ଥିରୁଭାନାନ୍ଥପୁରମ,୧୫।୧୨: ପୂର୍ବତନ ଭାରତୀୟ ପେସର ଏସ୍. ଶ୍ରୀସନ୍ଥ ମଙ୍ଗଳବାର ପ୍ରତିଦ୍ୱନ୍ଦ୍ୱିତାମୂଳକ କ୍ରିକେଟକୁ ଫେରିବା ଦିଗରେ ଆଉ ପାଦେ ଆଗେଇଛନ୍ତି। ଆସନ୍ତା ୨ ତାରିଖରୁ ହେବାକୁ ଯାଉଥିବା ସୟଦ ମୁସ୍ତାକ ଅଲି ଟି୨୦ ଇଭେଣ୍ଟ ଲାଗି ଘୋଷିତ ୨୬ ଜଣିଆ ସମ୍ଭାବ୍ୟ କେରଳ ଦଳ ଘୋଷଣା କରାଯାଇଛି। ଏହି ତାଲିକାରେ ସ୍ଥାନ ପାଇଛନ୍ତି ୩୭ ବର୍ଷୀୟ ଶ୍ରୀସନ୍ଥ।
୨୦୧୩ ଆଇପିଏଲ ସ୍ପଟ୍ ଫିକ୍ସିଂ ସ୍କାଣ୍ଡାଲରେ ଜଡ଼ିତ ହୋଇଥିବା ସନ୍ଦେହରେ ଶ୍ରୀସନ୍ଥଙ୍କୁ ବ୍ୟାନ କରିଥିଲା ବିସିସିଆଇ। ତାଙ୍କ ବାସନ୍ଦ ସମୟସୀମା ଚଳିତ ବର୍ଷ ସେପ୍ଟେମ୍ବରରେ ଶେଷ ହୋଇଛି। ସମ୍ଭାବ୍ୟ କେରଳ ଦଳରେ ସଞ୍ଜୁ ସାମସନ, ସଚିନ ବେବି, ଜଲଜ ସକ୍ସେନା, ରବିନ ଉଥପ୍ପା ଓ ବାସିଲ ଥାମ୍ପିଙ୍କ ଭଳି ଷ୍ଟାର ରହିଛନ୍ତି।
୨୦୧୧ରେ ଅନ୍ତିମ ଥର ଭାରତ ପକ୍ଷରୁ ପ୍ରତିନିଧିତ୍ୱ କରିଥିବା ଶ୍ରୀସନ୍ଥ ଚଳିତ ମାସ ୨୦ରୁ ୩୦ ତାରିଖ ପର୍ଯ୍ୟନ୍ତ ହେବାକୁ ଥିବା ଏକ କ୍ୟାମ୍ପରେ ଯୋଗଦେବେ। ତାଙ୍କ ପ୍ରତିନିଧିତ୍ୱରେ ଭାରତୀୟ ଦଳ ୨୦୦୭ ଟି୨୦ ବିଶ୍ୱକପ୍ ଓ ୨୦୧୧ରେ ଦିନିକିଆ ବିଶ୍ୱକପ୍ ଜିତିଥିଲା।