କଣ୍ଟାପଡା,୨ା୯(ଡି.ଏନ୍.ଏ.): ଦୀର୍ଘଦିନର ଦାବି ପରେ କଣ୍ଟାପଡା ବ୍ଲକ ଅନ୍ତର୍ଗତ ଅଡଶପୁରଠାରୁ ଭୁବନେଶ୍ୱରକୁ ମୋ’ବସ୍ ଗଡିବା ଗୁରୁବାରଠାରୁ ଆରମ୍ଭ ହୋଇଛି। ଏଥିପାଇଁ ସ୍ଥାନୀୟ ଅଞ୍ଚଳବାସୀ ଆନନ୍ଦିତ ହୋଇଛନ୍ତି। ହେଲେ ବହୁଦିନର ଦାବି ପୂରଣ ହୋଇଥିବାରୁ ଏହାର ଶ୍ରେୟ ନେବା ପାଇଁ ପ୍ରତିଯୋଗିତା ଆରମ୍ଭ ହୋଇଯାଇଛି। ମିଳିଥିବା ସୂଚନା ଅନୁଯାୟୀ, ଭୁବନେଶ୍ୱର ମାଷ୍ଟରକ୍ୟାଣ୍ଟିନ ଛକରୁ ବାଲିଅନ୍ତା ବ୍ଲକ ଅନ୍ତର୍ଗତ ଜୟଦେବ ପୀଠ ପର୍ଯ୍ୟନ୍ତ ୩ଟି ମୋ’ ବସ୍ ଚଳାଚଳ କୁରୁଥିଲା। ଜୟଦେବ ପୀଠଠାରୁ ଅଡଶପୁର ମହାବିଦ୍ୟାଳୟର ଦୂରତା ମାତ୍ର ୨ କି.ମି.। ହେଲେ ସେଠାକୁ ବସ୍ ଚଳାଚଳ କରୁ ନ ଥିବାରୁ ଛାତ୍ରୀଛାତ୍ରମାନେ ଅସୁବିଧାର ସମ୍ମୁଖୀନ ହେଉଥିଲେ। ତେଣୁ ଉକ୍ତ ମହାବିଦ୍ୟାଳୟ ନିକଟକୁ ବସ୍ ଚଳାଚଳ ପାଇଁ ୨୦୨୧ ଡିସେମ୍ବରରେ କଣ୍ଟାପଡା ବ୍ଲକର ପୂର୍ବତନ ପଞ୍ଚାୟତ ସମିତି ଅଧ୍ୟକ୍ଷା ସ୍ମିତାରାଣୀ ସ୍ବାଇଁ, ବରିଷ୍ଠ ନାଗରିକ ଶଙ୍କର ସାହୁ, ରମେଶ ଚନ୍ଦ୍ର ସ୍ବାଇଁ, ବିନୋଦ ରାଉତରାୟ, ସଞ୍ଜୟ ପାତ୍ର, ଧୀରେନ୍ଦ୍ର ସାହୁ, ଅଡଶପୁର ପଞ୍ଚାୟତର ପୂର୍ବତନ ସମିତିସଭ୍ୟ ପ୍ରଭାତ ପ୍ରଧାନ, ପୂର୍ବତନ ସରପଞ୍ଚ ଡଲି ସ୍ବାଇଁ, ବ୍ରାହ୍ମଣବାଟୀ ସରପଞ୍ଚ ଗାୟତ୍ରୀ ରାଉତରାୟଙ୍କ ସମେତ ସ୍ଥାନୀୟ ଅଞ୍ଚଳବାସୀ ବିଭାଗୀୟ କର୍ତ୍ତୃପକ୍ଷଙ୍କ ନିକଟରେ ଦାବି କରିଥିଲେ। ଅଞ୍ଚଳବାସୀଙ୍କ ଦାବିକୁ ଗ୍ରହଣ କରି ବିଭାଗୀୟ କର୍ତ୍ତୃପକ୍ଷ ଗୁରୁବାରଠାରୁ ଅଡଶପୁରକୁ ମୋ’ ବସ୍ ଚଳାଇବା ପାଇଁ ଘୋଷଣା କରିବା ପରେ ଏହାର ଶ୍ରେୟ ନେବା ପାଇଁ ସୋସିଆଲ ମିଡିଆରେ ଏକ ପ୍ରକାର ପ୍ରତିଯୋଗିତା ଆରମ୍ଭ ହୋଇଯାଇଛି। ସ୍ଥାନୀୟ ସରପଞ୍ଚ ମୋ ବସ୍ ଚଳାଚଳ ପାଇଁ ତାଙ୍କର ଅବଦାନ ରହିଛି ବୋଲି ସୋସିଆଲ ମିଡିଆରେ ବିଭାଗୀୟ କର୍ତ୍ତୃପକ୍ଷଙ୍କୁ ଗତ ଏପ୍ରିଲରେ ଦେଇଥିବା ଚିଠିର ନକଲ ପୋଷ୍ଟ କରି ପ୍ରଚାର କରୁଥିବାବେଳେ ଏହା ନିଆଳି ବିଧାୟକ ପ୍ରମୋଦ ମଲ୍ଲିକଙ୍କ ଯୋଗୁ ସମ୍ଭବ ହୋଇଛି ବୋଲି ତାଙ୍କର ଅନୁଗାମୀମାନେ ପ୍ରଚାର ଚଳାଇଛନ୍ତି। ତେବେ ସେ ଯାହାହେଉ ଅଡଶପୁର ଅଞ୍ଚଳକୁ ମୋ’ ବସ୍ ଚଳାଚଳ କରିବା ଫଳରେ ଭୁବନେଶ୍ୱରକୁ ଯାତାୟାତ କରୁଥିବା ସ୍ଥାନୀୟ ଜନସାଧାରଣ ବିଶେଷ ଉପକୃତ ହେବେ ବୋଲି ସାଧାରଣରେ ଆଲୋଚନା ହେଉଛି।