ଭୁବନେଶ୍ୱର, ୨୧।୫(ବ୍ୟୁରୋ): ସଙ୍ଗୀତ ନିର୍ଦ୍ଦେଶକ ଜାପାନୀଙ୍କ ନାଁରେ ଆସିଛି ଧମକପୂର୍ଣ୍ଣ କଲ୍। କଟକ ଆସିଲେ ମାରିଦେବି। କଲ୍ କରୁଥିବା ବ୍ୟକ୍ତିଜଣକ ଏଭଳି ଅନେକ ଧମକପୂର୍ଣ୍ଣ କଥା କହି ସତର୍କ କରାଉଥିବା ଶୁଣିବାକୁ ମିଳୁଛି। ଜାପାନୀଙ୍କ ସହଯୋଗୀ ତଥା ଗୀତିକାର ତପୁଙ୍କ ମୋବାଇଲ୍ ଫୋନ୍କୁ ଆସିଥିବା ଏହି କଲ୍ ଏବେ ଭାଇରାଲ ହେବାରେ ଲାଗିଛି। ଏପଟେ ଜୀବନ ପ୍ରତି ବିପଦ ଥିବା ଦର୍ଶାଇ ଜାପାନୀ ଓ ସହଯୋଗୀମାନେ ଭୁବନେଶ୍ୱର ଖାରବେଳନଗର ଥାନାରେ ଏତଲା ଦେଇଛନ୍ତି। ପୋଲିସ ମାମଲା ନଂ.୧୪୯/୨୨ ରୁଜୁ କରି ତଦନ୍ତ ଆରମ୍ଭ କରିଛି। ହ୍ୟୁମାନଙ୍କ ସହଯୋଗୀ ତଥା ସାଗର ସଙ୍ଗମ ଗ୍ରୁପ୍ର ସଦସ୍ୟ ବବୁଲୁ ମହମ୍ମଦ ଆବିଦ ତପୁଙ୍କୁ ଫୋନ୍ କରି ଏପରି ଧମକ ଦେଇଥିବା ଏତଲାରେ ଉଲ୍ଲେଖ କରାଯାଇଛି। ମହାପ୍ରଭୁ ଶ୍ରୀଜଗନ୍ନାଥଙ୍କ ଭଜନ ଗାଇବାକୁ ସଙ୍ଗୀତ ନିର୍ଦ୍ଦେଶକ ଜାପାନୀ ବହୁବାର ବିଶିଷ୍ଟ କଣ୍ଠଶିଳ୍ପୀ ହ୍ୟୁମାନ ସାଗରଙ୍କୁ ନିବେଦନ କରୁଥିବାରୁ ଏପରି ଧମକ ମିଳିଥିବା କୁହାଯାଉଛି। ଫଳରେ ଏହି ଘଟଣାକୁ ନେଇ ଲୋକପ୍ରିୟ ଓଲିଉଡ୍ ଗାୟକ ହ୍ୟୁମାନ ବିବାଦ ଘେରକୁ ଚାଲି ଆସିଛନ୍ତି।
ସମ୍ପର୍କରେ ଜାପାନୀ କୁହନ୍ତି, ହ୍ୟୁମାନ କାଳିଆ ଭଜନଟେ ଗାଇବେ ବୋଲି ଗତ ୫ ବର୍ଷ ଧରି ତାଙ୍କ ପଛରେ ଲାଗିଛି। ଆମ ଇତିହାସ କହୁଛି ଅନେକଥର କାଳିଆ ପାଇଁ ମହମ୍ମଦ ଅଜିଦ, ମହମ୍ମଦ ସିକନ୍ଦର ଆଲମ, ସରୋଜ ନନ୍ଦ ଗୀତ ଗାଇଛନ୍ତି। ହ୍ୟୁମାନଙ୍କ କଣ୍ଠରୁ କାଳିଆ ଭଜନ ଶୁଣିବାକୁ ଶ୍ରୋତାମାନେ ଚାହିଁ ବସିଛନ୍ତି। କିନ୍ତୁ ସେ କାହିଁକି ମନା କରୁଛନ୍ତି ମୁଁ କିଛି ବୁଝିପାରୁ ନାହିଁ ବୋଲି ଜାପାନୀ କହିଛନ୍ତି। କଣ୍ଠଶିଳ୍ପୀ ହ୍ୟୁମାନ କହିଛନ୍ତି, ମୋ ମନ ଦୁଃଖ ଯେ, ମୋ ନଁାରେ ଏତଲା ଦିଆଯାଇଛି। ମହାପ୍ରଭୁଙ୍କ ଗୀତ ଗାଇବାକୁ ମୋର ଡୋରି ଲାଗି ନାହିଁ। ଯେବେ ଲାଗିବ ସାରା ଓଡିଶା ଝୁମିବ। ମୋତେ ସବୁବେଳେ ଜଗନ୍ନାଥ ଭଜନ ଶୁଣିବାକୁ ଭଲ ଲାଗେ। ମୋତେ ବହୁତ ଖରାପ ଲାଗୁଛି ଭୁଲ୍ ନ କରି, ମୋତେ ଭୁଲ୍ ବୋଲି କୁହାଯାଉଛି। ଏହା ଠିକ୍ ନୁହେଁ ବୋଲି ସେ କହିବା ସହ ଅଭିଯୋଗ କରିଥିବା ଭାଇମାନଙ୍କୁ ଜଗନ୍ନାଥ ସଦ୍ବୁଦ୍ଧି ଦିଅନ୍ତୁ।