ହାଇଦ୍ରାବାଦ,୨୯।୧୦: ନିଜର ପୂର୍ବ ଅପରାଧକୁ ଲୁଚାଇବା ପାଇଁ ୯ ଜଣ ଦାଦନ ଶ୍ରମିକଙ୍କୁ ହତ୍ୟା କରିଥିବା ବିହାର ବେଗୁସରାଇ ଜିଲାର ସଞ୍ଜୟ କୁମାର ଯାଦବଙ୍କୁ ତେଲଙ୍ଗାନାର ଓ୍ବାରାଙ୍ଗଲ କୋର୍ଟ ବୁଧବାର ମୃତ୍ୟୁଦଣ୍ଡାଦେଶ ଶୁଣାଇଛନ୍ତି। ଗତ ମେ’ ୨୦ରେ ସେ ଓ୍ବରାଙ୍ଗଲ ଗ୍ରାମାଞ୍ଚଳ ଜିଲାର ଗୋରେକୁଣ୍ଟା ଗ୍ରାମରେ ପଶ୍ଚିମବଙ୍ଗ ଓ ତ୍ରିପୁରାରୁ ଆସିଥିବା ୯ ଦାଦନଙ୍କୁ ହତ୍ୟା କରିଥିଲେ। ସେମାନଙ୍କ ମଧ୍ୟରୁ ଗୋଟିଏ ପରିବାରର ୬ ଜଣ ଥିଲେ। ସମସ୍ତଙ୍କ ମୃତଦେହ ଏକ ପରିତ୍ୟକ୍ତ କୂଅରୁ ଉଦ୍ଧାର ହୋଇଥିଲା। ଏତଲାର ୨୫ ଦିନ ପରେ ଓ୍ବାରାଙ୍ଗଲ ପୋଲିସ ସଞ୍ଜୟଙ୍କ ବିରୋଧରେ ଆଇପିସିର ଧାରା ୭ରେ ମାମଲା ରୁଜୁ କରିଥିଲା। ଶୁଣାଣି ବେଳେ ସଞ୍ଜୟ ନିଜର ଅପରାଧ ସମ୍ପର୍କରେ ସ୍ବୀକାର କରିଥିଲେ। ଅଦାଲତ ୬୮ ସାକ୍ଷୀଙ୍କ ସମେତ ୯୮ ଜଣଙ୍କଠାରୁ ବୟାନ ଶୁଣିବା ପରେ ରାୟ ପ୍ରଦାନ କରିଥିଲେ।
ସମସ୍ତ ଦାଦନ ଗିସୁଗୋଣ୍ଡାର ଏକ ଅଖା ତିଆରି କାରଖାନାରେ କାମ କରୁଥିଲେ। ମାର୍ଚ୍ଚରେ ଲକ୍ଡାଉନ ଘୋଷଣା ହେବାରୁ ସେମାନେ ଉକ୍ତ କମ୍ପାନୀ ପରିସରରେ ରହିଥିଲେ। ଆର୍ଥତ୍କ ସମସ୍ୟା ଓ ଅନ୍ୟ ପାରିବାରିକ କାରଣରୁ ସମସ୍ତେ ଆତ୍ମହତ୍ୟା କରିଥାଇପାରନ୍ତି ବୋଲି ପୋଲିସ ପ୍ରଥମେ ସନ୍ଦେହ କରିଥିଲା। ତେବେ ସେମାନଙ୍କୁ ହତ୍ୟା କରାଯାଇଥିବା ତଦନ୍ତରୁ ସ୍ପଷ୍ଟ ହୋଇଥିଲା। ସଞ୍ଜୟ ମଧ୍ୟ ଜଣେ ଦାଦନ ଶ୍ରମିକ। ସେ ମାର୍ଚ୍ଚ ମାସରେ କରିଥିବା ଏକ ହତ୍ୟାକାଣ୍ଡକୁ ଲୁଚାଇବାକୁ ଯାଇ ୯ ଜଣ ଦାଦନଙ୍କୁ ହତ୍ୟା କରିଥିବା ତଦନ୍ତରୁ ଜଣାପଡ଼ିଥିଲା। ତଦନ୍ତ ଅନୁଯାୟୀ ସଞ୍ଜୟଙ୍କର ରଫିକା(୩୭) ନାମ୍ନୀ ମହିଳାଙ୍କ ସହ ଅବୈଧ ସମ୍ପର୍କ ଥିଲା। ମାର୍ଚ୍ଚ ୬ରେ ପଶ୍ଚିମବଙ୍ଗ ଯାଉଥିଲାବେଳେ ଆନ୍ଧ୍ରପ୍ରଦେଶର ପଶ୍ଚିମ ଗୋଦାବରୀ ଜିଲାର ନିଦୁବ୍ରେଲୁଠାରେ ସଞ୍ଜୟ ରଫିକାଙ୍କୁ ହତ୍ୟା କରି ଓ୍ବାରାଙ୍ଗଲ ଫେରିଆସିଥିଲେ। ଏହି ଘଟଣାର ଦୁଇମାସ ପରେ ଧରାପଡ଼ିଯିବା ଆଶଙ୍କାରେ ସେ ପାଖରେ ରହୁଥିବା ଅନ୍ୟ ଦାଦନମାନଙ୍କୁ ମାରିଦେବା ପାଇଁ ନିଷ୍ପତ୍ତି ନେଇଥଲେ। ସେ ଖାଦ୍ୟରେ ନିଶା ଔଷଧ ଦେବା ପରେ ସୁପ୍ତ ଅବସ୍ଥାରେ ସେମାନଙ୍କୁ ଅଖାରେ ବାନ୍ଧି କୂଅରେ ଫିଙ୍ଗିଦେଇଥିଲେ।