ହାଇଦ୍ରାବାଦ, ୬ା୫:ଜଣେ ମୁସଲମାନ ଯୁବତୀଙ୍କୁ ବିବାହ କରିଥିବା ହାଇଦ୍ରାବାଦର ହିନ୍ଦୁ ଯୁବକଙ୍କୁ ବୁଧବାର ରାତିରେ ସର୍ବସାଧାରଣରେ ପିଟି ହତ୍ୟା କରାଯାଇଛି। ଯୁବତୀଙ୍କ ଦୁଇ ସମ୍ପର୍କୀୟ ଭାଇ ଲୁହାରଡ୍ରେ ସମ୍ପୃକ୍ତ ଯୁବକଙ୍କୁ ପିଟୁଥିବାର ଭିଡିଓ ସିସିଟିଭିରେ କଏଦ ହୋଇଛି। ଘଟଣାସ୍ଥଳରେ ବହୁସଂଖ୍ୟାରେ ଲୋକ ଉପସ୍ଥିତ ଥିଲେ ହେଁ ସେମାନେ ଅଭିଯୁକ୍ତଙ୍କୁ ଅଟକାଇବା ବଦଳରେ ହତ୍ୟାକାଣ୍ଡର ଫଟୋ ଓ ଭିଡିଓ କରୁଥିବା ଦେଖାଯାଇଛି।
ସୂଚନା ଅନୁସାରେ, ବି. ନାଗାରାଜୁ ଏବଂ ସୟଦ ଅଶ୍ରିନ୍ ସୁଲତାନା ପରସ୍ପରକୁ ପିଲାବେଳୁ ଭଲ ପାଉଥିଲେ। ପରିବାର ଲୋକଙ୍କ ବିରୋଧ ସତ୍ତ୍ୱେ ଉଭୟେ ୩ ମାସ ତଳେ ହାଇଦ୍ରାବାଦର ଆର୍ଯ୍ୟ ସମାଜ ମନ୍ଦିରରେ ବିବାହ କରିଥିଲେ। ବୁଧବାର ରାତି ପ୍ରାୟ ୮ଟା ୪୫ରେ ଉଭୟେ ଘରୁ ବାହାରି ଏକ ବାଇକ୍ ଯୋଗେ ଯାଉଥିବାବେଳେ ସରୁରନଗରରେ ୨ ଜଣ ବାଟରେ ଗାଡ଼ିକୁ ଅଟକାଇ ହଠାତ୍ ଲୁହାରଡ୍ରେ ନାଗାରାଜୁଙ୍କୁ ଆକ୍ରମଣ କରିଥିଲେ। ଅଶ୍ରିନ୍ ସୁଲତାନା ସ୍ବାମୀ ନାଗାରାଜୁଙ୍କୁ ରକ୍ଷା କରିବା ପାଇଁ ଅଭିଯୁକ୍ତଙ୍କୁ ଅଟକାଇବାକୁ ଚେଷ୍ଟା କରିଥିଲେ ହେଁ ପାରି ନ ଥିଲେ। କିଛି ସମୟ ପରେ ଘଟଣାସ୍ଥଳରେ ହିଁ ନାଗାରାଜୁଙ୍କ ମୃତ୍ୟୁ ଘଟିଥିଲା। ଅଭିଯୁକ୍ତମାନେ ସେଠାରୁ ଫେରାର ହୋଇଯାଇଛନ୍ତି। ଏହି ଘଟଣା ପରେ ସରୁରନଗରରେ ଉତ୍ତେଜନା ଦେଖାଦେଇଛି। ସ୍ଥାନୀୟ ଭାଜପା କର୍ମୀମାନେ ଅଭିଯୁକ୍ତଙ୍କୁ ଗିରଫ ଦାବିରେ ଆନ୍ଦୋଳନକୁ ଓହ୍ଲାଇଛନ୍ତି।
