ନୂଆଦିଲ୍ଲୀ, ୬ା୧୧(ପିଆଇବି):ସ୍ବରାଷ୍ଟ୍ର ମନ୍ତ୍ରଣାଳୟର ଅନ୍ଲକ୍ ୫.୦ ଗାଇଡ୍ଲାଇନ ଆଧାରରେ ୧୦ ତାରିଖରୁ ଦେଶରେ ମ୍ୟୁଜିୟମ୍, ଆର୍ଟ ଗ୍ୟାଲେରି ଏବଂ ପ୍ରଦର୍ଶନୀ ଖୋଲିବାକୁ ଯାଉଛି। ଏଥିପାଇଁ ସଂସ୍କୃତି ମନ୍ତ୍ରଣାଳୟ ପକ୍ଷରୁ ଗୁରୁବାର ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡ୍ୟୁଓର) ଜାରି ହୋଇଛି। କରୋନା ସଂକ୍ରମଣ ରୋକିବା ଲାଗି ଏଥିରେ ବିଭିନ୍ନ ପ୍ରତିକାର ବ୍ୟବସ୍ଥା ଗ୍ରହଣ କରାଯାଇଛି। ଏହାକୁ ମ୍ୟୁଜିୟମ, ଆର୍ଟ ଗ୍ୟାଲେରି ଓ ଏକ୍ଜିବିଶନର ପରିଚାଳନା ସଂସ୍ଥା ଓ ଦର୍ଶକଙ୍କୁ ପାଳନ କରିବାକୁ ହେବ। ଏଥିରେ ପରିଷ୍କାର ପରିଚ୍ଛନ୍ନତା, ଦର୍ଶକ ଓ କର୍ମଚାରୀଙ୍କ ନିରାପତ୍ତା ଓ ଟିକେଟ କ୍ରୟ ଉପରେ ମୁଖ୍ୟତଃ ଧ୍ୟାନ ଦିଆଯାଇଛି।
ଏସ୍ଓପି ଅନୁଯାୟୀ କଣ୍ଟେନମେଣ୍ଟ ଜୋନ୍ (ଆବଦ୍ଧାଞ୍ଚଳ) ମଧ୍ୟରେ ଥିବା କୌଣସି ମ୍ୟୁଜିୟମ୍ କିମ୍ବା ଆର୍ଟ ଗ୍ୟାଲେରି ଖୋଲିବ ନାହିଁ। ଏଥିସହିତ ସ୍ବରାଷ୍ଟ୍ର ମନ୍ତ୍ରଣାଳୟ, ସ୍ବାସ୍ଥ୍ୟ ମନ୍ତ୍ରଣାଳୟ ଏବଂ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ସରକାରଙ୍କ ପକ୍ଷରୁ ଜାରି ହୋଇଥିବା କୋଭିଡ୍ ସମ୍ପର୍କିତ ଗାଇଡ୍ଲାଇନକୁ ପାଳନ କରିବାକୁ କୁହାଯାଇଛି।