ବୌଦ୍ଧ/ବାଉଁଶୁଣୀ,୨୨।୪(ଡି.ଏନ୍.ଏ.): ବୌଦ୍ଧ ଥାନା ଆମ୍ବଝରୀ ପଞ୍ଚାୟତ ଅନ୍ତର୍ଗତ ଝାଙ୍କରପଡ଼ା ଗ୍ରାମରେ ବୁଧବାର ରାତିରେ ଜଣେ ଅଜଣା ବ୍ୟକ୍ତିଙ୍କ ଆକ୍ରମଣରେ ଜଣେ ବ୍ୟକ୍ତିଙ୍କ ବାଉଁଶୁଣୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି।
ମିଳିଥିବା ସୂଚନା ଅନୁଯାୟୀ, ଝାଙ୍କରପଡ଼ା ଗ୍ରାମର ଡୋଳାମଣି କର୍ଣ୍ଣ (୫୫) ନିଜ ଘରେ ଏକୁଟିଆ ଥିବାବେଳେ ରାତି ପ୍ରାୟ ୧୦ଟା ସମୟରେ କୌଣସି ମାରଣାସ୍ତ୍ର ସାହାଯ୍ୟରେ ତାଙ୍କୁ କେହି ଆକ୍ରମଣ କରିଥିଲେ। କୌଣସି ସୂତ୍ରରୁ ଖବରପାଇ ୧୦୮ ଆମ୍ବୁଲାନ୍ସ ଝାଙ୍କରପଡ଼ାରେ ପହଞ୍ଚି ତାଙ୍କୁ ଆଣି ବାଉଁଶୁଣୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ ଓ ରାତି ୧୧ଟାରେ ତାଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଥିଲା। ପୂର୍ବ ଶତ୍ରୁତାରୁ ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଛି। ବର୍ଷେ ପୂର୍ବରୁ ଡୋଳାମଣିଙ୍କୁ ତାଙ୍କର ସମ୍ପର୍କୀୟମାନେ ଆକ୍ରମଣ କରି ଗୁରୁତର କରିଥିଲେ ଓ ସେ ବୁର୍ଲା ଡାକ୍ତରଖାନାରେ ଚିକିତ୍ସିତ ହୋଇ ଫେରିଥିଲେ। ମୃତ ଡୋଳାମଣିଙ୍କ ସମ୍ପର୍କରେ ଗ୍ରାମବାସୀଙ୍କ ଠାରୁ ମିଳିଥିବା ତଥ୍ୟ ଅନୁଯାୟୀ ତାଙ୍କର ଦୁଇଟି ସ୍ତ୍ରୀ। ପ୍ରଥମ ସ୍ତ୍ରୀଙ୍କ ଦୁଇ ଝିଅ ଓ ଗୋଟିଏ ପୁଅ। ବଡ଼ ଝିଅ ଦନ୍ତାପାଲି ଗ୍ରାମରେ ବିବାହ କରିଛନ୍ତି। ସାନ ଝିଅ ମା’ଙ୍କ ସହିତ ମାମୁଘର ବାଉଁଶୁଣୀ ଥାନା ଝାରକଟା ଗ୍ରାମରେ ରହୁଛି ଓ ପୁଅ ଲୁହା ଢଳେଇ ମିସ୍ତ୍ରୀ ଭାବେ ବରଗଡ଼ରେ କାମ କରୁଛି। ଡୋଳାମଣି ଗୁନ୍ଦୁଲିଆ ପଞ୍ଚାୟତ ପଟୁଆପାଲି ଗ୍ରାମରେ ଆଜକୁ ୧୦ ବର୍ଷ ତଳେ ବିବାହ କରି ସେଠାରେ ରହୁଛନ୍ତି ଓ ମଝିରେ ମଝିରେ ଝାଙ୍କରପଡ଼ା ଘରକୁ ଆସି ଦିନେ ଦୁଇଦିନ ରୁହନ୍ତି। ଘଟଣାର ଦୁଇ ଦିନ ଆଗରୁ ଝାଙ୍କରପଡ଼ା ଆସି ରହୁଥିଲେ । ସେ ଏକୁଟିଆ ଥିବାରୁ ହତ୍ୟାର କାରଣ ଓ ହତ୍ୟାକାରୀଙ୍କ ସମ୍ପର୍କରେ କୌଣସି ସଠିକ ସୂଚନା ମିଳିପାରି ନ ଥିବା ବେଳେ ପୋଲିସ ଅନୁସନ୍ଧାନ ଜାରି ରଖିଛି।