ବାରଙ୍ଗ,୬।୮(ଡି.ଏନ୍.ଏ.): ରଘୁନାଥପୁର ଗାଁ ମୁଣ୍ଡରେ ଗୁରୁବାର ସାଇକେଲ ନେଇ ଆସୁଥିବା ଜଣେ ବ୍ୟକ୍ତିଙ୍କ ସହ ଜଣେ ବାଇକ୍ ଚାଳକକୁ ଏକ ମୋ ବସ୍ ଧକ୍କା ଦେଇଛି। ସ୍ଥାନୀୟ ଲୋକେ ଦୁର୍ଘଟଣାଗ୍ରସ୍ତ ବସ୍କୁ ଅଟକ ରଖିଥିଲେ। କିନ୍ତୁ ବସ୍ ଚାଳକ ବସ୍ ଆଗରେ ରଖା ଯାଇଥିବା ବାଇକ୍କୁ ଧକ୍କାଦେଇ ଯିବାକୁ ଉଦ୍ୟମ କରିବାରୁ ଲୋକେ ଉତ୍ତ୍ୟକ୍ତ ହୋଇ ପାଟି କରିବା ସହ ନନ୍ଦନକାନନକୁ ଆସୁଥିବା ସମସ୍ତ ମୋ ବସ୍କୁ ୧ଘଣ୍ଟା କାଳ ଅଟକ ରଖିଥିଲେ। ଖବରପାଇ ନନ୍ଦନକାନନ ଥାନା ପୋଲସି ଆସି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବାସହ ଦୁର୍ଘଟଣାଗ୍ରସ୍ତ ଗାଡ଼ିକୁ ଜବତ ପରେ ଅଟକ ଥିବା ଅନ୍ୟ ମୋ ବସ୍ଗୁଡିକୁ ଯିବାକୁ ଦେଇଥିଲେ। ପ୍ରକାଶ ଯେ, ଓଡି ୩୩-ଭି-୪୫୭୭ନଂ. ମୋ ବସ୍ଟି ସକାଳ ୮ଟା ସୁଦ୍ଧା ମାଷ୍ଟରକ୍ୟାଣ୍ଟିନରୁ ନନ୍ଦନକାନନକୁ ଯାତ୍ରୀ ନେଇ ଆସୁଥିଲା। ରଘୁନାଥପୁର ଗାଁ ମୁଣ୍ଡ ଦେଇ ପୁରୀ ଜିଲା ଡେଲାଙ୍ଗ ଅଞ୍ଚଳର କାଳୁ ବେହେରା ସାଇକେଲରେ ଯାଉଥିବାବେଳେ ପଛପଟରୁ ତାଙ୍କୁ ଧକ୍କାଦେଇଥିଲା। ଫଳରେ ସାଇକେଲରୁ ସେ ଛିଟିକି ରାସ୍ତାକଡ଼ରେ ପଡିଥିଲେ। ଏହି ସମୟରେ ଏକ ବାଇକ୍ରେ ଆସୁଥିବା ଦୁଇଜଣଙ୍କୁ ବସ୍ଟି ସାଇଡ୍ ମାରିବାରୁ ସେମାନେ ମଧ୍ୟ ଛିଟିକି ହୋଇ ପଡିଥିଲେ। ଦୁର୍ଘଟଣା ଘଟାଇ ବସ୍ଟି ଚାଲିଯିବାକୁ ଉଦ୍ୟମ କରୁଥିବା ବେଳେ ଦୁର୍ଘଟଣାର ଶିକାର ହୋଇଥିବା ବାଇକ ଚାଳକ ଉଠିପଡ଼ି ବସ୍ ଆଗରେ ତାଙ୍କ ବାଇକକୁ ରଖି ଦେବାରୁ ବସ୍ଟି ଯାଇପାରି ନ ଥିଲା। ଅନ୍ୟପଟେ ସ୍ଥାନୀୟ ଲୋକେ ୧୦୮ ଆମ୍ବୁଲାନ୍ସ ଡକାଇ ଗୁରୁତର ଆହତ ହୋଇଥିବା କାଳୁଙ୍କୁ କ୍ୟାପିଟାଲ ହସ୍ପିଟାଲ ପଠାଇଥିଲେ। ଏହି ସମୟରେ ପୁଣି ବସ୍ ଚାଳକ ବସ୍କୁ ଆଗକୁ ନେବାକୁ ପୁନର୍ବାର ଉଦ୍ୟମ କରିବାରୁ ଉପସ୍ଥିତ ଲୋକମାନେ ଉତ୍ତେଜିତ ହୋଇପଡିବା ସହ ନନ୍ଦନକାନନକୁ ଆସୁଥିବା ସମସ୍ତ ମୋ ବସ୍କୁ ଅଟକାଇଥିଲେ। ଦ୍ରୁତଗତିରେ ଗାଡି ଚଳାଇବା, ମନଇଚ୍ଛା ରାସ୍ତାମଝିରେ ଗାଡିରଖିବା ଦ୍ୱାରା ଦୁର୍ଘଟଣା ବଢୁଛି ବୋଲି ଗ୍ରାମବାସୀ ଅଭିଯୋଗ କରିବା ସହ ଆହତ ବ୍ୟକ୍ତିଙ୍କୁ କ୍ଷତିପୂରଣ ପାଇଁ ଦାବି କରିଥିଲେ। ଖବରପାଇ ପୋଲିସ ଆସି ଉତ୍ତ୍ୟକ୍ତ ଲୋକଙ୍କୁ ବୁଝାଇବା ସହ ଦୁର୍ଘଟଣାଗ୍ରସ୍ତ ଗାଡିକୁ ଜବତ କରିବା ପରେ ରାସ୍ତାରୁ ମୋ ବସ୍ ହଟିଥିଲା।