ନୂଆଦିଲ୍ଲୀ, ୨୯ା୬: ଧର୍ମୀୟ ଭାବାବେଗକୁ ଆଘାତ ଦେବା ଅଭିଯୋଗରେ ଗିରଫ ହୋଇଥିବା ଅଲ୍ଟ ନ୍ୟୁଜ୍ ଓ୍ବେବସାଇଟ ଖବରଦାତା ମହମ୍ମଦ ଜୁବୈରଙ୍କୁ ୪ ଦିନ ପାଇଁ ରିମାଣ୍ଡରେ ନେବାକୁ ଦିଲ୍ଲୀର ଏକ କୋର୍ଟ ମଙ୍ଗଳବାର ପୋଲିସକୁ ଅନୁମତି ଦେଇଛନ୍ତି। ୨୦୧୮ରେ ସେ ହିନ୍ଦୁ ଠାକୁରଙ୍କ ଉପରେ କରିଥିବା ଏକ ଆପତ୍ତିଜନକ ଟୁଇଟ୍କୁ ନେଇ ସୋମବାର ଦିଲ୍ଲୀ ପୋଲିସ ତାଙ୍କୁ ଗିରଫ କରିଥିଲା। ତାଙ୍କ ନାଁ ଏବଂ ଧର୍ମ (ମୁସଲମାନ)କୁ ନେଇ ତାଙ୍କୁ ଟାର୍ଗେଟ କରାଯାଇଥିବା ଜୁବୈର ଓ ତାଙ୍କ ଓକିଲ ବ୍ରିନ୍ଦା ଗ୍ରୋଭର କୋର୍ଟରେ କହିଛନ୍ତି।
ଜାମିନ ପାଇଁ କୋର୍ଟରେ ଯୁକ୍ତି ଉପସ୍ଥାପନବେଳେ ଗ୍ରୋଭର କହିଥିଲେ, ଜୁବୈର ୨୦୧୮ ମାର୍ଚ୍ଚରେ ହୃଷୀକେଶ ମୁଖାର୍ଜୀଙ୍କ ‘କିସି ସେ ନା କେହନା’ ଫିଲ୍ମର ଏକ ଫଟୋ ଟୁଇଟ୍ କରିଥିଲେ। ଏଥିରେ ଏକ ହୋଟେଲର ସାଇନ୍ବୋର୍ଡ ରହିଥିଲା, ଯେଉଁଥିରେ ‘ହନୁମାନ ହୋଟେଲ’ ଲେଖାଯାଇଥିଲା। କିନ୍ତୁ ପେଣ୍ଟ୍ମାର୍କ ଅନୁସାରେ ତାହାର ନାଁ ପୂର୍ବରୁ ‘ହନିମୁନ୍ ହୋଟେଲ’ ଥିଲା। ଜୁବୈର ପୋଷ୍ଟ କରିଥିବା ଫଟୋରେ କ୍ୟାପସନ୍ ଲେଖିଥିଲେ, ‘୨୦୧୪ ପୂର୍ବରୁ: ହନିମୁନ ହୋଟେଲ, ୨୦୧୪ ପରେ ହନୁମାନ ହୋଟେଲ’। ୨୦୧୪ରେ ଭାଜପା କେନ୍ଦ୍ରରେ ଶାସନକୁ ଆସିବାକୁ ନେଇ ଏହା ଏକ କଟାକ୍ଷ ବୋଲି କୁହାଯାଉଛି। ତେବେ ଜୁବୈର ଉକ୍ତ ଫଟୋକୁ ନିଜେ ଏଡିଟ୍ କରିଥିବା ପୋଲିସ କହୁଥିବାବେଳେ ତାଙ୍କ ଓକିଲ ଏହାକୁ ଭିତ୍ତିହୀନ ବୋଲି କହିଛନ୍ତି। ଏହି ପୋଷ୍ଟରେ ଜୁବୈର କାହାରି ଧର୍ମୀୟ ଭାବନାକୁ ଆଘାତ ଦେବା ଭଳି କଥା କହି ନ ଥିବା ଗ୍ରୋଭର ପ୍ରକାଶ କରିଛନ୍ତି। ଏହା କେବଳ ଏକ ପ୍ରକାର କମେଡି। କୌଣସି ଧାର୍ମିକ ସ୍ଥଳ କିମ୍ବା ଭାବନା ଉପରେ ତାହା ଆଧାରିତ ନୁହେଁ। ପୋଲିସ ନିଜ କ୍ଷମତାର ଦୁରୁପଯୋଗ କରିଥିବା ଗ୍ରୋଭର ଅଭିଯୋଗ କରିଛନ୍ତି। ୨୦୧୮ର ଏକ ଟୁଇଟ ୪ ବର୍ଷ ପରେ କିପରି ସମସ୍ୟା ସୃଷ୍ଟି କଲା ବୋଲି ସେ ପ୍ରଶ୍ନ କରିଛନ୍ତି। ଘୃଣା ମନ୍ତବ୍ୟ ସମ୍ପର୍କରେ ରିପୋର୍ଟ କରୁଥିବାରୁ ତାଙ୍କ ଉପରେ ଏପରି ଅତ୍ୟାଚାର କରାଯାଉଛି ବୋଲି ଗ୍ରୋଭର କହିଛନ୍ତି।
ଦିଲ୍ଲୀ ପୋଲିସ କୋର୍ଟରେ ଜୁବୈରଙ୍କୁ ୫ ଦିନିଆ ରିମାଣ୍ଡରେ ଆଣିବା ପାଇଁ ଆବେଦନ କରି କହିଥିଲା, ଜୁବୈର କ୍ରମାଗତ ଭାବେ ଧର୍ମୀୟ ଭାବନାକୁ ଆଘାତ ଦେବା ଭଳି ଟୁଇଟ୍ କରିଆସୁଛନ୍ତି। ଆଉ ଏକ ଟୁଇଟ୍ରେ ଜୁବୈର ଲେଖିଥିଲେ, ‘ହନୁମାନଙ୍କୁ ପ୍ରାର୍ଥନା କଲେ ମାଙ୍କଡ଼ମାନେ ଆଉ ହଇରାଣ କରିବେ ନାହିଁ’। ଅନ୍ୟପକ୍ଷରେ ଜୁବୈରଙ୍କ ଆକାଉଣ୍ଟକୁ ଗତ କିଛି ଦିନ ମଧ୍ୟରେ ୫୦ ଲକ୍ଷ ଟଙ୍କା ଟ୍ରାଞ୍ଜାକଶନ୍ ହୋଇଥିବା ଡେପୁଟି ପୋଲିସ କମିଶନର କେପିଏସ୍ ମାଲହୋତ୍ରା କହିଛନ୍ତି। ଏହାକୁ ତଦନ୍ତ ପରିସରଭୁକ୍ତ କରାଯିବ ବୋଲି ସେ ସୂଚନା ଦେଇଛନ୍ତି। ମାସକ ତଳେ ଉତ୍ତରପ୍ରଦେଶର ସୀତାପୁର ଜିଲାରେ ଦୁଇ ସମ୍ପ୍ରଦାୟ ମଧ୍ୟରେ ଶତ୍ରୁଭାବ ସୃଷ୍ଟି କରିବା ଅଭିଯୋଗରେ ଜୁବୈରଙ୍କ ବିରୋଧରେ ମାମଲା ହୋଇଥିଲା।