ବ୍ରହ୍ମପୁର ଅଫିସ,୧ା୧:ଚଳିତ ବର୍ଷ କରୋନା ନିୟନ୍ତ୍ରଣରେ ଥିବା ଯୋଗୁ ରେଶମ ସହରବାସୀ ଉତ୍ସାହର ସହ ଶନିବାର ଜିରୋ ନାଇଟ ପାଳନ କରିଛନ୍ତି। ଏହି ଅବସରରେ ସହରବାସୀ କେକ୍ କାଟି ନିଜ ପରିବାର ଓ ବନ୍ଧୁ ବର୍ଗଙ୍କ ସହ ବାଣ ଫୁଟାଇ ପାଳନ କରିଥିଲେ। ସେହିପରି ବିଭିନ୍ନ ହୋଟେଲ, ରେଷ୍ଟୁରାଣ୍ଟ, ଜିମ୍, ୟୁନିୟନ କ୍ଲବ ସମେତ ବିଭିନ୍ନ ଅନୁଷ୍ଠାନ ପକ୍ଷରୁ ମଧ୍ୟ ସହରରେ ନବବର୍ଷ ପାଳନ ନିମନ୍ତେ ବ୍ୟାପକ ପ୍ରସ୍ତ୍ୁତି ହୋଇଛି। ଯୁବ ବର୍ଗ ଡିଜେ ନାଇଟ ପାର୍ଟିରେ ମସ୍ଗୁଲ ହୋଇ ଜିରୋ ନାଇଟ ପାଳନ କରିଥିଲେ। ଜିରୋ ନାଇଟରେ ଡିଜେ ପାର୍ଟିକୁ ନେଇ ବିଭିନ୍ନ ସଂସ୍ଥାର ବ୍ୟବସାୟ ମଧ୍ୟ ଭଲ ହୋଇଛି। ଏଥି ନିମନ୍ତେ କପଲ୍ ଓ ସିଙ୍ଗଲ ଟିକେଟ ବ୍ୟବସ୍ଥା ହୋଇଥିଲା। ୨୦୦ରୁ ଆରମ୍ଭ କରି ୧୮୦୦ ଟଙ୍କା ପର୍ଯ୍ୟନ୍ତ ଟିକେଟ ସହରରେ ବିକ୍ରି ହୋଇଥିଲା। ବନ୍ଧୁ ଓ ପରିବାର ବର୍ଗ ନିଜ ନିଜ ଘରେ ଭୋଜି ଭାତର ଆୟୋଜନ କରିଥିଲେ। ସହରର ରାମଲିଙ୍ଗେଶ୍ୱର ପାର୍କ ଓ ବିଜୁ ପଟ୍ଟନାୟକ ପାର୍କରେ ଭିଡ଼ ଜମିଥିଲା।
ବ୍ରହ୍ମପୁର ଅଫିସ,୧ା୧: ବ୍ରହ୍ମପୁର ସହରରେ ଶାନ୍ତି ଶୃଙ୍ଖଳାରେ ଜିରୋ ନାଇଟ ପାଳନ କିପରି ହୋଇପାରିବ ସେନେଇ ପୋଲିସ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଶନିବାର ବ୍ରହ୍ମପୁର ଏସ୍ପି ଡା. ଶ୍ରବଣା ବିବେକ ଏମ୍.ଙ୍କ ନିର୍ଦ୍ଦେଶକ୍ରମେ ସମସ୍ତ ଥାନାଧିକାରୀ ନିଜ ନିଜ ଅଞ୍ଚଳର ଅପରାଧୀମାନଙ୍କୁ ଥାନାକୁ ଡାକିଥିଲେ। ସହରରେ ସେମାନେ ଶନିବାର ଯେପରି କୌଣସି ବିଶୃଙ୍ଖଳା ସୃଷ୍ଟି ନ କରିବେ ସେନେଇ ତାଗିଦ କରି ଛଡ଼ାଯାଇଛି। ଅନ୍ୟପଟେ ଜନସାଧାରଣ ଶାନ୍ତି ଓ ଶୃଙ୍ଖଳାର ସହ ଜିରୋ ନାଇଟ ପାଳନ ସହ ନୂତନ ବର୍ଷକୁ ସ୍ବାଗତ କରନ୍ତୁ ବୋଲି ଏସ୍ପି କହିବା ସହ ସମସ୍ତଙ୍କୁ ନୂତନ ବର୍ଷର ଅଭିନନ୍ଦନ ଜଣାଇଛନ୍ତି।
