କୋକସରା,୨୮ା୫(ଡି.ଏନ୍.ଏ.): ଦିନକୁ ଦିନ ଗ୍ରାମାଞ୍ଚଳରେ ଦେଶୀ ମଦଭାଟି ଛତୁ ଫୁଟିଲା ଭଳି ଖୋଲୁଥିବାରୁ ଗାଁ ଗାଁରେ ମଦ୍ୟପଙ୍କ ଦୌରାତ୍ମ୍ୟ ସହ ଗାଁ ପରିବେଶକୁ ଅଶାନ୍ତ କରୁଥିବା ଦେଖିବାକୁ ମିଳୁଛି। ଘରେ ଘରେ ଗଣ୍ଡଗୋଳ ହେଉଛି। ସ୍ତ୍ରୀ-ସ୍ବାମୀ ମଧ୍ୟରେ ମତାନ୍ତର ହୋଇ କଥା ଛାଡ଼ପତ୍ର ପର୍ଯ୍ୟନ୍ତ ଯାଉଛି। ମଦନିଶାରେ ଅସାମାଜିକ କାର୍ଯ୍ୟ କଳାପ ସହ ଚୋରି, ଡକାୟତି, ରାହାଜାନୀ, ଲୁଟ୍, ହତ୍ୟା ଭଳି ଘଟଣା ଦେଖିବାକୁ ମିଳୁଛି। ଏହାର ପ୍ରତିବାଦ କରି ଶନିବାର କଳାହାଣ୍ଡି ଜିଲା କୋକସରା ବ୍ଲକ ମୂଷାପାଲି ପଞ୍ଚାୟତର ୩୦ଟି ଏସ୍.ଏଚ୍.ଜିର ମହିଳାମାନେ ଏକତ୍ରିତ ହୋଇ ପଞ୍ଚାୟତରେ ଥିବା ସମସ୍ତ ଦେଶୀ ମଦଭାଟି ବନ୍ଦ କରିବାକୁ ଶପଥ ନେଇଛନ୍ତି। ଆଜି ମୂଷାପାଲି ପଞ୍ଚାୟତର ମୂଷାପାଲି, ଖପ୍ରାମାଲ, ଗହନାମୁଣ୍ଡା ଗାଁରେ ଥିବା ଦେଶୀ ମଦ ଭାଟିଗୁଡିକୁ ବନ୍ଦ କରିବାକୁ ଏକ ଦାବିପତ୍ର ଏସ୍ଏଚ୍ଜିର ବୈଦେହୀ ସୁନାନୀ, ଶୈଳନ୍ଦ୍ରୀ ନାଏକ, ଧନମତି ରାଉତ, ମମତା ପାଣ୍ଡେ, ସନ୍ତୋଷୀ ବାଗ, ସୁମନ ରାଉତ, କ୍ରାନ୍ତି ଦୁର୍ଗା, କସ୍ତୁରୀ ରାଉତ, ପୂର୍ଣ୍ଣମୀ ଧରୁଆ, ଅଦିତି ରାଉତ, ମଞ୍ଜୁଳତା ଦୁର୍ଗା, କୁମୁଦିନୀ ବାଗ, ଭୂମିସୁତା ବାଗ, ଗୀତା ରାଉତ, ମମତା ସୁନାନୀଙ୍କ ସମେତ ଶତାଧିକ ମହିଳା କୋକସରା ଥାନାରେ ପହଞ୍ଚି ଥାନାଧିକାରୀ ପ୍ରସନ୍ନ କୁମାର ବେହେରାଙ୍କୁ ପ୍ରଦାନ କରିଛନ୍ତି।
