା ସନ୍ଦେହ କରିଥିଲେ । ଏନେଇ ସେ ସାନନ୍ଦଙ୍କୁ ହତ୍ୟା କରିବାକୁ ଯୋଜନା ପ୍ରସ୍ତୁତ କରିଥିଲେ । ଯୋଜନା ଅନୁଯାୟୀ, ଅନ୍ୟ ଦୁଇ ଅଭିଯୁକ୍ତ ଦୁଃଖ ଏବଂ ପ୍ରସନ୍ନଙ୍କ ସହିତ ମିଶି ଶନିବାର ରାତି ପ୍ରାୟରେ ମଦ ପିଇବା ପାଇଁ ସାନନ୍ଦଙ୍କୁ ଡାକି ନେଇଥିଲେ। ମଦ ପିଇବା ସମୟରେ ଅଜୟ ଏକ ଟାଙ୍ଗିଆରେ ସାନନ୍ଦଙ୍କ ମୁଣ୍ଡକୁ ପ୍ରହାର କରିଥିଲେ। ସାନନ୍ଦ ଟଳି ପଡ଼ିବା ପରେ ଅନ୍ୟ ଦୁଇ ଅଭିଯୁକ୍ତ ଦୁଃଖ ଏବଂ ପ୍ରସନ୍ନ ତାଙ୍କୁ ମାଡ଼ି ବସିଥିଲେ। ପରେ ଅଜୟ ଏକ ବ୍ଲେଡରେ ସାନନ୍ଦଙ୍କ ଯୌନାଙ୍ଗ କାଟି ଦେଇଥିଲେ। ଏହାପରେ ବ୍ୟବହୃତ ଟାଙ୍ଗିଆକୁ ଏକ ପୋଖରୀ ଭିତରକୁ ଫିଙ୍ଗି ଦେଇ ଅଭିଯୁକ୍ତମାନେ ଘରକୁ ଚାଲି ଚାଳିଯାଇଥିଲେ ।
ସାନନ୍ଦଙ୍କ ବାପା ଦଶରଥଙ୍କ ଏତଲା ପରେ ପଦ୍ମପୁର ଏସ୍ଡ଼ିପିଓ ବିଭୁତି ଭୂଷଣ ଭୋଇଙ୍କ ତତ୍ତ୍ବାବଧାନରେ ସୋହେଲା ଥାନା ଆଇଆଇସି ହରିବନ୍ଧୁ ଗଡ଼ତିଆ ଏହାର ତଦନ୍ତ କରିଥିଲେ। ପରକ୍ରିୟା ପ୍ରୀତି ସନ୍ଦେହରୁ ସାନନ୍ଦଙ୍କୁ ହତ୍ୟା କରାଯାଇଥିବା ପାଲିସ ସୁରାକ୍ ପାଇଥିଲା । ଏହାପରେ ଘଟଣାର ମୁଖ୍ୟ ଅଭିଯୁକ୍ତ ଅଜୟଙ୍କୁ ଥାନାକୁ ଆଣି ପଚରାଉଚରା କରିବା ପରେ ସେ ହତ୍ୟାକାଣ୍ଡ ଭିଆଇଥିବା ସ୍ବିକାର କରିବା ସହିତ ଅନ୍ୟ ଅଭିଯୁକ୍ତ ଦୁଃଖ ଏବଂ ପ୍ରସନ୍ନଙ୍କ ସମ୍ପୃକ୍ତି ନେଇ ପୋଲିସକୁ କହିଥିଲେ। ଏହାପରେ ଅନ୍ୟ ଦୁଇ ଅଭିଯୁକ୍ତଙ୍କ ମଧ୍ୟ ଗିରଫ କରାଯାଇଥିଲା ବୋଲି ପୋଲିସ ପକ୍ଷରୁ କୁହାଯାଇଛି।